މެޑިސިން ކިޔެވުމަށް އިންޑިޔާއަށް ދިއުމުގެ ދެ ފުރުސަތެއް އެމްއެންޑީއެފުން ހުޅުވާލައިފި
ހުރިހާ ޚަރަދެއް އެމްއެންޑީއެފުންނާއި އިންޑިޔާ ސަރުކާރުން
އެމްއެންޑީއެފްގެ ޓްރޭނިންގ ހަރާކާތުގެ ތެރެއިން
އިންޑިއާ ޕޫނާގެ އާމްޑް ފޯސަސް މެޑިކަލް ކޮލެޖުން މެޑިސިންގ ދާއިރާއިން އުނގެނުމަށް މޯލްޑިވްސް ނޭޝަނަލް ޑިފެންސް ފޯސްއަށް ލިބިފައިވާ ދެ ޖާގައަށް، ޝައުޤުވެރިވާ ދިވެހީންނަށް އެ ފުރުޞަތު އާންމުކޮށް ހުޅުވާލައިފިއެވެ.
އެމްއެންޑީއެފުން ބުނެފައިވާ ގޮތުގައި އިންޑިއާ ޕޫނާގެ އާމްޑް ފޯސަސް މެޑިކަލް ކޮލެޖުން އެމްއެންޑީއެފަށް ލިބިފައި ވަނީ އެމްޑީ ކޮމިއުނިޓީ މެޑިސިންގ ކޯސް އަދި އެމްޑީ ޖެނެރަލް މެޑިސިން ކޯހެއް ކަމަށެވެ. އެއިން ކޮންމެ ކޯހަކުން އެމްއެންޑީއެފަށް އެއް ޖާގަ ލިބިފައިވާއިރު އެ ދެ ކޯހުގެ ޚަރަދު ހަމަޖައްސަނީ އެމްއެންޑީއެފާއި އިންޑިއާ ސަރުކާރާ ގުޅިގެން ކަމަށެވެ.
އެމްއެންޑީއެފުން ބުނީ ތިން އަހަރު ދުވަހުގެ މުއްދަތަށް ހިންގާ މިކޯހަށް ކުރިމަތިލެވޭ ޝަރުޠުތަކުގެ ތެރޭގައި އެމްބީބީއެސް ކޯސް ފުރިހަމަކޮށް މޯލްޑިވްސް މެޑިކަލް ކައުންސިލްގައި ރަޖިސްޓްރީ ވެފައިވާ ފަރާތެއްކަމުގައި ވުމާއި ކޯހަށް އެދި ހުށަހަޅާ އެމްބީބީއެސް ފުރިހަމަކުރިކަމުގެ ސެޓްފިކެޓަކީ މޯލްޑިވްސް ކޮލިފިކޭޝަން އޮތޯރިޓީއިން ވެލިޑޭޓްކޮށްފައިވާ ސެޓްފިކެޓެއްކަމުގައި ވާންޖެހޭ ކަމަށެވެ. އަދި މި ސްކޮލަރޝިޕްގެ ދަށުން މަތީ ތަޢުލީމު ހާސިލުކުރުމަށްފަހު މޯލްޑިވްސް ނޭޝަނަލް ޑިފެންސް ފޯސްގައި ޚިދުމަތް ކުރުމަށް އެއްބަސްވާ ފަރާތެއްކަމުގައި ވުމާއި ނަފްސާނީ ގޮތުންނާއި ޖިސްމާނީ ގޮތުން ދުޅަހެޔޮ އަދި ރަނގަޅަށް ފަތަން ދަންނަ ހަށިހެޔޮ ފަރާތެއް ކަމުގައި ވާންޖެހޭ ކަމުގައި ވެސް ކޯހުގެ ޝަރުޠުތަކުގެ ތެރޭގައި ހިމެނޭކަމަށް އެމްއެންޑީއެފުން ބުންޏެވެ.
މިކޯހަށް ޝަރުޠުހަމަވާ ފަރާތްތަކުން ތަޢުލީމީ ސެޓްފިކެޓްތަކުގެ ކޮޕީ އާއި ކޯސް އެޕްލިކޭޝަން ފޯމް ފުރުއްވުމަށްފަހު މި މަހުގެ 30 ވަނަ ދުވަހުގެ 14:00 ގެ ކުރިން އެޕްލިކޭޝަން ފޯމް އެމްއެންޑީއެފަށް ހުށަހެޅަން ޖެހެއެވެ. ކޯސް އެޕްލިކޭޝަން ފޯމް އެމްއެންޑީއެފް ވެބްސައިޓް mndf.gov.mvއިން ޑައުންލޯޑް ކުރެވޭނެ ކަމަށާއި މިކޯހާއި ބެހޭ އިތުރު މަޢޫލޫމާތު ހޯއްދެވުމަށް ރަސްމީ ގަޑީގައި 7737368 ނަންބަރު މޯބައިލް ފޯނަށް ގުޅުއްވުން ލިބޭނެ ކަމަށް ވެސް އެމްއެންޑީއެފުން ވަނީ ބުނެފައެވެ.
