ދިރާގު ދިވެހި ޕްރިމިއަރ ލީގުގެ ފުރަތަމަ ބުރުން ދެވަނަ، ކްލަބް އީގަލްސް ކަށަވަރުކޮށްފިއެވެ. އީގަލްސް ދެވަނަ ޔަޤީންކުރީ ފުރަތަމަ ބުރުގެ ފަހު މެޗުގައި މިއަދު ކްލަބް ގްރީން ސްޓްރީޓްސް ބަލިކޮށްގެންނެވެ. އީގަލްސް މެޗު ކާމިޔާބުކުރީ 4-2 ނެވެ.

މިމޮޅާއެކު އީގަލްސް ވަނީ ހަތް މެޗުން 16 ޕޮއިންޓް ހޯދާފައެވެ. ތިންވަނާގައި އޮތް ވެލެންސިޔާ މިރޭ މާޒިޔާ އަތުން މޮޅުވިޔަސް ލިބޭނީ 15 ޕޮއިންޓެވެ. ފަހު މެޗަށްދާއިރު އެއްވަނާގައި މާޒިޔާ އޮތީ 18 ޕޮއިންޓާއެކުއެވެ.

މިއަދު މެޗުގެ ފުރަތަމަ ހާފްގައި އީގަލްސް އިން ދެ ލަނޑުގެ ލީޑެއް ނެގިއެވެ. ފުރަތަމަ ހާފްގައި ދެ ލަނޑު ޖަހައިދިނީ އަހުމަދު ހަސަންއާއި, އަބުދުالله ސަމީހު މޫސާއެވެ. ދެވަނަ ހާފް ފަށައިގެން ފުރަތަމަ ލަނޑު ޖެހީ ގްރީން އިންނެވެ. އެޓީމްގެ ލަނޑު ޖެހީ ހަސަން ނަޒީމްއެވެ. އެކަމަކު ގްރީންއަށް އިތުރު ފުރުޞަތު ނުދީ އީގަލްސްގެ އަހުމަދު ރިޒުވާން އިތުރު ދެ ލަނޑު ޖެހިއެވެ. ގްރީންއިން ދެވަނަ ލަނޑެއް ޖެހީ 77 ވަނަ މިނިޓްގައެވެ. ލަނޑު ކާމިޔާބުކޮށްދިނީ އެންޚެލް މުނޯޒްއެވެ.

ފުރަތަމަ ބުރުގެ ފަހު މެޗުގައި މިރޭ ވާދަކުރާނީ މާޒިޔާއާއި ވެލެންސިޔާއެވެ.