އިހަވަންދިއްޕޮޅުގެ ބަނދަރުގެ މަސައްކަތް ފެށުމަށް ހުރި ހުރަސްތައް ނައްތާލައި ފިޔަވަހި ތަކަކަށް ބަހާލައިގެން އެ މަސައްކަތް ފެށުމަށް ރައްޔިތުންގެ މަޖިލީހުގެ އިޤްތިސާދީ ކޮމިޓީން ނިންމައިފިއެވެ.

އިހަވަންދިއްޕޮޅު ބަނދަރުގައި އާގު ބޯޓު ފަހަރަށް ޚިދުމަތް ދެވޭނެ މަގު ތަނަވަސްކޮށްދިނުމަށް އެދި ހޯރަފުށީ ދައިރާގެ މެމްބަރު އަހުމަދު ސަލީމް ހުށަހަޅުއްވާފައިވާ ގަރާރު ދިރާސާ ކުރުމަށް ބޭއްވި ކޮމިޓީ ބައްދަލުވުމުގައި ނިންމާފައިވަނީ އިތުރު ދިރާސާއެއް ކުރުމަކާ ނުލައި، ބޭރު ބަޔަކަށް މަސައްކަތް ދިނުމުގެބަދަލުގައި ދިވެހި ކުންފުންޏަކާ ހަވާލުކޮށްގެން ބަނދަރުގެ މަސައްކަތް ކުރިއަށް ގެންދިޔުމަށެވެ.

މި ކޮމެޓީގައި ވާހަކަދައްކަވަމުން މިލަންދޫ ދާއިރާގެ މެމްބަރު އަލީ ރިޒާ ވިދާޅުވީ އިހަވަންދިއްޕޮޅުގެ ބަނދަރު ތަރައްގީ ކުރުމުގެ މަސައްކަތް ފެށުމަށް ލަސްވެފައިވާކަން އެންމެންވެސް ގަބޫލުކުރާ ކަމަށާއި، މި މަސައްކަތް ފެށުމަށްޓަކައި މިހާރު ކަމާގުޅުން ހުރި ހުރިހާ އިދާރާއަކާ މަޝްވަރާ ކުރެވިފައިވާ ކަމަށެވެ. އެގޮތުން ޓްރާންސްޕޯޓް މިނިސްޓްރީއާއެކު ކުރެވުނު މަޝްވަރާތަކުން މި މަސައްކަތް ކުރުމަށް ގަވާއިދަށް ބަދަލުތަކެއް ގެންނަން ޖެހޭކަން ފާހަގަކުރެވިފައިވާ ކަމަށް މެމްބަރު ވިދާޅުވިއެވެ. އަދި ވިދާޅުވީ ގަވާއިދަށް ބަދަލު ނުގެނެސް މަސައްކަތް ކުރިއަށް ގެންދިއުމުގައި ގޮންޖެހުންތަކަކާ މިނިސްޓްރީން ކުރިމަތިލާންޖެހޭ ކަމަށެވެ. އެހެންކަމުން ގަވާއިދަށް ބަދަލު ގެނައުމުގެ މަސައްކަތް ކުރަންޖެހޭކަން މެމްބަރު ފާހަގަކުރެއްވިއެވެ.

އިހަވަންދިއްޕޮޅުގައި ގާއިމްކުރެވޭ ބަނދަރުން އިގްތިސާދަށް ބޮޑު ފައިދާއެއް ކުރާނެކަން ފާހަގަކުރައްވައި މެމްބަރު ރިޒާ ވިދާޅުވީ ކުރިއަށް އޮތް 15 އަހަރުގެ ތެރޭގައި އެންމެ ބޮޑު ފާއިދާއެއްކޮށް، ދައުލަތަށް އެންމެ ގިނަ ފައިސާ ވަންނަ ދެވަނަ އިންޑަސްޓްރީއަށްވާނެ ކަމަށެވެ.

ގަރާރާއި ގުޅޭގޮތުން ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލް ވިދާޅުވީ، މިއީ މުޅި ރާއްޖެއަށް އިގްތިސާދީ ގޮތުން ހެޔޮ ބަދަލެއް ގެންނާނެ ފަދަ މަސައްކަތެއް ކަމަށެވެ. މި މަޝްރޫއުގެ އަމަލީ މަސައްކަތް ފެށުމުގެ މުހިންމުކަމުގެ މައްޗަށް އަލިއަޅުއްވާލައްވައި ވާހަކަދެއްކެވިއެވެ.

މެމްބަރުގެ ރިޒާގެ ވާހަކަތަކަށް އެހެން މެމްބަރުން ވެސް ވަނީ ތާއީދު ކުރައްވައި ވާހަކަދައްކަވާފައެވެ. އެގޮތުން މެމްބަރުން ފާހަގަކުރެއްވި ކަންކަމުގައި މި މަސައްކަތް ކުރުމަށް ދިވެހި ކުންފުންޏަކާ ހަވާލުކުރުމުގެ މުހިންމު ކަމަށް އަލިއަޅުއްވާލެއްވިއެވެ. އަދި ފޭސްތަކަކަށް ބަހާލައިގެން މަސައްކަތް ކުރުމަކީ އެންމެ ރަނގަޅު ގޮތްކަމުގައި ނިންމިއެވެ.

މީގެ އިތުރުން މިބަނދަރު ތަރައްގީ ކުރުމަށްޓަކައި މީގެ ކުރިން ހަދާފައިވާ ދިރާސާތައް ހެދީ ކޮންބައެއްކަން ހާމަކޮށްދިނުމަށް އެދިފަވެއެވެ. އަދި ސަރވޭއަށް ރިޔާއަތްކޮށް އެންމެ ގާބިލް ދިވެހި ކުންފުންޏަކަށް މަސައްކަތް ހަވާލުކޮށްގެން ކުރިއަށްގެންދިއުމުގެ ހުއްދަ ދިނުމަށް ފާސްކޮށްފައިވެއެވެ.

ގަރާރުގައި ބުނެފައިވަނީ، ރާއްޖެއަކީ ހުޅަނގާއި އިރުން މުދާ ހިފައިގެންދާ އާގުބޯޓު ފަހަރު، ދަތުރުކުރާ މަގުގައި އޮތް ގައުމަކަށްވެފައި، ޚާއްސަކޮށް ރާއްޖޭގެ އުތުރުގައި އޮތް 8 ޑިގްރީ ޗެނަލަކީ ކާގޯ ބޯޓުފަހަރު ހުރަސްކުރާ ޗެނަލަކަށްވާތީ، މިކަމުން ހޯދެން އޮތް ނަފާ ހޯދުމަކީ، މި ސަރަހައްދުގެ އެހެން ގައުމުތަކެކޭ އެއްގޮތަށް އަމާޒު ހިފިދާނެ ސިނާއަތެއް ކަމަށެވެ. ބޭރުގެ އާގުބޯޓުފަހަރަށް ޚިދުމަތް ދިނުމުގެ ސިނާއަތެއް މިހިނދުން މިހިނދަށް ގާއިމުކުރުމަކީ، ބޭނުންތެރިކަމެއް ކަމަށް ގަރާރުގައި ފާހަގަކޮށްފައިވެއެވެ.

ރާއްޖެ ހުރަސްކޮށް ގައުމުތަކަށް ގެންދާ މުދަލުގެ އަގު އިތުރުވެފައިވާ ކަމަށާއި، ރާއްޖެ ހުރަސްކޮށްދާ ބޯޓުފަހަރު ކޮންމެ އަހަރަކު ހާހުން އިތުރުވަމުން އަންނައިރު، އެ ބޯޓުފަހަރުން ގެންދާ މުދަލުގެ އަގު ބިލިއަނުން ގުނާލެވެއެވެ. އެހެންކަމުން އެ ސިނާއަތުގެ މަންފާ ހޯދުން މުހިއްމު ކަމަށް ގަރާރުގައި ވެއެވެ. އެ މަންފާ ލިބޭނެ ޓްރާންސްޝިޕްމެންޓް ޕޯޓެއް، މިދިޔަ ދިގު މާޒީގައި ގާއިމުވެފައި ނެތް ކަމަށާއި، ރާއްޖެއަކީ މި ސިނާއަތުން އެންމެ ފައިދާ ވާނެ ގައުމު ކަމުގައި ގަރާރުގައި ވެއެވެ.

މިފަދަ ބަނދަރެއް ގާއިމުކުރުމަކީ ބިލިއަނުން އިންވެސްޓްމަންޓް ބޭނުންވާނެކަމެއް ކަމަށާއި، އެހެންނަމަވެސް އެވަރުގެ ފައިނޭންސާ ނުލާ ވެސް މިހާރުވެސް ކުރެވިދާނެ ކަންކަން އެބަހުރިކަން ފާހަގަކޮށް ގަރާރުގައި ބުނނެފައިވަނީ، ބޯޓުތައް ބަނދަރުކުރެވި، ކޮންޓެއިނަރުތައް ބާލައި، ކަންކަން ނުކުރެވުނަމަވެސް އިހަވަންދިއްޕޮޅަކީ، ފަޅުވެރިންނަށް ޚިދުމަތްތަކެއް ދެވޭނެ ޕޮއިންޓަކަށް ހެދިދާނެ ކަމަށެވެ.

އެހެންކަމުން މިހާރުން މިހާރަށް އުލިގަމުގައި ބޯޓު ފަހަރަށް ކޮންމެވެސް ޚިދުމަތެއް ދެވޭނެ މަގު ފަހިކުރުމާއި، ސެކިއުރިޓީ ފޯރުކޮށްދިނުން މިހާރުވެސް ހަމަޖެހިގެންދާނެ ގޮތެއް ބައްލަވައިދެއްވުމަށް ގަރާރުގައި ވަނީ އެދިފައެވެ.