ފެމިލީ ކޯޓުގެ އިސް ޤާޟީކަމަށް ކުރިމަތިލުމުގެ ފުރުސަތު ހުޅުވާލައިފި
އަސާސީ މުސާރަ 31،000 ރުފިޔާ
ފެމިލީ ކޯޓް
ފެމިލީ ކޯޓުގެ އިސް ޤާޟީ ކަމަށް ކުރިމަތިލުމުގެ ފުރުސަތު ހުޅުވާލައިފިއެވެ.
މި މަގާމަކީ ފެމިލީ ކޯޓަށް އައްޔަންކޮށްފައިވާ، އެކޯޓުގައި މަސައްކަތް ކުރަމުންދާ ފަނޑިޔާރުންނަށް ހުޅުވާލެވިފައިވާ ފުރުސަތެކެވެ.
އިސް ޤާޟީގެ މުސާރައާއި އިނާއަތްތަކުގެ ގޮތުގައި މެޑިކަލް އިންޝުއަރެންސާއި ފޯނު އެލަވަންސް ރައްޔިތުން މަޖިލީހުން ކަނޑައަޅާ ގޮތުގެ މަތިން ލިބޭނެއެވެ. އަސާސީ މުސާރަ 31،000.00 ރުފިޔާ ލިބޭއިރު، ލިވިންގ އެލަވަންސް 15،000 ރުފިޔާ ލިބޭނެއެވެ. އަދި ރިސްކް އެލަވަންސްގެ 1375 ރުފިޔާ ލިބޭނެއެވެ.
މި މަގާމަށް ކުރިމަތިލާ ފަރާތަކީ ފެމިލީ ކޯޓުގެ ފަނޑިޔާރުކަމުގެ މަގާމު އަދާކުރަމުން ގެންދާ ފަރާތަކަށްވާން ޖެހެއެވެ. އިސް ޤާޟީކަމަށް އެދި ހުށަހަޅާއިރު، ފެމިލީ ކޯޓުގެ އިސް ޤާޟީ ކަމަށް ޝައުގުވެރިވާނަމަ ސުންގަޑީގެ ކުރިން ސިޓީއަކުން އެކަން ޖުޑީޝަލް ސަރވިސް ކޮމިޝަނަށް ހުށަހަޅަން ޖެހެއެވެ.
އެހެންކަމުން 20 މާރިޗު 2022 ގެ މެންދުރުފަހު 2:00 ގެ ކުރިން ސިޓީއަކުން ޖޭއެސްސީއަށް އީމެއިލް މެދުވެރިކޮށް އެކަން އަންގައިދިނުމަށްވެސް އެދިފައިވެއެވެ.
ފެމިލީ ކޯޓުގެ އިސް ޤާޟީކަމަށް ކުރިމަތިލާ ފަރާތްތައް ނެގުމުގައި އަމަލުކުރާނީ ކޯޓުތަކަށް އިސް ފަނޑިޔާރުން އައްޔަންކުރުމުގައި އަމަލުކުރާނެ ގޮތުގެ ގަވާއިދުގައިވާ ގޮތުގެ މަތިންނެވެ.
