މެލޭޝިއާގައި ކިޔަވާ ދަރިވަރުން އަތުން 6% ޓެކްސްއެއް ނެގި ނަމަވެސް ދަރިވަރުންނަށް އެކަން ބުރައަކަށް ނުވާނެ: މިނިސްޓަރު ހައިދަރު
މެލޭޝިއާގައި ކިޔަވާ ދަރިވަރުން އަތުން ހަ ޕަސަންޓުގެ ޓެކްސްއެއް ނެގުމަށް ނިންމި ނަމަވެސް އެކަން ރަސްމީކޮށް އަންގާފައިނުވޭ
ހަޔާ އެޑިއުކޭޝަން މިނިސްޓަރު ޑރ. އަލީ ހައިދަރު
މެލޭޝިއާގައި ކިޔަވާ ދަރިވަރުން އަތުން ހަ ޕަސަންޓުގެ ޓެކްސްއެއް ނެގުމަށް އެ ގައުމުން ނިންމި ނަމަވެސް، ދަރިވަރުންނަށް އެކަން ބުރައަކަށް ނުވާނެ ކަމަށް ހަޔާ އެޑިއުކޭޝަން މިނިސްޓަރު ޑރ. އަލީ ހައިދަރު ވިދާޅުވެއްޖެއެވެ.
މެލޭޝިއާގައި ކިޔަވާ ހުރިހާ ބޭރު ދަރިވަރުން އަތުން ހަ ޕަސަންޓުގެ ޓެކްސްއެއް ޖުލައި މަހުގެ 1 ވަނަ ދުވަހުން ފެށިގެން ނަގަންވަނީ ނިންމާފައެވެ. މެލޭޝިއާގައި އަމަލުކުރާ ސޭލްސް އެންޑް ސާވިސް ޓެކްސް (އެސްއެސްޓީ) ގަވާއިދަށް ބަދަލު ގެނެސް، އެ ޓެކްސް ފައިސާ ދައްކަން ޖެހޭ ގޮތަށް ހަމަޖެއްސީ ބޭރު ދަރިވަރުން އަތުން އަހަރެއްގެ މައްޗަށް 60،000 މެލޭޝިއާ ރިންގިޓު ނަގާ އެޑިއުކޭޝަންގެ ހިދުމަތް ދޭ ތަންތަނަށް ކަމަށް ރިޕޯޓުތައް ބުނެފައިވެއެވެ.
މެލޭޝިއާއަކީ ގިނަ އަދަދެއްގެ ރާއްޖޭގެ ދިވެހި ދަރިވަރުން ވެސް ތައުލީމު ހާސިލް ކުރަމުންދާ ގައުމެއް ކަމަށްވާއިރު، މިކަމުގެ ސަބަބުން ދަރިވަރުންގެ ހަރަދުތައް ވަރަށް ބޮޑަށް އިތުރުވާނެ ކަމަށް ވަނީ ބެލެވިފައެވެ.
އެކަމާ ގުޅޭގޮތުން މިނިސްޓަރު ހައިދަރު ވިދާޅުވީ މެލޭޝިއާގައި ކިޔަވާ ދަރިވަރުން އަތުން ހަ ޕަސަންޓުގެ ޓެކްސްއެއް ނެގުމަށް އެ ގައުމުން ނިންމި ނަމަވެސް، އެކަން ރަސްމީކޮށް އަންގާފައިނުވާ ކަމަށެވެ. އެ ފަދަ ޓެކްސްއެއް ނަގަން ފަށައިފި ނަމަ، އެކަން މާލީ ބުރައަކަށް ނުވާނެ ގޮތަށް ކަންކަން ހަމަޖައްސާނެ ކަމަށް މިނިސްޓަރު ހައިދަރު ވިދާޅުވިއެވެ.
އެގޮތުން ޓެކްސް އެގްޒެމްޝަނެއް ނުވަތަ ރިޑަކްޝަނެއް ނުވަތަ ޓެކްސްއެއް ދައްކަން ޖެހޭ ކަމަށްވާނަމަ ސަރުކާރުން ކިޔަވަން ފޮނުވާފައި ތިބި ދަރިވަރުންގެ ޓެކްސް ސަރުކާރުން ދައްކައިދޭ ގޮތަށް ހަމަޖައްސާނެ ކަމަށް މިނިސްޓަރު ހައިދަރު ވިދާޅުވިއެވެ.
މީގެ އިތުރުން މިނިސްޓަރު ހައިދަރު ވިދާޅުވީ މިހާތަނަށް ކަމާގުޅުންހުރި އެއްވެސް ފަރާތަކާއެކު ރަސްމީކޮށް މަޝްވަރާކޮށްފައިނުވާ ކަމަށެވެ. ނަމަވެސް ކުރިއަށް އޮތްތަނުގައި މަޝްވަރާކޮށް، ހައްލު ހޯދާނެ ކަމަށް މިނިސްޓަރު ހައިދަރު ވިދާޅުވިއެވެ.
ސަރުކާރުގެ ސްކޮލަރޝިޕްގައި ގިނަ އަދަދެއްގެ ދިވެހި ދަރިވަރުން ދަނީ މެލޭޝިއާގައި ތައުލީމް ހާސިލްކުރަމުންނެވެ.
