ލުތުފަރުގެ މަރު: އަލަށް އައްޔަނުކުރި ދިފާއީ ވަކީލުންނަށް ލިޔެކިޔުންތައް ލިބިފައިނުވާތީ މައްސަލަ އެހެން ދުވަހަކަށް

ށ. ޅައިމަގު "ކުރިމަގު 1'' ބޯޓުން ގެއްލުނު ލުތުފަރު މަރާލި މައްސަލައިގެ ދިފާއީ ވަކީލުންނަށް ލިޔެކިޔުންތައް ލިބިފައިނުވާތީ މައްސަލަ އެހެން ދުވަހަކަށް ތާވަލުކޮށްފިއެވެ.

ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ހުސައިން ފާއިޒު ރަޝާދެވެ.

ލުތުފަރު މަރާލި މައްސަލައިގައި ބުރާސްފަތި ދުވަހު ތާވަލު ކޮށްފައިވަނީ އެނގިހުރެ މީހަކު މެރުމުގެ ކުށުގެ ދައުވާ އުފުލާފައިވާ އަލަމިން އާއި ނޫރުލްއިސްލާމްގެ މައްޗަށެވެ. އެހެންނަމަވެސް އެމީހުންގެ އައު ވަކީލުންނަށް ލިޔެކިޔުންތައް ލިބިފައިނުވާތީ އަޑުއެހުން ވަނީ އެހެން ދުވަހަކަށް ތާވަލުކޮށްފައެވެ. އެގޮތުން ހަފްތާއެއްގެ ފަހުން މި މައްސަލައިގެ އަޑުއެހުމެއް ތާވަލު ކުރުމަށް ވަނީ ނިންމާފައެވެ.

އެ މީހުންގެ މައްޗަށް އިއްވި ދައުވާގައި ބުނެފައިވަނީ، އަލަމިނާއި އިތުރު ދެމީހަކާއެކު 21 އޭޕްރީލް 2019 ވަނަ ދުވަހު 21:30 އެހާކަންހާއިރު، އެމީހުން މަސައްކަތްކުރާ ށ. ޅައިމަގު "ކުރިމަގު 1" ބޯޓުގައި ކައްކާއެއްގެ ގޮތުގައި މަސައްކަތްކުރި ބަންގްލަދޭޝްގެ ރައްޔިތެއްކަމުގައިވާ ލުތުފަރު ރަހްމާނު މަރާލުމަށްފަހު ށ. ޅައިމަގު ބަނދަރާއި ދިމާލު ބޭރުން ގާތްގަނޑަކަށް 200 ވަރަކަށް ފޫޓު ދުރު ހިސާބަށް ލުތުފަރުގެ ހަށިގަނޑު ކަނޑުފައްތާފައިވާކަމަށް އިއުތިރާފްވެފައިވާ ކަމަށެވެ.

ލުތުފަރު މަރާލިކަމަށް އެމީހުން އިއުތިރާފްވެފައިވަނީ، މި މައްސަލާގައި ފުލުހުން ހިންގި ތަހުގީގުގައެވެ.

ލުތުފަރުގެ މަރުގެ މައްސަލައިގެ ތަހުޤީޤްގެ ތަފްސީލްތައް ހާމަކުރުމަށް އިސްކަންދަރުކޮށީގައި 16 މެއި 2016 ވަނަ ދުވަހު ބޭޭއްވި ނޫސްވެރިންގެ ބައްދަލުވުމުގައި ފުލުހުން ބުނެފައިވަނީ، ލުތުފަރު މަރާލައިފައިވަނީ ބޯޓުގައި ހުރި އިތުރު ބިދޭސީއަކާއެކު އެއް ޖިންސުން ގުޅުން ހިންގުމަށް މަސައްކަތް ކުރުމުން ކަމަށް އެމީހުން ތަހުޤީޤުގައި ބުނެފައިވާ ކަމަށެވެ.

އަދި ބޯޓު ތެރޭގައި ޖިިންސީ ގުޅުން ހިންގުމަށް މަސައްކަތް ކުރުމުން ތިން ބިދޭސީއަކު ވެގެން ލުތުފަރުގެ ނޭވާ ހާސްކޮށް މަރާލީކަމުގައި ތަހުޤީޤަށް އެނގިފައިވާ ކަމަށެވެ.

ލުތުފަރަކީ ވެސް ރާއްޖޭގައި ގަވައިދާއި ހިލާފަށް އުޅުނު ބިދޭސީއެކެވެ. އޭނާގެ މަރުގެ މައްސަލައިގައި ހައްޔަރުކޮށްފައި ތިބި ބިދޭސީންނަކީ ވެސް ރާއްޖޭގައި ގަވައިދާ ހިލާފަށް އުޅޭ ބިދޭސީންތަކެއް ކަމަށް ފުލުހުން ބުނެފައިވެއެވެ.