ޔޫކްރެއިން ހިފަން ކުރާ މަސައްކަތް ހުއްޓާލުމަށް ބައިނަލް އަގުވާމީ ކޯޓުން ރަޝިޔާއަށް އަމުރުކޮށްފި

ރަޝިޔާއިން ޔޫކްރެއިން ހިފަން ކުރަމުން އަންނަ ހަނގުރާމަ ހުއްޓާލުމަށް ބައިނަލް އަގުވާމީ ކޯޓުން އެގައުމުގެ މައްޗަށް އަމުރެއް ނެރެފިއެވެ.

ދަ ހޭގްގައި ހުންނަ އިންޓަރނޭޝަނަލް ކޯޓް އޮފް ޖަސްޓިސް (އައިސީޖޭ) އިން ރަޝިޔާގެ މައްޗަށް ވަގުތުން އެ މަސައްކަތް ހުއްޓާލުމަށް އަމުރުކޮށްފައިވަނީ ރަޝިޔާއިން ކުރަމުން އަންނަ ހަނގުރާމައިގައި އެގައުމުން އެކަމަށް ދެއްކޭނެ އެކަށީގެންވާ އުޒުރެއް ނެތްކަމަށް ބުނެއެވެ.

އެ އަމުރުގައި ބުނެފައިވަނީ ރަޝިޔާއިން ލުހާންސްކް އަދި ޑޮނެސްޓްގައި ޔޫކްރެއިން އިން ގަތުލުއާންމު ހިންގަން އުޅޭކަމަށް ބުނެ 24 ފެބްރުއަރީން ފެށިގެން ރަޝިޔާއިން ކުރިއަށް ގެންދާ އަސްކަރީ ހުރިހާ އޮޕަރޭޝަން ވަގުތުން ވަގުތަށް ހުއްޓާލުމަށެވެ. މީގެ އިތުރުން ރަޝިޔާއަށް އެހީތެރިވެދޭ ހުރިހާ ފަރާތްތަކުން ދޫދިނުމަށާއި، އަސްކަރީ އޮޕަރޭޝަންތައް ހުއްޓާލުމަށް ވެސް ވަނީ އަމުރުކޮށްފައެވެ.

ޔޫކްރެއިންގެ ފަރާތުން ރަޝިޔާ އާއި ދެކޮޅަށް މި މައްސަލަ ކޯޓަށް ވެއްދީ ފެބްރުއަރީ 26 ގައެވެ. މި އަޑުއެހުމުގައި އިސް ފަނޑީޔާރެއްގެ ގޮތުގައި އިންނެވީ ޖޯން އީ ޑޮނޮޮގުއެވެ. ޕްރިލިމިނަރީ ނިންމުން ފާސްކުރީ އެއްކޮޅަށް 13 ވޯޓު އަދި ދެކޮޅަށް 2 ވޯޓު ދީގެންނެވެ. ދެކޮލަށް ވޯޓު ދެއްވީ ރަޝިޔާ އަދި ޗައިނާގެ 2 ފަނޑިޔާރުންނެވެ.

މީގެ ކުރިން އައިސީޖޭ ގައި މާޗް މަހުގެ 7 ވަނަ ދުވަހު ބޭއްވި އަޑުއެހުމެއް ވެސް ރަޝިޔާއިން ވަނީ ބޮއިކޮޓްކޮށްފައެވެ.