23 މިނިޓްގެ ތެރޭގައި ރޮބާޓް ލެވާންޑޯސްކީ ހެދި ހެޓްރިކާއެކު, އެފްސީ ރެޑްބުލް ސަލްޒްބާގް ބަލިކޮށް ޔުއެފާ ޗެމްޕިއަންސްލީގުގެ ކްއާޓަރ ފައިނަލުން ބަޔާން މިއުނިކް ޖާގަ ޔަޤީންކޮށްފިއެވެ. ޗެމްޕިއަންސްލީގުގެ ތާރީޚުގައިވެސް މެޗެއް ފަށައިގެން ހެދި އެންމެ އަވަސް ހެޓްރިކް ލެވާންޑޯސްކީ ހެދީ އޭނާއަށް ކުރި ދެ ފައުލަށް ދިން ދެ ޕެނަލްޓީވެސް ކާމިޔާބުކޮށްގެންނެވެ.

12 ވަނަ މިނިޓާއި 21 ވަނަ މިނިޓްގައި ލެވާންޑޯސްކީ ލަނޑު ޖެހީ ޕެނަލްޓީންނެވެ. ދެވަނަ ޕެނަލްޓީ ދިނީ ވީއޭއާރުން ބެލުމަށްފަހުއެވެ. ހެޓްރިކް ފުރިހަމަކުރީ 23 ވަނަ މިނިޓްގައެވެ. މިއީ މިސީޒަންގެ ހުރިހާ މުބާރާތެއްގައި ލެވާންޑޯސްކީގެ 40 ވަނަ ގޯލެވެ. ތިން ލަނޑު ޖެހުމުގެ އިތުރުން ބަޔާންގެ ފަހު ލަނޑު ޖެހުމަށް ސާނޭއަށް ފުރުޞަތު ތަނަވަސްކޮށްދިނީވެސް ލެވާންޑޯސްކީއެވެ. ރޭގެ މެޗަކީ ލެވާންޑޯސްކީ ޗެމްޕިއަންސްލީގުގައި ކުޅުނު 100 ވަނަ މެޗުވެސްމެއެވެ. މެޗުގައި ދެން ބަޔާންއަށް ގޯލްތައް ޖަހައިދިނީ ސާޖް ގްނަބްރީއާއި ތޯމަސް މުލާއެވެ. ދެވަނަ ހާފްގައި މުލާ ދެގޯލް ޖެހިއެވެ.

ބަޔާން މިއުނިކުން ފުރިހަމަ މޮޅަކާއެކު ކްއާޓަރ ފައިނަލްގެ ޖާގަ ޔަޤީން މިކުރީ އޮސްޓްރީއާގައި ކުޅުނު ފުރަތަމަ ލެގުން 1-1 ން އެއްވަރުވެ މާޔޫސީ ނަތީޖާއަކާއި ކުރިމަތިވެފައިވަނިކޮށެވެ.