އިހަވަންދިއްޕޮޅު ތަރައްގީ ކުރުމަށް އެއްބަސްވުންތަކެއް އެކުލަވާލުމަކީ މިއަދު އިދިކޮޅުން އެކަމާ ފަޚުރުވެރިވާން ޖެހޭ ކަމެއް ކަމަށް އިހަވަންދޫ ދާއިރާގެ މެމްބަރު މުހައްމަދު ޝިފާއު ވިދާޅުވެއްޖެއެވެ.
ޝިފާއު މިހެން ވިދާޅުވީ، އިހަވަންދިއްޕޮޅުގައި އާގު ބޯޓު ފަހަރަށް ޚިދުމަތް ދެވޭނެ މަގު ތަނަވަސް ކޮށްދިނުމަށް އެދި ހުށަހަޅުއްވާފައިވާ ޤަރާރު، އިޤްތިޞާދީ ކޮމިޓީން ދިރާސާކޮށް ނިންމި ގޮތުގެ ރިޕޯޓަށް އަންގާރަ ދުވަހުގެ ޖަލްސާގައި ވާހަކަފުޅުދައްކަވަމުންނެވެ. މިއީ މިއަދު އިހަވަންދިއްޕޮޅުން ފެނިގެން އުޅޭ ފުރުސަތެއް ނޫން ކަމަށް ޝިފާއު ވިދާޅުވިއެވެ.
ރައީސް ޔާމީންގެ ސަރުކާރުން އިހަވަންދިއްޕޮޅު ތަރައްގީ ކުރުމަށް އެއްބަސްވުންތަކެއް އެކުލަވާލުމަކީ މިއަދު އިދިކޮޅުން އެކަމާ ފަޚުރުވެރިވާން ޖެހޭ ކަމެއް ކަމަށް ޝިފާއު ވިދާޅުވިއެވެ. އެހެންނަމަވެސް ސަރުކާރަށް އައި ބަދަލާއެކު، އިދިކޮޅުގެ ގޮތުގައި ކުރީގެ އިކޮނޮމިކް މިނިސްޓަރު ހުންނެވުމުން މިއަދު ގައުމަށް ހެޔޮ ނޭދޭތީ އަދި އެއްވެސް މަގަކުން ގައުމަށް ފައިސާ ވަންނަ ބޭނުން ނުވަނީ ކަމަށް ޝިފާއު ވިދާޅުވިއެވެ. ޝިފާއު ވިދާޅުވީ، ހަގީގަތަކީ ވަތަނީ ވިސްނުމަށްވުރެ ބޮޑަށް ސިޔާސީ ވިސްނުން އިދިކޮޅުން އިސްކުރެއްވުން ކަމަށެވެ.
ރާއްޖެއަށް މިހާރުވެސް މީގެ މަންފާ ލިބުނު ނަމަވެސް މިކަމުގެ މަންފާ މިހާރު ލިބެނީ ހަގީގަތުގައި ލިބެން ޖެހޭ މިންވަރަށްވުރެ ކުޑަކޮށް ކަމަށް ޝިފާއު ވިދާޅުވިއެވެ. ސްރީލަންކާއިން މިކަމުގައި ނަގަމުން އަންނަ މަންފާ ރާއްޖެއަށް އަނބުރާލެވެނެ އެބައޮތް ކަމަށާއި، އެގޮތަކީ އިހަވަންދިއްޕޮޅުގައި މެރިޓައިމް ސެކިއުރިޓީ ދިނުން ކަމުގައި ޝިފާއު ވިދާޅުވިއެވެ. ހަމައެއާއެކު ރާއްޖެއަށް ލިބޭ އާމްދަނީގެ ބޮޑު އިންސައްތައެއް އެކަމުން ލިބޭނެކަން ފާހަގަކުރައްވަމުން ޝިފާއު ވިދާޅުވީ، މިކަމުން އޮތީ މެރިޓައިމް ސެކިއުރިޓީގެ ފުރުސަތު އެކަނި ނޫން ކަމަށެވެ. އެސަރަހައްދުން ދަތުރުކުރާ ބޯޓު ފަހަރުން ކާބޯތަކެތި ލޯޑް ކުރުމާއި، ކްރޫ އެކްސްޗޭންޖް ފަދަ ޚިދުމަތްތައް ބޭނުންވާ ކަމަށެވެ. މިއީ އެ ސަރަހައްދުގެ ފަތުރުވެރިކަމަށްވެސް އެކަމުން ދޮރުތަކެއް ހުޅުވިގެންދާނެ ކަމެއް ކަމަށް ޝިފާއު ވިދާޅުވިއެވެ.
ބޯޓުތަކަށް ޚިދުމަތް ދިނުމަށް އަންނަ މީހުން އެތަނުގައި ތިބުމުން ވިޔަފާރީގެ އިތުރު ފުރުސަތުތައް ހުޅުވިގެންދާނެ ކަމަށާއި، މިހާތަނަށް މިކަން ނުކުރެވިފައި އޮތުމަށްފަހު، މިއަދު ސަރުކާރުން މިކަމަށް ކުޑަ ފުރުސަތެއް ހުޅުވާލި ނަމަވެސް މިއީ، ބޮޑު މުސްތަގްބަލެއް ފެންނަން އޮތް ވިޔަފާރިއެއް ކަމަށް ޝިފާއު ވިދާޅުވިއެވެ.
ވާދަވެރިން މިކަމަށް ހުރަސް އަޅަން މަސައްކަތް ކުރަނީ، ގައުމަށް ހެޔޮ ނޭދޭތީ ކަމަށް ޝިފާއު ވިދާޅުވިއެވެ.
