ދެވަނަ ލެގުގައި އިންޓަރމިލާން އަތުން ބަލިވިޔަސް, ޔުއެފާ ޗެމްޕިއަންސްލީގުގެ ކްއާޓަރ ފައިނަލްގެ ޖާގައެއް ލިވަޕޫލަށް ޔަޤީންވެއްޖެއެވެ. ލިވަޕޫލަށް ކްއާޓަރ ފައިނަލް ކަށަވަރުވީ ދެވަނަ ލެގުގައި ރޭ ލިވަޕޫލްގެ ދަނޑުގައި 1-0 ން ބަލިވިޔަސް, ފުރަތަމަ ލެގު އިންޓަރމިލާންގެ ދަނޑުގައި 2-0 ން ކާމިޔާބުކޮށްފައިވާތީއެވެ.

ލިވަޕޫލްގެ ދަނޑުގައި ލަޓާރޯ މާޓީނޭޒް 20 ޔާޑް ދުރުން ފޮނުވާލި ބޯޅަ އެލިސަން ބެކާއަށް ފުރުޞަތެއް ނުދީ ގޯލަށް ފޮނުވާލިޔަސް, ކްއާޓަރ ފައިނަލަށް ދިއުމަށް އެނަތީޖާ ނުފުދުނެވެ. ފުރަތަމަ ލެގުގައި ފިރްމީނިއޯއާއި, ސަލާހު ޖެހި ދެގޯލުން ލިވަޕޫލް ވަނީ ކުރި ހޯދާފައެވެ. މެޗުން ބަލިވިޔަސް ކްއާޓަރ ފައިނަލްގެ ޖާގަ ލިބުމަކީ ކްލޮޕަށް އޮތް ހިތްހަމަޖެހުމެކެވެ. އޭނާ ބުނީ ކްއާޓަރ ފައިނަލް ލިވަޕޫލަށް ހައްޤު ކަމަށެވެ. އެކަމަކު ޔޫރަޕްގައި ބަލިނުވެ ދަމަހައްޓަމުން އައި ސިލްސިލާއަށް ރޭގެ މެޗާއެކު ވަނީ ނިމުން އައިސްފައެވެ. އެއީ ހަތް މެޗުން މޮޅުވުމަށްފަހުއެވެ.

ކްލޮޕް ބުނީ މެޗުން ބިލިވުމަހީ ނުތަނަވަސްކަމެއް ކަމަށާއި, އެކަމަކު މެޗަކުން ބަލިވާނަމަ ބަލިވުން އެންމެ ރަނގަޅު މެޗަކީ މިއީކަމަށެވެ. އެއީ މުބާރާތުގެ މިހިސާބުން އެންމެ ބޮޑު ބޭނުމަކީ އަނެއް ބުރަށް ދިޔުންކަމަށެވެ. ބަލިވިޔަސް ލިވަޕޫލަށް ވަނީ އެކަން ހާޞިލްވެފައެވެ. ކްލޮޕް ބުނީ ދެލެގަށް ބަލާއިރު ކްއާޓަރ ފައިނަލްގެ ޖާގަ ހައްޤީ ލިވަޕޫލަށްކަމަށެވެ.

ރޭގެ މެޗުގައި އިތުރު ލަނޑެއް ޖަހަން އިންޓަރމިލާނަށް ކުރިމަތިވި އެންމެބޮޑު ހުރަހަކީ ފުރަތަމަ ލަނޑު ޖެހިތާ މިނިޓެއް ތެރޭ ސަންޗޭޒްއަށް ދެވަނަ ރީނދޫ ކާޑާއެކު ރަތްކާޑް ދެއްކުމުން ކުޅުންތެރިއަކު މަދުވުމެވެ. އޭގެ ސަބަބުން އިންޓަރ މިލާނަށް އުނދަގޫތަކެއް ކުރިމަތިވި ނަމަވެސް, ނަތީޖާ ހިފެހެއްޓިއެވެ.