އާ ޓަރމިނަލް އާއި މެދު ޕީޕީއެމް އާއި ޕީއެންސީން ދައްކަމުންދާ ވާހަކަތަކަކީ ސްކޭމް އެއް ކަމަށާއި އެ ފަރާތްތަކުން ދައްކަނީ ބުހުތާން ދޮގު ވާހަކަ ކަމަށް ކުރީގެ ރައީސް އިބްރާހިމް މުހައްމަދު ޞާލިހުގެ ސަރުކާރުގެ ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.

އޭނާ އެފަދައިން ވިދާޅުވީ ބުރާސްފަތި ދުވަހުގެ ރޭ ހަރުގެ ޖަލްސާގައި ވާހަކަދައްކަވަމުންނެވެ.

ވީއައިއޭ ޓަމިނަލް މަސައްކަތަށް ކުރީ ސަރުކާރުން އިތުރުކުރި 300 މިލިއަން ޑޮލަރަކީ ޚިޔާނާތް ކަމަށް ކުރީގެ ރައީސުލްޖުމްހޫރިއްޔާ ޢަބްދުالله ޔާމީން ޢަބްދުލް ޤައްޔޫމް ވަނީ ދާދިފަހުން ވިދާޅުވެފައެވެ. އެ ވާހަކަތަކަށް އަމީރު ވަނީ ރައްދު ދެއްވާފައެވެ.

ވެރިކަން ބަދަލުވުމަށް ފަހު 3 އެމެންޑްމެންޓާއި އެކު އެގްރީމެންޓްތަކެއް ހެދުމަށް ފަހު ކުރިން ހުރި ކޮންޓެއިނަރ ޓަރމިނަލް ބަަދަލުކޮށްފައިވާ ކަމަށް ވެސް އޭނާ ވިދާޅުވިއެވެ. ރާއްޖޭގެ މާހައުލާއި ގުޅޭ ގޮތަށް އެ ޓަރމިނަލް ބަދަލުކުރީ ވެސް ނިމިދިޔަ ސަރުކާރުގައި ކަމަށް އަމީރު ވިދާޅުވިއެވެ. އަމީރު ވިދާޅުވީ އެ މަސައްކަތް އަވަސް ކުރަން ފެށީ ވެސް ނިމިދިޔަ ސަރުކާރުން ކަމަށެވެ. އިތުރަށް ސޮއިކުރި އެގްރީމެންޓްތަކުގައި 183 މިލިއަން ޑޮލަރު އިތުރުވެގެން ދިޔަ އިރު އޭގެ ތެރެއިން ބޮޑު ބަޔަކީ ޕްރޮޖެކްޓް ލަސްވުމުން ކޮންޓްރެކްޓަށް ޕްރޮޖެކްޓް ލަސްވުމުން ދޭން ޖެހުނު ފައިސާ ކަަމަށް އަމިރު ވިދާޅުވިއެވެ.

"300 މިލިއަން ޑޮލަރޭ ކިޔާފަ ކޮން މޮޅު ވާހަކަ އެއް ދައްކާކަށް. ޕީޕީއެމް ވެސް ޕީއެންސީ ވެސް މިއީ ސްކޭމް. ހުސް ދޮގު ވާހަކަ ދައްކަނީ."އަމީރު ވިދާޅުވިއެވެ.

އެމްއޭސީއެލްެގެ މަސައްކަތް ކުރީގެ ރައީސް އަބްދުﷲ ޔާމީންގެ ސަރުކާރުގައި އެކުލަވާލި އިރު އެއީ 357 މިލިއަން ޑޮލަރުގެ ޕްރޮޖެކްޓެއް ކަމަށް އަމީރު ވިދާޅުވިއެވެ. 22 ޖުލައި 2016 ވަނަ އަހަރު އެ ޓަރމިނަލްގެ އެއްބަސްވުމުގައި ސޮއިކުރި ނަމަވެސް 2018އިގައި ވެރިކަން ބަދަލުވި އިރު ވެސް އެތަނުގެ އެއްވެސް ތަނބެއް މައްޗަށް އަރާފައިވާ މަންޒަރު ނުފެންނާނެ ކަމަށް އަމީރު ވިދާޅުވިއެވެ. ދެ އަހަރުން ކުރީގެ ރައީސް އަބްދުﷲ ޔާމީންގެ ސަރުކާރަށް ކުރެވުނީ ކޮން ކަމެއްތޯ އަމީރު ސުވާލު އުފެއްދެވިއެވެ.

" އަޅުގަނޑުމެންނަށް އެނގިފައިވާ ގޮތުގައި އޭރުވެސް ބޭނުންވެފައި އޮތީ ޓެންޑަރ އެހެން ބަޔަކާއި ހަވާލު ކުރަން ބޭނުން ވެފައި އޮތީ ލިބޭ ލާރިކޮޅު މަދުވެގެން. ޗައިނާގެ ކުންފުންޏަކަށް ހަވާލުކުރަން މަސައްކަތް ކުރީ. ކުރީމަ ފަންޑިން އެޖެންސީތަކާއި ސަރުކާރާއި މައްސަލަތަކެއް ހައްލު ނުވެގެން ޕްރޮޖެކްޓް އޮތީ ހުއްޓިފައި." އަމީރު ވިދާޅުވިއެވެ.

ވެލާނާ އިންޓަރނޭޝަނަލް އެއަރޕޯޓް (ވީ.އައި.އޭ) އަކީ މި ސަރުކާރުން ބޮޑު ބައި ނިންމި މަޝްރޫޢު އެއް ކަމަށް ސަރުކާރުން ދަނީ ބުނަމުންނެވެ. އެހެންނަމަވެސް އަމީރު ވިދާޅުވި ގޮތުގައި މިދިޔަ ސަރުކާރު ނިމުނު އިރު ގާތްގަނޑަކަށް 71% މަސައްކަތް ވާނީ ނިމިފައެވެ.

އެ ކަން އެމްއޭސީއެލް އިން ނެރޭ މަންތްލީ ޕްރޮގްރެސް ރިޕޯޓުން ފެންނަން ހުންނާނެ ކަމަށް އަމީރު ވިދާޅުވިއެވެ. އެގޮތުން ޓަރމިނަލްގެ ކޮންކްރީޓުގެ މަސައްކަތުގެ 100% ނިމިފައިވާކަން އެ ރިޕޯޓުން އެނގޭނެ ކަމަށް ވެސް އަމީރު ވިދާޅުވިއެވެ. ހަމައެހެންމެ ބްލޮކް ވޯލްގެ ގާތްގަނޑަކަށް 60% ނިމިފައިވާ ކަމަށް އަމީރު ވިދާޅުވިއެވެ.

މީގެ އިތުރުން މި ސަރުކާރު ވެރިކަމާއި ހަވާލުވި އިރު އެ މަސައްކަތްތައް ބަޔަކާއި ހަވާލު ނުކޮށް ހުރި ކަމަށް ބުނެ ސަރުކާރުން ހަދަމުންދަނީ ދޮގު ކަމަށް އަމީރު ވިދާޅުވިއެވެ. ގިނަ މަސައްކަތްތައް ކޮންޓްރެކްޓް ކުރީ ނިމިދިޔަ ސަރުކާރުން ކަން އޭރު ޝާއިއުކޮށްފައިވާ ރިޕޯޓްތަކުން ފެންނަން ހުރި ކަމެއް ކަމަށް އޭނާ ވިދާޅުވިއެވެ.

" ޓަރމިނަލްގެ މަސައްކަތް އަވަސް ކުރި ނަމަ މިދިޔަ އަހަރު ތެރޭގައި ހުޅުވޭނެތާ. އޭރު ވެސް އެ ބޭފުޅުން ވެރިކަމާއި ހަވާލުވެގެން މިދިޔަ އަހަރު އޮކްޓޯބަރގައި ހުޅުވާނަމޭ ބުނީމަ އަޅުގަނޑުމެން ބުނިން އެކަމެއް އެހެނެއް ނުވާނެއޭ." އަމީރު ވިދާޅުވިއެވެ.

އެ ޓަރމިނަލް ނިމޭނެ ކަމަށް އެ ރިޕޯޓްތަކުގައި ފާހަގަކޮށްފައި ވަނީ 12 އެޕްރިލް 2025 އަށް ކަމަށް އަމީރު ވިދާޅުވިއެވެ. މިހާރު ވެސް މަައްކަތްތައް ނިމުނީ އެ ޓައިމްލައިން އަށް ކަމަށް ވުމުން މި ސަރުކާރުން މަސައްކަތްތައް އަވަސްކުރި ކަމަށް ބުނެވެން ނެތް ކަމަށް އަމީރު ވިދާޅުވިއެވެ. އަމީރު ވިދާޅުވީ މި ވެރިކަމުގައި ޓަރމިނަލްގެ މަސައްކަތް އަވަސްކޮށްފައިވާ ކަމަށް ބުނެ ދައްކަމުން ދަނީ ހަގީގަތާއި ޚިލާފު ވާހަކަތަކެއް ކަމަށެވެ.