އިހަވަންދިއްޕޮޅުގައި އާގު ބޯޓު ފަހަރަށް ބޭނުންވާ ބަންކަރިންގެ ހިދުމަތް މި އަހަރުގެ ފަހުކޮޅު ނުވަތަ އަންނަ އަހަރުގެ ކުރީކޮޅު ދޭން ފަށާނެ ކަމަށް އެމްޕީއެލްގެ ޗެއަރމަން ކެޕްޓަން މުހައްމަދު ޝަރީފް ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން ޝަރީފް ވިދާޅުވީ ބަންކަރިންގެ ހިދުމަތް ގާއިމްކޮށް ހިދުމަތް ދޭނީ އެމްޕީއެލްއިން ކަމަށާއި، އެކަން ކުރާނީ އެސްޓީއޯއާއި ގުޅިގެން ކަމަށެވެ. ނަމަވެސް އެމްޕީއެލް އިން މެނޭޖް ކުރިޔަސް މި މަސައްކަތުގައި ވަރަށް ގިނަ ބައެއްގެ ހިއްސާ އޮންނަންޖެހޭ ކަމަށާއި، މުއައްސަސާތަކުގެ އެއްބާރުލުމާ އެއްކޮށް މި މަސައްކަތް ކުރިއަށްދާނެ ކަމަށެވެ.

އޭނާ ވިދާޅުވީ ލަފާ ކުރެވޭ ގޮތުގައި މިއަހަރުގެ ފަހުކޮޅުގައި ނުވަތަ އަންނަ އަހަރުގެ ކުރީކޮޅުގައި ހިދުމަތް ފެށޭތޯ އެމްޕީއެލްއިން މަސައްކަތް ކުރަމުން އަންނަ ކަމަށާއި، މި ކަމަށް ދާނެ ހަރަދުގެ ހިސާބު ހެދިފައިވާ ކަމަށެވެ. އަދި އެކަމަށް ވެސް ތައްޔާރުވަމުން އަންނަ ކަމަށާއި، މިކަމަށް ބޭނުންވާ ފަންޑު އެމްޕީއެލްއިން ހަމަޖައްސާނެ ކަމަށެވެ. މީގެ އިތުރުން މަސައްކަތް ފެށުމުގެ ކުރިން އެ ސަރަހައްދުގެ ސާވޭއެއް ހަދާނެ ކަމަށާއި، އެ ސަރވޭގެ މަސައްކަތް ވެސް އަންނަ މަހުގެ ތެރޭގައި ފަށާނެ ކަމަށް ޝަރީފް ވިދާޅުވިއެވެ.

ބަންކަރިން ދިނުމުގެ ވިސްނުން ގެންގުޅެނީ، ރާއްޖެ އޮންނަ ސަރަހައްދުގެ ގޮތުން، ބޮޑެތި އާގު ބޯޓު ފަހަރަށް މިވަގުތަށް ރާއްޖެއިން އެންމެ ފަސޭހައިން ދެވޭނީ ބަންކަރިންގެ ހިދުމަތް ކަމަށެވެ. ސަބަބަކީ މުދާ އުފުލާ އާގު ބޯޓު ފަހަރަށް ރާއްޖެއިން ބަންކަރިންގެ ހިދުމަތް ދޭނަމަ، އެ އުޅަނދުތަކުގައި އުފުލޭނެ ކާގޯ އިތުރު ކުރެވޭނެ ކަމަށާއި، ބަންކަރިންގެ ހިދުމަތް ރާއްޖެއިން ހޯދާނަމަ ބޯޓު އޮޕަރޭޓް ކުރާ ފަރާތްތަކަށް ފައިދާ ވެސް ލިބޭނެ ކަމަށެވެ.

އިހަވަންދިއްޕޮޅުގައި ޓްރާންސްޝިޕްމަންޓް ބަނދަރެއް ތަރައްގީކުރެވެންދެން އެ ސަރަހައްދުން ދަތުރުކުރާ އާގުބޯޓުފަހަރަށް ދެވިދާނެ ހިދުމަތްތައް ފާހަގަކޮށް، ހއ. ހޯރަފުށި، ތުރާކުނު އަދި އުލިގަމު ކައުންސިލުން ހުށަހަޅާފައިވާ ގަރާރުގައިވާ ކަންކަން ވީ އެންމެ އަވަހަށް އެ ސަރަހައްދުގައި ފެށުމަށްޓަކައި، އިކޮނޮމިކް މިނިސްޓްރީގެ އިސްނެގުމަށް ކަމާ ގުޅޭ އިދާރާތައް ހިމެނޭ ގޮތަށް ވޯކިންގ ގްރޫޕެއް އެކުލަވާލެވި މަސައްކަތް ކުރެވެމުންދާ ކަމަށް އިކޮނޮމިކް މިނިސްޓަރު ފައްޔާޒު އިސްމާއިލް ވަނީ ވިދާޅުވެފައެވެ.

އަދި ވޯރކިންގ ގްރޫޕުން ކުރެވުނު މަޝްވަރާތަކަށްފަހު އިހަވަންދިއްޕޮޅުގައި އެންމެ އަވަހަށް ފެށިދާނެ ހިދުމަތްތަކުގެ ތެރޭގައި ކްރޫ ޗޭންޖްގެ ހިދުމަތާއި، ޝިޕް ސްޓޯރ އަދި ސަޕްލައި ފޯރުކޮށްދިނުމުގެ ހިދުމަތް ފާހަގަކުރެވޭ ކަމަށް މިނިސްޓަރު ވަނީ ވިދާޅުވެފައެވެ. އެހެންކަމުން މި ކަންކަމަށް ބޭނުންވާ އިމާރާތާއި ވަސީލަތްތައް ގާއިމްކޮށް، ވާންޖެހޭ އެހެނިހެން ތައްޔާރީތައް ވުމުގެ މަސައްކަތް މޯލްޑިވްސް ޕޯޓްސް ލިމިޓެޑާއި، މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނާއި ކަމާއި ގުޅޭ އެހެނިހެން އިދާރާތަކާ ގުޅިގެން އިކޮނޮމިކް މިނިސްޓްރީ އިން ކުރަމުންދާ ކަމަށް މިނިސްޓަރު ވަނީ ވިދާޅުވެފައެވެ.

އަދި އެ މިނިސްޓްރީގެ އަމާޒަކީ ލަސްވެގެން 2023 ވަނަ އަހަރުގެ ފުރަތަމަ ކުއާޓަރުގައި އިހަވަންދިއްޕޮޅުގައި މި ހިދުމަތްތައް ތައާރަފަކުރެވިގެން ދިއުންކަމުގައި ވެސް އިކޮނޮމިކް މިނިސްޓަރު ފައްޔާޒު ވިދާޅުވެފައިވެއެވެ.