ދަ ގްރާންޑޭ ބަލިކޮށް، އީގަލްސްއަށް ތިންވަނާގައި ލީޑެއް!

ދިވެހި ޕްރިމިއަރ ލީގުގައި ދަ ގްރާންޑޭ ބަލިކޮށް, ކްލަބް އީގަލްސްއިން ތިންވަނާގައި ތިން ޕޮއިންޓްގެ ލީޑެއް ނަގައިފިއެވެ. އީގަލްސްއިން ދަ ގްރާންޑޭގެ މައްޗަށް ކުރި ހޯދީ 4-2ން ނެވެ.

މެޗުގެ ފުރަތަމަ ހާފް 2-2ން އެއްވަރުވި ނަމަވެސް, ދެވަނަ ހާފް ފަށައިގެން މިނިޓެއްވެސް ނުވަނީސް އީގަލްސްއިން މެޗުގެ ލީޑް ހޯދިއެވެ. އެލީޑް ދަމަހައްޓާ ފަރަޤު ބޮޑުކުރީ އިތުރު ވަގުތުގައެވެ. މެޗު އީގަލްސްއިން ކާމިޔާބުކުރީ ދަ ގްރާންޑޭއިން ފުރަތަމަ ދެ ލަނޑު ޖަހާ ކުރިހޯދާފައިވަނިކޮށެވެ. ފުރަތަމަ ދެ ލަނޑު ދަ ގްރާންޑޭއަށް ކާމިޔާބުކޮށްދިނީ ސްރީލަންކާގެ މުޙައްމަދު އާކިބްއާއި, އިސްމާއީލް މަފާޒު އިބްރާހީމްއެވެ. ދަ ގްރާންޑޭއިން ދެ ލަނޑު ޖެހީ ފުރަތަމަ 30 މިނިޓްގެ ތެރޭގައެވެ.

31 ވަނަ މިނިޓްގައި އީގަލްސްގެ ފުރަތަމަ ލަނޑު ޖެހީ އަހުމަދު ހަސަންއެވެ. އެކަމަކު ދެވަނަ ހާފްގައި މުޅިން ހުހަށް ރިޒޭ ތަނަވަސްކޮށްދިން ފުރުޞަތު އަހުމަދު ހަސަންއަށް ބޭނުމެއް ނުކުރެވުނެވެ. ހާފް ނިމުމުގެ ކުރިން އީގަލްސްއަށް ނަތީޖާ ހަމަހަމަކޮށްދިނީ ފުރަތަމަ ހާފްގެ އިތުރު ވަގުތުގައި އަބުދުﷲ ސަމީހު މޫސާއެވެ, ދެވަނަ ހާފް ފަށައިގެން ފުރަތަމަ މިނިޓްގައި އީގަލްސްއަށް ފުރަތަމަ ފަހަރަށް ކުރި ހޯދައިދިނީ ހުމެއިދު ހުސެއިންއެވެ. އަހުމަދު ހަސަންއަށް ހުސްކޮށް ލިބުނު ފުރުޞަތު ބޭނުން ނުކުރެވުނުތާ މިނިޓެއްގެ ތެރޭގައި އޭނާގެ ބަދަލުގައި ކުޅެން ނެރުނީ އަބުދުﷲ ޒިޔާންއެވެ. އިތުރު ވަގުތުގައި އީގަލްސްގެ ހަތަރުވަނަ ގޯލް ޖެހީ ޒިޔާންއެވެ.

އޭގެ ފަހުން ދަ ގްރާންޑޭއިން ފޮނުވާލި ބޯޅައެއް ހުރަސް ދަނޑިއަށް އަމާޒުވިއެވެ, އަދި މެޗު ނިމުމުގެ ކުރިން އީގަލްސްއަށްވެސް އިތުރު ފުރުޞަތެއް ލިބުނެވެ. މިމޮޅާއެކު އީގަލްސް ތިންވަނާގައި އޮތީ 10 ޕޮއިންޓާއެކުއެވެ. ދެވަނާގައިވާ ވެލެންސިޔާއާ ދެމެދު އޮތީ 2 ޕޮއިންޓްގެ ފަރަޤެކެވެ. އަދި ހަތަރުވަނާގައި އޮތް ޔުނައިޓެޑް ވިކްޓްރީގެ މައްޗަށް 3 ޕޮއިންޓްގެ ލީޑެއް ވަނީ ހޯދާފައެވެ. ލީގުގެ ކުޅުން ދެން އޮންނާނީ އަންނަ އާދިއްތަ ދުވަހު ހަވީރެވެ. ވާދަކުރާނީ މާޒިޔާއާއި ގްރީން ސްޓްރީޓްސްއެވެ.