ރަޝިޔާގައި އިނގިރޭސި ޕްރިމިއަރ ލީގުގެ މެޗުތައް ދެއްކުން, ޕްރިމިއަރ ލީގުން މެދު ކަނޑާލައިފިއެވެ.

މިނިންމުން އަންގާރަ ދުވަހުގެރޭ ނިންމާފައިވަނީ ޕްރިމިއަރ ލީގުގައި ވާދަކުރާ 20 ކްލަބްގެ ބައްދަލުވުމަކުންނެވެ. ލަންޑަންގައި ވިހި ކްލަބުން ބޭއްވި ބައްދަލުވުން ހަތަރު ގަޑިއެއްހާއިރަށް ދެމިގެން ދިޔަޔަސް އެނިންމުން ނިންމަން ހޭދަވީ އެންމެ 15 މިނިޓްކަމަށް ބީބީސީ ސްޕޯރޓްސްއިން ވަނީ ރިޕޯރޓްކޮށްފައެވެ.

ޕްރިމިއަރ ލީގުގެ ނިންމުން އައިސްފައި މިވަނީ ރަޝިޔާއިން ޔުކްރެއިންއަށް ދެމުންގެންދާ ހަމަލާތަކުގެ ސަބަބުންނެވެ. ރަޝިޔާ ސިފައިން ޔުކްރެއިންއަށް އަރާ ދެމުންގެންދާ ހަމަލާތަކުގައި މީހުން މަރުވެ, ޒަޚަމްވަމުންދާ މީހުންގެ އަދަދުވެސް ދަނީ އިތުރުވަމުންނެވެ. ރަޝިޔާއަށް ލީގުގެ މެޗުތައް ބްރޯޑްކާސްޓް ކުރުން މެދުކަނޑާލުމުގެ ކުރިންވެސް ރަޝިޔާގެ އަމަލުތައް ކުށްވެރިކޮށް, ޔުކްރެއިންއަށް ތާއީދުކުރުމުގެ ގޮތުން ޕްރިމިއަރ ލީގުން ވަނީ ޚާއްޞަ ކަންތައްތަކެއް ކޮށްފައެވެ.

އޭގެތެރޭގައި ލީގުގެ މެޗުތަކުގައި ވާދަކުރާއިރު ޓީމްތަކުގެ ކެޕްޓަނުން އަޅާ ކެޕްޓަން ބޭންޑުން ޔުކްރެއިންގެ ދިދަ ރަމްޒުކޮށްދިނުން ހިމެނެއެވެ. މީގެއިތުރުން ފުޓްބޯޅަ އާއިލާ އެކުގައި ޔުކްރެއިންއާއެކު ތިބިކަން ދޭހަކޮށްދިނުމަށް ސްކްރީނުން ޚާއްޞަ މެސެޖެއްވެސް އަންނަނީ ދައްކަމުންނެވެ.

ޕްރިމިއަރ ލީގުގެ މިނިންމުމާ ގުޅިގެން އަންނަ ބުރާސްފަތި ދުވަހު ލީގުގައި ކުޅޭ ހަތަރު މެޗުވެސް ރަޝިޔާއަކަށް ނުފެންނާނެއެވެ. ޕްރިމިއަރ ލީގުގެ އިތުރުން އިނގިރޭސި އެފްއޭއިންވެސް މިފިޔަވަޅު އަޅާފައިވާތީ މިމަހު ކުޅޭ އިނގިރޭސި އެފްއޭކަޕްގެ ކްއާޓަރ ފައިނަލް މެޗުތައްވެސް ނުފެންނާނެއެވެ. ރަޝިޔާގައި ލީގުގެ މެޗުތައް ދެއްކުމަށް ބްރޯޑްކާސްޓިންގ ރައިޓްސް ދީފައިވަނީ ރަމްބްލާ ގްރޫޕަށެވެ. ރަޝިޔާއަށް މެޗުތައް ދެއްކުމަށް އެގްރޫޕާއެކު ވެފައިވާ 3 އަހަރުގެ އެއްބަސްވުން މިއަހަރު ނިމޭނެއެވެ.

މެޗުތައް ރަޝިޔާގައި ދެއްކުން މެދުކަނޑާލުމުގެ އިތުރުން ޕްރިމިއަރ ލީގުން ވަނީ ޔުކްރެއިންގައި ހާލުގައި ޖެހިފައިވާ ފަރާތްތަކަށް އެހީވުމަށް 1 މިލިއަން ޕައުންޑް ދިނުމަށްވެސް ނިންމާފައެވެ.