އޭޕްރިލް އެކަކުން ފެށިގެން މެލޭޝިޔާގެ ބޯޑަރު ހުޅުވާލަން ނިންމައިފި

އަންނަ އޭޕްރިލް މަހުގެ ފުރަތަމަ ދުވަހުން ފެށިގެން މެލޭޝިޔާ ބޯޑަރު ހުޅުވާލަން ނިންމާފައިވާކަން އެގައުމުން ހާމަކޮށްފިއެވެ.

އަންގާރަ ދުވަހު ބޭއްވި ނޫސްވެރިންގެ ބައްދަލުވުމެއްގައި މިކަން އިއުލާނުކުރެއްވީ އެގައުމުގެ ބޮޑުވަޒީރު އިސްމާއީލް ސަބްރީއެވެ. އޭނާ ވިދާޅުވީ މި ބަދަލާއެކު އެގައުމަށް އެތެރެވާއިރު ސައްހަ ޓްރެވަލް ޑޮކިއުމެންޓުތައް ބޭނުންވާނެ ކަމަށެވެ. އަދި މެލޭޝިޔާގެ ރައްޔިތުންނަށްވެސް އެއްވެސް ދައްޗަކާ ނުލައި އެހެން ގައުމުތަކަށް ދަތުރުކުރެވޭނެ ކަމަށް ސަބްރީ ވިދާޅުވިއެވެ.

ސަބްރީ ވިދާޅުވީ އެގައުމުން އަދިވެސް އޮމިކްރޯން ވޭރިއަންޓް ކޮންމެވެސް ވަރަކަށް ފެންނަމުންދާތީ، އެހެން ގައުމުތަކުގެ މީހުން އެގައުމަށް އެތެރެވާއިރު އެގައުމުގައި ކޮންޓެކްޓް ޓްރޭސިންއަށް ބޭނުންވާ އެޕްލިކޭޝަން ޑައުންލޯޑްކުރަންޖެހޭނެ ކަމަށެވެ. އަދި ވެކްސިން ފުރިހަމަކޮށްފައިވާ މީހުން ކަރަންޓީން މުއްދަތު ފުރިހަމަކުރަން ނުޖެހޭނެ ކަމަށާއި، އެގައުމަށް އެތެރެވުމުގެ ދެ ދުވަސް ކުރިން ނަގާފައިވާ ޕީސީއާރު ޓެސްޓެއްގެ ނެގެޓިވް ނަތީޖާ ގެންނަންޖެހޭނެ ކަމަށް ސަބްރީ ވިދާޅުވިއެވެ. އަދި އެ ގައުމަށް އެތެރެވުމަށްފަހު 24 ގަޑިއިރުތެރޭގައި ރެޕިޑް އެންޓިޖެން ޓެސްޓު ކިޓެއް ބޭނުންކޮށްގެން ކޮވިޑް ޓެސްޓު ކުރަންޖެހޭނެ ކަމަށް އޭނާ ވިދާޅުވިއެވެ.

ވެކްސިން ފުރިހަމަނުކޮށް ތިބި މީހުންނާއި, އެކި ސަބަބުތަކާހުރެ ވެކްސިން ފުރިހަމަނުކުރެވި ތިބި މީހުން އަމަލުކުރާނެ ގޮތްތައް ބުދަ ދުވަހު އާންމުކުރައްވާނެ ކަމަށް އޭނާ ވިދާޅުވިއެވެ. އަދި ބޯޑަރު ނުހުޅުވާ ގައުމުތަކަށް ދަތުރުކުރުމުގައި އަމަލުކުރާނެ އުސޫލުތައްވެސް އާންމުކުރައްވާނެ ކަމަށް ބޮޑުވަޒީރު ސަބްރީ ވިދާޅުވިއެވެ.