ފްރާންސް ލީގުގައި މޮނާކޯއިން ވަރުގަދަ ޕީއެސްޖީގެ މައްޗަށް ބޮޑު ތަފާތަކުން ކުރި ހޯދައިފިއެވެ.

މޮނާކޯގެ ދަނޑުގައި އާދީއްތަ ދުވަހުގެ ރޭ ކުޅުނު މި މެޗު އެޓީމުން ކާމިޔާބުކުރީ 3-0 ގެ ނަތީޖާއަކުންނެވެ. މެޗުގެ ފުރަތަމަ ހާފުގައި މޮނާކޯއަށް ލީޑު ނަގައިދިނީ ފްރާންސްގެ ފޯވާޑް ބެން ޔެޑާއެވެ. އެޓޫމުގެ ލީޑު އިތުރަށް ފުޅާކޮށްދިނީ މެޗުގެ 68 ވަނަ މިނެޓުގައި ކެވިން ވޮލަންޑް ޖެހި ލަނޑުންނެވެ. މޮނާކޯގެ ފަހު ލަނޑަކީ ލިބުނު ޕެނަލްޓީއަކުން ބެން ޔެޑާ ކާމިޔާބުކޮށްދިން ގޯލެކެވެ.

މި މެޗާއި ގުޅޭގޮތުން ޕީއެސްޖީގެ ކޯޗު މައުރީސިއޯ މޮޗެޓީނޯ ބުނީ ކުޅިވަރުގެ ހަމަތަކުން ބަލާނަމަ މިއީ ޕީއެސްޖީ ލަދުގަންނަން ޖެހޭވަރުގެ ނަތީޖާއެއް ކަމަށެވެ. އަދި ޗެމްޕިއަންސް ލީގުގެ ނާކާމިޔާބީގެ ސަބަބުން ކުރިމަތިވި މާޔޫސްކަމުން އަރައިގަނެ ކުޅުންތެރިން ރަގަޅަށް މަސައްކަތް ކުރަންޖެހޭ ކަމަށެވެ. އަދި ކޯޗަކަށް ކިތަންމެ ވަރަށްކަށްވެސް ކިޔައިދެވިދާނެ ކަމަށާއި ނަމަވެސް ކުޅުންތެރިންވެސް ރަނގަޅަށް މަސައްކަތް ކުރަންޖެހޭނެ ކަމަށް ޕޮޗެޓީނޯ ބުންޏެވެ.

މި ނަތީޖާއާއި އެކުވެސް ލީގު ތާވަލުގެ އެއްވަނައިގައި އޮތީ ޕީއެސްޖީއެވެ. އެއީ 29 މެޗު ކުޅެގެން ލިބުނު 65 ޕޮއިންޓުންނެވެ. ދެވަނައައިގައި މާސޭ އޮތީ 12 ޕޮއިންޓުގެ ފަރަގަކާއެކުއެވެ. މި މެޗުން މޮޅުވުމާއެކު މޮނާކޯ ވަނީ ތާވަލުގެ ފަސްވަނައަށް ޖެހިލާފައެވެ. 29 މެޗު ކުޅެގެން މޮނާކޯއށް ލިބުނީ 44 ޕޮއިންޓެކެވެ.