ސައުތު އޭޝިއަން ކްރޮސް ކަންޓްރީ ޗެމްޕިއަންޝިޕްގައި ރާއްޖެއިން ބައިވެރިވާ ޓީމަށް ބަދަލު ގެނެސްފިއެވެ.

މުބާރާތަށް ދިޔުމަށް ނަގާފައިވާ ޓީމުގައި މީގެ ކުރިން ހިމަނާފައިވާ ޔޫސުފް އިބްރާހީމްގެ ބަދަލުގައި މުބާރާތަށް ދާނީ މުޙައްމަދު ރަޝީދުއެވެ. މިބަދަލު ގެނައީ އަނިޔާގެ ސަބަބުން ޔޫސުފްއަށް މުބާރާތަށް ނުދެވޭތީކަމަށް އެތުލެޓިކްސް އެސޯސިއޭޝަން އޮފް މޯލްޑިވްސްއިން ބުނެއެވެ.

މި ބަދަލާއެކު ރާއްޖޭގެ ޓީމުގެ ފިރިހެން ދުވުންތެރިންގެ ތެރޭގައި ހިމެނެނީ ނަސީރު ސްޕޯޓްސް ކްލަބްގެ ހުސައިން ފަޒީލް ހާރޫން އާއި މެރަތަން ރަނާސްގެ ދެ ދުވުންތެރިން ކަމަށްވާ އިރުފާން މުހައްމަދު އާއި މުހައްމަދު ރަޝީދުއެވެ. އަންހެން ދުވުންތެރިންގެ ތެރޭގައި ހިމެނެނީ މެރަތަން ރަނާސްގެ ދެ ދުވުންތެރިން ކަމުގައިވާ އާއިޝަތު ރާނިޔާ އާއި އާއިޝަތު ރިޝްމީގެ އިތުރުން ކުޑަހުސައިން ސްޕޯޓްސް އެސޯސިއޭޝަންގެ މަރިޔަމް ޢަބްދުލް ކަރީމްއެވެ.

މި މުބާރާތުގައި ރާއްޖޭގެ ޓީމަށް ކޯޗުކަން ކޮށްދޭނީ އެންމެ ގިނަ މެރަތަން ދުވުމުގެ ރެކޯޑު އޮތް ރާއްޖޭގެ ދުވުންތެރިޔާ ނަސްރުﷲ އަހުމަދުއެވެ. ރާއްޖޭގެ މެރަތަން ރަނާސްގެ ކޯޗަކީވެސް ނަސްރުއެވެ.

މި މުބާރާތް ފެށުމަށް ހަމަޖެހިފައި ވަނީ އިންޑިއާގެ ނާގަލެންޑުގައި މިމަހުގެ 26 ވަނަ ދުވަހުއެވެ. މި މުބާރާތުގައި ރާއްޖެއިން އެކުލަވާލާފައިވާ ޓީމުގައި ހިމެނެނީ ތިން ފިރިހެން ބައިވެރިންނާއި ތިން އަންހެން ބައިވެރިންނެވެ.

އިންޑިއާގެ ނާގަލެންޑުގައި ބޭއްވުމަށް ހަމަޖެހިފައިވާ މި މުބާރާތް ފުރަތަމަ ތާވަލުކުރެވުނީ މިއަހަރުގެ ޖެނުއަރީ މަހަށެވެ. ނަމަވެސް އޮމިކްރޯން ވޭރިއެންޓާއެކު ކޮވިޑުގެ ކޭސްތައް އިތުރުވުމުން މުބާރާތް މާޗު މަހަށް ލަސްކުރީއެވެ. މިއީ ނާގަލެންޑުގައި ބާއްވާ އެންމެ ފުރަތަމަ ބައިނަލްއަގްވާމީ މުބާރާތެވެ. މި މުބާރާތާއެކު އިންޑިއާގެ 56 ވަނަ ނެޝަނަލް ކްރޮސް ކަންޓްރީ ޗެމްޕިއަންޝިޕްވެސް ކުރިއަށްދާނެއެވެ.