އައްޑޫ ސިޓީ ހިތަދޫގެ ވިޔަފާރިވެރިއެއް ކަމުގައިވާ އަލީ އަބްދުﷲ މަރާލި މައްސަލައިގައި ބައިވެރިވި މީހަކު ޖަލަށްލުމަށް ކްރިމިނަލް ކޯޓުން ޙުކުމްކޮށްފިއެވެ.
މި މައްސަލައިގައި އެނގިހުރެ މީހަކު މެރުމުގައި ބައިވެރިވުމުގެ ކުށުގެ ދައުވާ އުފުލާފައިވަނީ މުޙައްމަދު ޝިފާޒުގެ މައްޗަށެވެ. އެގޮތުން އޭނާ ދައުވާއަށް އިންކާރު ކޮށްފައިވީ ނަމަވެސް، ދައުލަތުން ހުށައަޅާފައިވާ ހެއްކާއި ޤަރީނާއިން އޭނާގެ މައްޗަށް އެކަށީގެންވާ ޝައްކެއް ނެތް މިންވަރަށް ކުށް ސާބިތުވާކަމަށް މައްސަލަ ބެއްލެވި ގާޒީ ބުދަ ދުވަހު ކަނޑައެޅުއްވިއެވެ.
އެހެންނަމަވެސް އޭނާ ތަހުގީގު މަރުޙަލާއިން ފެށިގެން ޝަރީއަތް ނިމެންދެން ބަންދުކޮށްފައި ހުރި މުއްދަތު ޙުކުމުން އުނިކުރުމުން އިތުރަށް ތަންފީޒު ކުރަންޖެހޭ މުއްދަތެއް ނެތެވެ. ވުމާއެކު، އޭނާގެ މައްޗަށް ޙުކުމް ކުރެއްވި ދުވަހު މިވަނީ އޭނާ އަދަބު ތަންފީޒުކޮށް ނިމިފައިވާކަމަށް ކަނޑައަޅުއްވާފައެވެ. އެގޮތުން މިއީ 2 މާރޗު 2016 ގައި ހިނގި ޙާދިސާއެކެވެ.
މި މައްސަލައިގައި ޝިފާޒުގެ މައްޗަށް ދައުވާ އުފުލީ އަލީ އަބްދުﷲގެ ޤާތިލުގެ އެދުމަކަށް އޭނާ ސައިކަލުގައި އަލީ އަބްދުﷲ ގޮވައިގެން ވަކި ތަނަކަށް ގެންގޮސްދީފައިވާތީއެވެ. އެގޮތުން އަލީ އަބްދުﷲ އެ ސަރަޙައްދަށް ގެންދިޔުމުން އޭނާއަށް ބޮޑުބޭބެ ކިޔާ ސ. ހިތަދޫ ހެޕީފިއުޗާ، އަހުމަދު އިބްރާހީމް ދީދީ ވަނީ އޭނާގެ ކަރަށް ވާފަށެއް މަހާލުމަށްފަހު، ނޭވާ ހާސްކޮށްގެން މަރާލާފައެވެ. އެކަމާއި ގުޅިގެން އޭނާގެ މައްޗަށް ވަނީ އެނގިހުރެ މީހަކު މެރުމުގެ ކުށް ސާބިތުވެ، 12 އަހަރާއި 6 މަސް ދުވަހުގެ ޖަލު ޙުކުމެއް އިއްވާފައެވެ. އެއީ 8 އޮކްޓޯބަރު 2020 ގައެވެ.
ކްރިމިނަލް ކޯޓުގައި މި މައްސަލަ ބެއްލެވީ ގާޒީ ސޮފްވަތު ޙަބީބެވެ.
އަލީ އަބްދުﷲގެ މަރު މައްސަލައިގައި ގަސްދުގައި މީހަކު މެރުމުގައި ބައިވެރިވުމުގެ ދައުވާ އުފުލާފައިވާ ސ. ހިތަދޫ އަތަމާވިލާ، މައޫޒު މުހައްމަދާއި، އެ ރަށު އައްޒާ، މުބާރިކު މުހައްމަދުގެ މައްޗަށް ކުށް ސާބިތު ނުވާކަމަށް ކްރިމިނަލް ކޯޓުން ހުކުމް ކޮށްފައިވަނީ 2021 ވަނަ އަހަރުގެ މާރޗު މަހުގެ 28 ވަނަ ދުވަހު އެވެ.
2016 ވަނަ އަހަރު ހިނގި މި މައްސަލައާއި ގުޅޭ މައުލޫމާތު މީޑިއާތަކަށް ދެމުން އޭރު ފުލުހުން ބުނެފައިވަނީ، އަލީ އަބްދުﷲ މަރާލާފައި ވަނީ ފައިސާ އާއި މުދަލުގެ ދަހިވެތި ކަމުގައި ކަމަށެވެ. އެގޮތުން އެ މައްސަލާގައި ތުހުމަތު ކުރެވޭ މީހެއްގެ ގޭގައި ވަޅުލާފައި ހުއްޓައި 40،000 އަށް ވުރެ ގިނަ ފައިސާ ފެނިފައިވާ ކަމަށް ފުލުހުން އޭރު ބުނެފައިވެއެވެ.
