ރަޝިޔާއިން އެމެރިކާއަށް ސައިބަރ އެޓޭކެއް ދީފާނެކަމުގެ އިންޒާރު

ރަޝިޔާއިން އެމެރިކާއަށް ސައިބަރ އެޓޭކްތަކެއް ދީފާނެ ކަމުގެ އިންޒާރު އެމެރިކާގެ ރައީސް ޖޯ ބައިޑެން ދެއްވައިފިއެވެ.

ހޯމަ ދުވަހު ބައިޑެން ދެއްވި ސްޓޭޓްމެންޓެއްގައި ވަނީ އެމެރިކާއަށް ސައިބަރ އެޓޭކެއް ދެވޭނެ ގޮތްތަކެއް ހޯދުމުގެ މަސައްކަތް ރަޝިޔާ ސަރުކާރުން ކުރަމުންދާކަމުގެ އިންޓެލިޖެންސް މައުލޫމާތު ލިބިވަޑައިގެންފައިވާކަން ހާމަކުރައްވާފައެވެ. ބައިޑެން ވިދާޅުވީ ރަޝިޔާއިން ޔޫކްރެއިނަށް ދެމުންދާ ހަމަލާތަކުގެ ސަބަބުން އެ ގައުމުން ރަޝިޔާއާއި ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުން މިފަދަ ސައިބަރ ހަމަލާއެއް ލިބުން އެކަށީގެންވާ ކަމަށެވެ.

އެމެރިކާގެ "ކްރިޓިކަލް އިންފްރާސްޓްރަކްޗަރ" ތައް ބަލަހައްޓަނީ އަމިއްލަ ކުންފުނިތަކުން ކަމަށްވާތީ ބައިޑެން ވަނީ އެގައުމުގެ ސައިބަރ ސެކިއުރިޓީ އިތުރަށް ވަރުގަދަކުރުމަށް ޕްރައިވެޓް ސެކްޓަރުގައި މަސައްކަތްކުރާ ޕާޓްނަރުންނަށް ގޮވާލައްވާފައެވެ. މި ނުރައްކާތަކުން ސަލާމަތްވުމަށް ކުރެވެންހުރި ހުރިހާ ކަމެއް ކުރަންޖެހޭކަންވެސް ވަނީ ފާހަގަކުރައްވާފަައެވެ.

މިކަމާއި ގުޅިގެން އެމެރިކާގެ ސައިބަރ އެންޑް އެމާރޖިން ޓެކްނޮލޮޖީގެ ޑެޕިއުޓީ ނޭޝަނަލް ސެކިއުރިޓީ އެޑްވައިޒަރ އޭން ނިއުބާގު ވިދާޅުވީ މިފަދަ ސައިބަރ އެޓޭކެއް މިވަގުތު އައިސްދާނެ ކަމުގެ ސިގުނަލެއް ލިބިފައިނުވާކަމަށެވެ. އެހެންނަމަވެސް ބައިޑެންގެ ސްޓޭޓްމެންޓުން ގޮވާލާފައިވަނީ މިފަދަ ހާލަތަކަށް ތައްޔާރުވެ ތިބުމަށް ކަމަށް އޭނާ ވިދާޅުވިއެވެ.

ބައިޑެންގެ ސްޓޭޓްމެންޓާއި ގުޅިގެން ސެންޓަރ ފޮރ ސްޓްރެޓެޖިކް އެންޑް އިންޓަރނޭޝަނަލް ސްޓަޑީޒްގެ ސްޓްރެޓެޖިކް ޓެކްނޮލޮޖީސް ޕްރޮގްރާމުގެ ޑިރެކްޓަރު ޖޭމްސް ލުވިސް ވިދާޅުވީ މިއީ މި މިފަދަ ހަމަލާއަކަށް ސަމާލުވެ ތިބުމަށް ލިބުނު "ވޭކް-އަޕް ކޯލް"އެއް ކަމަށެވެ.