6-0 ން ކްލަބް ގްރީން ސްޓްރީޓްސް ބަލިކޮށް, މާޒިޔާއިން ދިވެހި ޕްރިމިއަރ ލީގު ތާވަލްގެ އެއްވަނާގައި 6 ޕޮއިންޓްގެ ލީޑެއް ނަގައިފިއެވެ. އާކޯޗާއެކު މާޒިޔާއިން ނަތީޖާތައް ރަނގަޅުކުރަމުން އައިސް, ނަތީޖާގެ ފަރަޤުވެސް އަންނަނީ ބޮޑުކުރަމުންނެވެ.
ކްލަބް ގްރީން ސްޓްރީޓްސް އަތުން މާޒިޔާ ބޮޑު މޮޅެއް ހޯދި މެޗުގައި އެޓީމްގެ ސްޕެއިން މިޑްފީލްޑަރ ޓަނާ ތިން ލަނޑު ޖަހާ ހެޓްރިކެއް ފުރިހަމަކުރިއެވެ. މާޒިޔާއަށް ފުރަތަމަ ލަނޑު ޖަހާ ކުރި ހޯދައިދިނީ ފޯވަޑް ކޯނޭއެވެ. ފުރަތަމަ ހާފްގައި ޓަނާ ދެ ލަނޑު ޖަހާ ތިން ލަނޑުގެ ލީޑެއް ހޯދައިދިނެވެ. ހެޓްރިކް ފުރިހަމަކުރީ ދެވަނަ ހާފްގައެވެ. މާޒިޔާއަށް ދެން ލަނޑު ޖަހައިދިނީ ހަމްޒާ މުޙައްމަދުއާއި ނާއިޒް ހަސަން (ދާދު) އެވެ.
މިމޮޅާއެކު މާޒިޔާ ވަނީ ހަ މެޗުންވެސް މޮޅުވެ 18 ޕޮއިންޓް ހަމަކޮށްފައެވެ. އެންމެ ގާތުން ވާދަކުރަމުން އަންނަ ވެލެންސިޔާ އޮތީ ފަސް މެޗުން 12 ޕޮއިންޓާއެކުއެވެ. ލީގުގައި މިރޭ ވާދަކުރަނީ ދެވަނާގައި އޮތް ވެލެންސިޔާއާއި ތިންވަނާގައި އޮތް އީގަލްސްއެވެ.
