ފްލަމެންގޯ ބަލިކޮށް، ބަޔާން ކުއާޓާ ފައިނަލަށް

އެމެރިކާގައި މިހާރު ކުރިއަށްދާ ފީފާ ކުލަބު ވޯލްޑް ކަޕްގެ ގަދަ 16 ވަނަ ބުރުގައި ފްލަމެންގޯއާ ދެކޮޅަށް ކުޅުނު މެޗުން މޮޅުވެ، ޖަރުމަނުގެ ބަޔާން މިއުނިކް އިން މުބާރާތުގެ ކުއާޓާ ފައިނަލް އިން ފުރުސަތު ހޯދައިފި އެވެ.

ހާޑް ރޮކް ސްޓޭޑިއަމްގައި ފްލަމެންގޯއާ ދެކޮޅަށް ކުޅުނު މެޗު ބަޔާން އިން ކާމިޔާބު ކުރީ 4-2 އިންނެވެ. މެޗުގެ ފުރަތަމަ ހާފުގައި ބަޔާން އިން ތިން ލަނޑު ޖެހިއިރު، ފްލަމެންގޯ އިން ވެސް ލަނޑެއް ޖެހި އެވެ. ދެ ވަނަ ހާފުގައި ބަޔާން އިން ހަތަރު ވަނަ ލަނޑު ޖެހިއިރު، މި ހާފުގައި ފްލަމެންގޯ އިން އެ ޓީމުގެ ދެ ވަނަ ލަނޑު ޖެހި އެވެ.

މެޗު ފަށައިގެން ހަ ވަނަ މިނެޓުގައި ބަޔާން އަށް ލީޑު ލިބުނީ ފްލަމެންގޯގެ އެރިކް ޕުލްގާ އަތުން ބައި ކޮޅަށް ވަތް ލަނޑުންނެވެ. އެއީ ބަޔާންގެ ޔޯޝުއާ ކިމިކް ނަގައިދިން ކޯނަރެއްގައި ހުރަސްވި ބޯޅަ ޕުލްގާގެ ބޮލުގައި ޖެހިފައި ގޯލަށް ވަދެގެންނެވެ.

އޭގެ ހަތަރު މިނެޓު ފަހުން ބަޔާން އަށް ކުޅެމުން އަންނަ އިންގްލެންޑުގެ ކެޕްޓަން ހެރީ ކޭން ވަނީ އެ ޓީމުގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. އެ ލަނޑު އޭނާ ޖެހީ ޑަޔަޓް އުޕަމަކާނޯ ތަނަވަސްކޮށްދިން ފުރުސަތެއްގަ އެވެ.

މެޗުގެ ފުރަތަމަ ހާފުގެ 33 ވަނަ މިނެޓުގައި ގާސަން ވަނީ ފްލަމެންގޯގެ ފުރަތަމަ ލަނޑު ޖަހައިފަ އެވެ. އޭގެ ފަހުން މެޗުގެ ފުރަތަމަ ހާފުގެ ފުރިހަމަ ވަގުތު ހަމަވާން ހަތަރު މިނެޓަށް ވެފައި ވަނިކޮށް ބަޔާންގެ ތިން ވަނަ ލަނޑު ޖެހީ ލިއޯ ގޮރެޓްޒްކާ އެވެ.

ދެ ވަނަ ހާފު ފަށައިގެން ކުރީ ކޮޅު ފްލެމެންގޯ އިން އެ ޓީމުގެ ދެ ވަނަ ލަނޑު ޖެހީ ލިބުނު ޕެނަލްޓީ އަކުންނެވެ. އެ ޕެނަލްޓީ ކާމިޔާބުކޮށް އެ ލަނޑު ޖަަހައިދިނީ ޖޯޖީނިއޯ އެވެ. އޭގެ ފަހުން މެޗުގެ 73 ވަނަ މިނެޓުގައި ކޭން ވަނީ ބަޔާންގެ ހަތަރު ވަނަ ލަނޑު ޖަހައިފަ އެވެ. އެއީ ކިމިކް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މުބާރާތުގެ ކުއާޓާ ފައިނަލްގައި ބަޔާން ނިކުންނާނީ، ޔޫރަޕުގެ އެންމެ ފަހުގެ ޗެމްޕިއަން ޕެރިސް ސެއިންޓް ޖާމަން (ޕީއެސްޖީ)އާ ދެކޮޅަށެވެ.