އިހަވަންދިއްޕޮޅުގައި އާގުބޯޓުފަހަރަށް ޚިދުމަތް ދިނުމުގެ މަސައްކަތް ލަސްނުކޮށް ފެށުމަށް އިޤްތިސާދީ ކޮމިޓީން ނިންމި ނިންމުން ތަޅުމުން ފާސްކޮށްފިއެވެ.

ރިޕޯޓް ފާސްކުރީ 32 މެމްބަރުންގެ ވޯޓުންނެވެ. މިއީ އިހަވަންދިއްޕޮޅު ބަނދަރުގައި އާގު ބޯޓު ފަހަރަށް ޚިދުމަތް ދެވޭނެ މަގު ތަނަވަސްކޮށްދިނުމަށް އެދި ހޯރަފުށީ ދައިރާގެ މެމްބަރު އަހުމަދު ސަލީމް ހުށަހަޅުއްވާފައިވާ ގަރާރެކެވެ. ކޮމިޓީން ނިންމާފައިވަނީ އިތުރު ދިރާސާއެއް ކުރުމަކާއި ނުލައި، ބޭރު ބަޔަކަށް މަސައްކަތް ދިނުމުގެ ބަދަލުގައި ދިވެހި ކުންފުންޏަކާއި ހަވާލުކޮށްގެން ބަނދަރުގެ މަސައްކަތް ކުރިއަށް ގެންދިޔުމަށެވެ.

އިހަވަންދިއްޕޮޅުގައި އާގުބޯޓުފަހަރަށް ޚިދުމަތް ދެވޭނެ މަގު ތަނަވަސް ކުރުމަކީ އެތައް އަހަރެއްގެ އިޤްތިސާދީ ހިފެހެއްޓުމަކުން މިންޖުވާނެ ކަމެއްކަމަށް ރައްޔިތުންގެ މަޖިލީހުގެ އިޤްތިސާދީ ކޮމިޓީގެ މެމްބަރުން ވިދާޅުވެއެވެ.

މެމްބަރުން ވަނީ މިއީ މިހާރުން މިހާރަށްވެސް ފަށައިގެން ކުރިއަށް ގެންދެވިދާނެ އަދި، ދައުލަތަށްވެސް ބޮޑެތި މަންފާތަކެއް ލިބިގެންދާނެ މަސައްކަތެއްކަން ފާހަގަކުރައްވާފައެވެ. އެގޮތުން ޓްރާންސްޝިޕްމަންޓް ބަނދަރެއް ޤާއިމު ކުރެވެންދެންވެސް ފަސޭހައިން ބައެއް ކަންކަން ހަމަޖަައްސައިގެން މިހާރުން މިހާރަށްވެސް މި މަސައްކަތް ފެށިދާނެކަން މެމްބަރުން ފާހަގަކުރެއްވިއެވެ. އެކަމަށްޓަކައި އެ ސަރަޙައްދުން ދަތުރުކުރާ އާގުބޯޓުފަހަރުތަކަށް ޚިދުމަތް ދިނުމަށްޓަކައި ކުރަންޖެހޭ ކަންކަން ކޮމިޓީން ކުރަންޖެހޭކަމަށް މެމްބަރުން ވިދާޅުވިއެވެ.

އެ ސަރަޙައްދު ހުރަސްކޮށް ދުވާލެއްގެ މައްޗައް އެތައް އާގު ބޯޓް ފަހަރު ދަތުރުކުރަމުންދާއިރު، ޓްރާންސްޝިޕްމަންޓް ބަނދަރެއް ޤާއިމު ކުރެވެންދެން އެ ސަރަޙައްދުގައި ފެށިދާނެ ޙަރަކާތްތަކެއް ބަޔާންކުރައްވައި، ހއ.ހޯރަފުއްޓާއި، ތުރާކުނާއި، އުލިގަމުގެ ކައުންސިލު މެމްބަރުން ސޮއިކުރައްވާ ނެރުއްވާފައިވާޤަރާރެއްވަނީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙަށް ހުށަހަޅުއްވާފައެވެ. 

އެ ޤަރާރާއި ގުޅިގެން ކުރަންޖެހޭ މަސައްކަތްތައް ކުރިއަށް ގެންދިޔުމަށް ރައީސްވެސް މިހާރު ވަނީ ކަމާއި ގުޅުންހުރި އިދާރާތަކަށް އަންގަވާފައެވެ.

ރާއްޖެއެމްވީއަށް އެނގިފައިވާ ގޮތުގައި ކައުންސިލުން ފާހަގަކޮށްފައިވާ ޚިދުމަތްތައް ދެމެހެއްޓެނިވި ގޮތެއްގައި ދިނުން މުހިއްމުކަމަށް ފެންނަކަމަށް ރައީސް އޮފީހުން ދެކެއެވެ. ވުމާއެކު، އެކަންކަން ތަންފީޒު ކުރުމަށް ޤަރާރުގައި ހުށައަޅާފައިވާ ކަންކަން ފުރިހަމަ ކުރުމަށް މިނިސްޓްރީ އޮފް އިކޮނޮމިކް ޑިވެލޮޕްމަންޓުން އިސް ނަގައިގެން މަސައްކަތްތައް ކުރިއަށް ގެންދިޔުމަށް ރައީސް ސާލިޙު ވަނީ އިކޮނޮމިކް މިނިސްޓްރީއަށް އަންގަވާފައެވެ.

ރައީސް ސާލިޙު ވަނީ އިކޮނޮމިކް މިނިސްޓްރީން އިސްނަގައިގެން ޑިފެންސް މިނިސްޓްރީއާއި، ޓްރާންސްޕޯޓް މިނިސްޓްރީއާއި، ގުޅުންހުރި އިދާރާތަކާއެކު މަޝްވަރާކޮށް، އެކަންކަން ކުރިއަށް ގެންދިޔުމަށްވެސް އަންގަވާފައެވެ.