އެމެރިކާ އާއި އެގައުމަށް ވާގިވެރިވާ ގައުމުތަކުން ހިންގާ އަސްކަރީ ހަރަކާތްތަކުގެ މައުލޫމާތު ވަގުތުން ވަގުތައް ހޯދަން ސެޓެލައިޓްތަކެއް ލޯންޗުކުރަން ނިންމާފައިވާކަމަށް އުތުރު ކޮރެއާއިން ބުނެފިއެވެ.
އުތުރު ކޮރެއާގެ ލީޑަރު ކިމް ޖޮންގ އުން އާއި ހަވާލާދީ އެގައުމުގެ ސަރުކާރުގެ މީޑިއާއިން ރިޕޯޓުކޮށްފައިވާ ގޮތުން މި ސެޓެލައިޓްތައް ލޯންޗުކުރަން ނިންމާފައިވަނީ އަހަރުތަކަކަށް ބަހާލައިގެންނެވެ.
އެގޮތުން ކުރިއަށް އޮތް ފަސް އަހަރަށް ބަހާލައިގެން މި ސެޓެލައިޓްތައް ލޯންޗުކުރަން ކިމް ނިންމަވާފައި މިވަނީ އުތުރު ކޮރިއާގެ ނެޝަނަލް އެއިރޯސްޕޭސް ޑިވެލޮޕްމެންޓް އެޑްމިނިސްޓްރޭޝަންގެ މަސައްކަތްތައް ބައްލަވާލަން ވަޑައިގަތުމަށްފަހުއެވެ. ކިމް ވަނީ މިދިޔަ އަހަރު އިއުލާނުކުރެވުނު 'ފައިވް އިޔަރ' ޕްލޭނާއި އެއްގޮތަށް ސަން-ސިންކްރޮނަސް ޕޯލަރ އޯރބިޓުގައި މިލިޓަރީ ރިކޮނެސެންސް ސެޓެލައިޓް ބޭނުންކުރަން ވަރަށް އަވަހަށް ފަށާނެ ކަމަށް ވިދާޅުވެފައެވެ.
މިގޮތަށް ރިކޮނެސެންސް ސެޓެލައިޓް ބޭނުންކުރަން ނިންމީ އެމެރިކާ އާއި އެމެރިކާއަށް ވާގިވެރިވާ ގައުމުތަކުން ދެކުނު ކޮރިއާ، ޖަޕާން އަދި ޕެސިފިކް ކަނޑުގައި ހިންގާ އަސްކަރީ ހަރަކާތްތަކުގެ މައުލޫމާތު އުތުރު ކޮރިއާއަށް ވަގުތުން ލިބޭނެ ގޮތް ހެދުމަށްކަމަށް ކިމް ވިދާޅުވިއެވެ. އަދި މިއީ އެގައުމުގެ ގައުމީ ސަލާމަތާއި އިސްތިގުލާލަށްޓަކައި ކުރާކަމެއް ކަމަށް ކިމް ވިދާޅުވިއެވެ.
އުތުރު ކޮރިއާއިން ފެބްރުއަރީ 27 އަދި މާރިޗު ފަސް ވަނަ ދުވަހު މި ރިކޮނެސެންސް ސެޓެލައިޓްތައް ޓެސްޓްކޮށްފައިވާއިރު އެމެރިކާ، ދެކުނު ކޮރިއާ އަދި ޖަޕާނުން ވަނީ މިސެޓެލައިޓްތައް ޓެސްޓްކުރުމަކީ ނިއުކްލިއަރ ހަތިޔާރު ޓެސްޓުކުރުން ފަދަ ކަމެއްކަމަށް ބުނެފައެވެ. މި ސެޓެލައިޓްތަކުންވެސް ބެލިސްޓިކް މިސައިލް ޓެކްނޮލޮޖީ ބޭނުންކުރާ ކަމަށް އެގައުމުތަކުން ބުނެއެވެ.
މިސެޓެލައިޓް ޓެސްޓުތަކާއެކު ބައިނަލްއަގުވާމީ ސަމާލުކަން ހުއްޓިގެން ދިޔައިރު، އެމެރިކާއިން ވަނީ ޔެލޯ ސީގައި އެގައުމުގެ ސަވައިލަންސް އިތުރުކޮށް ބެލެސްޓިކް މިސައިލް ޑިފެންސް ވަރުގަދަކޮށްފައިވާކަމަށް ބުނެފައެވެ.
އުތުރު ކޮރިއާއިން އެގައުމުގެ ދުރުރާސްތާ ބެލެސްޓިކް މިސައިލްތައް އެންމެ ފަހުން ޓެސްޓުކޮށްފައިވަނީ 2017 ވަނަ އަހަރުއެވެ. އެހެންނަމެވެސް އެމެރިކާއެކު ކުރިއަށްދާ މަޝްވަރާތަކުން ނަތީޖާއެއް ނުފެނި ވާހަކަތައް ދިގުލައިގެން ދާތީ އަލުން މިސައިލް ޓެސްޓުކުރަން ފަށާނެކަމުގެ ވާހަކަތައް އުތުރު ކޮރިއާއިން ދަނީ މިހާރު ދައްކަމުންނެވެ.
