ޔާމީން ވިދާޅުވީ ދެން އުފެދޭ ޕީޕީއެމް ސަރުކާރެއްގައި އެއެއްބަސްވުންތައް އުވާލައިގެން ދިވެހިންނަށްވާ ގެއްލުން ބަލަން ބޭނުންފުޅުނުވަކަމަށާއި އެހުރިހާ އެއްބަސްވުންތަކެއްވެސް އުވާލައްވާނެކަމަށް
ޕީޕީއެމްގެ ލީޑަރ އަބްދުﷲ ޔާމީން
ދެން އުފެދޭ ޕީޕީއެމް ސަރުކާރެއްގައި އިންޑިޔާއާއެކު ހަދާފައިވާ ހުރިހާ އެއްބަސްވުންތަކެއް ބާތިލުކުރައްވާނެކަމަށް އިދިކޮޅު ޕީޕީއެމް ލީޑަރު އަދި ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.
ރައީސް ޔާމީން އިސްވެހުންނަވާ ކުރިޔަށްގެންދަވާ "އިންޑިޔާ އައުޓް" ކެމްޕެއިންގައި ޅ. ނައިފަރުގައި ކުރިޔަށްގެންދިޔަ ހަރަކާތުގައި ވާހަކަފުޅުދައްކަވަމުން ޔާމީން ވިދާޅުވީ އިންޑިޔާއާއެކު ހަދާފައިވާ އެއްބަސްވުންތަކުގެ ތެރެއިން ކަންބޮޑުވާ އުޅެނީ ދެ އެއްބަސްވުމެއްކަމަށެވެ. ނަމަވެސް ތަހުލީލުކުރުމާއި އެކި ނަންނަމުގައި ބައިވަރު އެހެން އެއްބަސްވުންތައް ހުރިކަމަށް ޔާމީން ވިދާޅުވިއެވެ.
ޔާމީން ވިދާޅުވީ ދެން އުފެދޭ ޕީޕީއެމް ސަރުކާރެއްގައި އެއެއްބަސްވުންތައް އުވާލައިގެން ދިވެހިންނަށްވާ ގެއްލުން ބަލަން ބޭނުންފުޅުނުވަކަމަށާއި އެހުރިހާ އެއްބަސްވުންތަކެއްވެސް އުވާލައްވާނެކަމަށެވެ. އެއިން އެއްވެސް އެއްބަސްވުމެއް އިންޑިޔާއާއެކު ކުރިޔަށްގެންދަވަން ބޭނުންފުޅުނުވާކަމަށް ޔާމީން ވިދާޅުވިއެވެ.
ރައީސް ޔާމީން ވިދާޅުވީ މިހާރު ރާއްޖޭގައި އުފެދިފައިވަނީ އިންޑިޔާގެ ގޮނޑި ކޮއްކޮ ސަރުކާރެއްކަމަށެވެ. އަދި ސަރުކާރުގައި ތިބީ އިންޑިޔާގެ އަޅުންކަމަށް ޔާމީން ވިދާޅުވިއެވެ.
އުތުރުތިލަފަޅު އެއްބަސްވުމާއި ގުޅިގެން ޔާމީންވަނީ ޑިފެންސް މިނިސްޓަރު މާރިޔާ އަހުމަދު ދީދީ އަށާއި ސިފައިންނާއި ސިފައިންގެ އިސް ޖެނެރަލުންނަށް ބަހުގެ ހަމަލާތަކެއް ދެއްވާފައެވެ. އެގޮތުން ޑިފެންސް މިނިސްޓަރު މާރިޔާއަކީ އެމަގާމަށް ކުފޫހަމަވާ ބޭފުޅެއްނޫންކަމަށް ވިދާޅުވިއެވެ.
މީގެއިތުރުން އެމަނިކުފާނު މިދިޔަ ހަފްތާގައި އދ މަހިބަދޫގައި ދެއްކެވި ވާހަކަފުޅަށް ރައްދުދެއްވާ ޑިފެންސް މިނިސްޓްރީން ބަޔާން ނެރެފައިވާތީ އެކަމާއި ގުޅޭގޮތުން ވިދާޅުވީ އެމަނިކުފާނު ދައްކަވާ ވާހަކައަށް ނޫސްބަޔާން ނެރެން ނުޖެހޭކަމަށެވެ. ނަމަވެސް ހާމަކަން ބޮޑު ނޫސްވެރިންގެ ބައްދަލުވުމުގައި ނޫސްވެރިންނަށް ބޭނުން ސުވާލެއްކުރެވޭ ގޮތަށް ނޫސްވެރިންގެ ބައްދަލުވުމެއް ބާއްވާ އެއެއްބަސްވުންތަކުގެ ކަންކަން ހާމަކުރުމަށް ޔާމީން ގޮވާލެއްވިއެވެ.
ޔާމީން ވިދާޅުވީ އުތުރުތިލަފަޅަކީ ދިވެހި ސަރުކާރުގެ ބާރު ހިނގާތަނެއް ނޫންކަމަށާއި އެތަނުގައި ހިނގަނީ އިންޑިޔާގެ ބާރުކަމަށެވެ.
މީގެއިތުރުންވެސް އެމަނިކުފާނުގެ ވާހަކަފުޅުގައި ވަނީ މީގެކުރިންވެސް އެމަނިކުފާނުގެ ވެރިކަން ބަދަލުކޮށްލީ އިންޑިޔާ އަޑީގައި އޮވެގެންކަމަށް ވިދާޅުވެ ދައްކަވާ ވާހަކަފުޅު ތަކުރާރުކުރައްވާފައެވެ. ރައީސް ޔާމީންގެ ވެރިކަން ބަދަލުކުރުމަކީ މުޑުދާރުކަމެއްގެ ގޮތުގައި އެމަނިކުފާނު ސިފަކުރެއްވިއެވެ.
