އެއް ފުރާޅެއްގެ ދަށުން ހުރިހާ އެއްޗެއް ލިބޭގޮތަށް އެސްޓީއޯ ޕީޕަލްސް ޗޮއިސް ފިހާރަ ރޯދައަށް ހުޅުވަނީ

ކުރިއަށްއޮތް ރަމަޟާން މަހާ ދިމާކޮށް ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) ޕީޕަލްސް ޗޮއިސް ފިހާރަ ހުޅުވަން ނިންމައިފިއެވެ.

އެތަން ހުޅުވަން ނިންމާފައިވަނީ އެސްޓީއޯ ޓްރޭޑް ސެންޓަރު މިހާރުވެސް ހުރި އިމާރާތުގައެވެ. އެތަނުގެ މަސައްކަތްތައް މިވަގުތުވެސް ދަނީ ކުރިއަށެވެ.

Advertisement

އެސްޓީއޯ ޕީޕަލްސް ޗޮއިސް ހުޅުވުމާ ގުޅޭގޮތުން ރާއްޖެއެމްވީއަށް މައުލޫމާތުދެއްވަމުން އެސްޓީއޯގެ ސޭލްސް އެސޯސިއޭޓް އައިޝަތު ނަޒާހަތު ވިދާޅުވީ މި ފިހާރަ ހުޅުވިގެންދާނީ ވަރަށް ބޮޑެތި ބަދަލުތަކަކާ އެކުގައި ކަމަށެވެ. ނަޒާހަތު ވިދާޅުވީ އެސްޓީއޯ ޕީޕަލްސް ޗޮއިސް ހުޅިވިގެންދިއުމާއެކު މިހާރު ހޯމް އިމްޕްރޫވްމެންޓުގައި ވިއްކާ އިލެކްޓްރޯނިކް ސާމާނާއި ސުޕަރމާޓުން ލިބެން ހުންނަ ތަކެތި އެއް ފުރާޅެއްގެ ދަށުން ލިބެން ހުންނާނެ ކަމަށެވެ. މިކަމުގެ ސަބަބުން ވިޔަފާރި ކުރުމަށް އިތުރަށް ފަސޭހަވެގެންދާނެ ކަމަށް ނަޒާހަތު ވިދާޅުވިއެވެ.

އަދި ރާއްޖޭގެ އެހެން ވިޔަފާރިވެރިންގެ މުދާވެސް އެސްޓީއޯއިން ލިބެން ހުންނާނެ ކަމަށް ނަޒާހަތު ވިދާޅުވިއެވެ.

ނަޒާހަތު އިތުރަށް ވިދާޅުވީ އެސްޓީއޯއިން ކުދި ވިޔަފާރިތައް ކުރިއެރުވުމަށް ފާއިތުވި 3 އަހަރުތެރޭގައި ގިނަ މަސައްކަތްތަކެއް ކޮށްފައިވާކަމަށެވެ. އޭގެތެރެއިން ކާޑު އެޖެންޓުންނާއި، ކޮންސްޓްރަކްޝަން އެޖެންޓުން އަދި ޕީޕަލްސް ޗޮއިސް އެޖެންޓުން ތައާރަފް ކުރެވިގެން ގޮސްފައިވާކަން އޭނާ ވަނީ ފާހަގަކުރައްވާފައެވެ. މިކަންކަމަށްވެސް ވަރަށް ގިނަ ބައެއްގެ ތަރުހީބު ލިބިގެންގޮސްފައިވާކަމަށް ނަޒާހަތު ވިދާޅުވިއެވެ. އަދި އެފަރާތްތަކާ އެކު ވިޔަފާރީގެ މުއާލަމާތްތައް ކުރަމުންދާކަމަށް އޭނާ ވިދާޅުވިއެވެ.

ނަޒާހަތު ވިދާޅުވީ މިއީ އެސްޓީއޯގެ ޕްރޮޑަކްޓުތައް ރާއްޖޭގެ އެކި ކަންކޮޅުތަކަށް ފަސޭހައިން ފޯރުކޮށްދިނުމަށް މަގުފަހިވި ކަމެއް ކަމަށެވެ. މާލޭގައި ބޮޑު ފިހާރައެއް ހުޅުވުނު ކަމުގައިވިޔަސް އަތޮޅުތެރޭގެ ރައްޔިތުންނަށްވެސް ހަމަ އެތަކެތި ފަސޭހަކަމާއެކު ފޯރުކޮށްދެވިގެންދާނެ ކަމަށް ނަޒާހަތު ވިދާޅުވިއެވެ.