ބާސެލޯނާއިން އަބަދުވެސް މެސީއަށް ފުރުސަތު އޮންނާނެ: ޒަވީ

ބާސެލޯނާގައި އަބަދުވެސް ލައިނަލް މެސީއަށް ފުރުސަތު އޮންނާނެކަމަށް އެޓީމުގެ ކޯޗު ޒަވީ ހެނާންޑޭޒް ބުނެފިއެވެ.

ރެއާލް މެޑްރިޑާއި ބާސެލޯނާ އާދީއްތަ ދުވަހުގެރޭ ބައްދަލުކުރި މެޗުގެ ކުރިން ދިން އިންޓަރވިއުއެއްގައި ޒަވީ ބުނީ އޭނާއާއި ބައްދަލުކުރަން ވިޔަސް ނުވަތަ ޓީމުގެ ފަރިތަކުރުންތައް ބަލާލަން ވިޔަސް ނުވަތަ ޓީމާއި އަލުން ގުޅެން ވިޔަސް މެސީއަށް އެފުރުސަތު އަބަދުވެސް އޮންނާނެ ކަމަށެވެ. އަދި ޓީމުގެ ސަޕޯޓަރުން އެދެނީ މެސީ އެނބުރި އެޓީމާއި ގުޅުމަށް ކަމަށެވެ.

މި ސީޒަން ފެށުމުގެ ކުރިން މެސީ ޕީއެސްޖީއަށް ބަދަލުވީ ފްރީ ޓްރާންސްފާއެއްގައެވެ. މީގެ ކުރިން ބޮޑު މުސާރައެއް ނަގަމުން އައި މެސީއަށް ޕީއެސްޖީގައި އަހަރެއްގެ މައްޗަށް ލިބޭނީ 35 މިލިއަން ޕައުންޑެވެ.

ބާސެލޯނާގައި ގިނަ ކާމިޔާބީތަކެއް ހޯދާފައިވާ މެސީ ޕީއެސްޖީއަށް ބަދަލުވުމަށްފަހު ކުޅުނު 26 މެޗުން އޭނާއަށް ކާމިޔާބު ކުރެވުނީ އެންމެ ހަތް ގޯލެވެ. އެއީ ޗެމްޕިއަންސް ލީގުގައި ޖެހި ފަސް ގޯލާއި ފްރާންސް ލީގުގައި ޖެހި ދެ ގޯލެވެ. އުމުރުން 34 އަހަރުގެ މެސީއާއި، އެމްބާޕޭ އަދި ނޭމާ ފަދަ މޮޅެތި ކުޅުންތެރިންނާއެކު މިފަހަރުގެ ޗެމްޕިއަންސް ލީގަށް ޕީއެސްޖީން ނިކުން ނަމަވެސް އެޓީމަށް ވަނީ މުބާރާތް ނާކާމިޔާބުވެފައެވެ. އެހެން ކަމުން އެޓީމުގެ ގިނަ ސަޕޯޓަރުންތަކެއްގެ ފާޑުކިޔުންތައް ވަނީ މެސީއަށްވެސް އަމާޒުވެފައެވެ. މެސީ ޕީއެސްޖީއަށް ބަދަލުވިއިރު، އެންމެ ބޮޑު އެއް އަމާޒަކަށް ވެފައިއޮތީ ޗެމްޕިއަންސް ލީގު އެޓީމަށް ކާމިޔާބުކޮށްދިނުމެވެ.

މެސީ އާއެކު ބާސެލޯނާގައި 400 އަށްވުރެ ގިނަ މެޗު ޒަވީ ވަނީ ކުޅެފައެވެ. ޔޫރަޕުގެ ފުޓްބޯޅަ އޭރު ޑޮމިނޭޓް ކުރީ ބާސެލޯނާއިންނެވެ. ޒަވީ ބުނީ އޭނާގެ އުންމީދަކީ މެސީ އެނބުރި ބާސެލޯނާއަށް ދިޔުން ކަމަށެވެ. ނަމަވެސް މިހާރު އެއީ ޕީއެސްޖީގެ ކުޅުންތެރިއެއް ކަމަށާއި، އެހެންކަމުން ގޮތް ނިންމާނީ މެސީ ކަމަށެވެ.

މެސީ ބާސެލޯނާއިން ވަކިވިއިރު، ޓީމުގެ ފަރާތުން އޭނާއަށް ހައްގުވާ ވަރުގެ ބޮޑު ފެއަރވެލްއެއް ދީފައި ނުވާކަން ފާހަގަކޮށް ޒަވީ ބުނީ މެސީ އެނބުރި އެޓީމަށް ގޮސްފިނަމަ އޭނާއަށް ހައްގުވާ މިންވަރުގެ ފެއަރވެލްއެއް ދިނުމުގެ ފުރުސަަތު އެބައޮތް ކަމަށެވެ. އަދި އެކަމަށްޓަކައި އޭނާއަށް ކުރެވެން ހުރި ހުރިހާ މަސައްކަތެއް ކުރާނެ ކަމަށެވެ.

މެސީ ވަނީ ބާސެލޯނާގައި 21 އަހަރު ކުޅެފައެވެ. އަދި 35 އަށްވުރެ ގިނަ ޓްރޮފީ އެޓީމާއެކު ހޯދާފައެވެ.