އިހަވަންދިއްޕޮޅުގައި އާގުބޯޓުފަހަރަށް ޚިދުމަތް ދިނުމުގެ މަސައްކަތް ވީހާވެސް އަވަހަކަށް ފެށުމާއި ގުޅޭ ރިޕޯޓު ކޮމިޓީން ފާސްކޮށްފި
ކޮމިޓީން އިލްތިމާސްކުރާ 3 ކަމަކާއެކު، ރިޕޯޓު އޮތް ގޮތަށް ކޮމިޓީން ފާސްކޮށް ތަޅުމަށް ފޮނުވުމަށް ނިންމި
އިޤްތިޞާދީ ކޮމިޓީއިން، އިހަވަންދިއްޕޮޅުގައި އާގު ބޯޓު ފަހަރަށް ޚިދުމަތް ދެވޭނެ މަގު ތަނަވަސްކޮށް ދިނުމަށް އެދި ހުށަހަޅާފައިވާ ޤަރާރު ދިރާސާކުރުން
އިހަވަންދިއްޕޮޅުގައި އާގުބޯޓުފަހަރަށް ޚިދުމަތް ދިނުމުގެ މަސައްކަތް ވީހާވެސް އަވަހަކަށް ފެށުމަށް ނިންމައި އެކަމާއި ގުޅޭ ރިޕޯޓު ރައްޔިތުންގެ މަޖިލީހުގެ ތަޅުމަށް ފޮނުވުމަށް އިޤްތިސާދީ ކޮމިޓީން ފާސްކޮށްފިއެވެ.
ބުދަ ދުވަހު ބޭއްވި ކޮމިޓީ ބައްދަލުވުމުގައި ދުވާފަރު ދާއިރާގެ މެމްބަރު އިސްމާއިލް އަހުމަދު ވަނީ ކޮމިޓީން އިލްތިމާސްކުރާ 3 ކަމަކާއެކު، ރިޕޯޓު އޮތް ގޮތަށް ކޮމިޓީން ފާސްކޮށް ތަޅުމަށް ފޮނުވުމަށް ހުށައަޅުއްވާފައެވެ. އެއްކަމެއްގެ ގޮތުން ޓްރާންސްޝިޕްމަންޓް ބަނދަރު ތަރައްޤީ ކުރުމުގެ އިތުރުން ބަންކަރިންގ ޚިދުމަތާއި އާގުބޯޓު ފަހަރަށް ޚިދުމަތް ދިނުމަށް ކުރަން ޖެހޭ ކަންކަން ކުރުމަށް ސަރުކާރުގެ އިދަރާތަކުގައި އެދުން ހިމެނެއެވެ.
ދެވަނަ ކަމެއްގެ ގޮތުން އާގުބޯޓުފަހަރަށް ބޭނުންވާ ސަޕްލައި އަދި ސެކިިއުރިޓީ ޚިދުމަތް ފޯރުކޮށްދިނުމާއި ފަޅުވެރިން ބަދަލުކުރުމަށް ކުރަންޖެހޭ މަސައްކަތްތަކުގައި ޤާނޫނާއި ޤަވާއިދުތަކަށް ގެންނަންޖެހޭ ބަދަލުތައް ގެނައުމަށް ކަމާއި ގުޅުންހުރި އިދާރާތަކުގައި އިލްތިމާސް ކުރުން ހިމެނެއެވެ.
ކޮމިޓީގެ ތިންވަނަ އިލްތިމާސްއަކީ އާގުބޯޓުފަހަރުތަކަށް ދެވޭ ޚިދުމަތްތަކަކީ ޤާނޫނާއި ޤަވާއިދާ އެއްގޮތަށް ހަރުދަނާ އުސޫލެއްގެ ތެރެއިން ދެވޭ ޚިދުމަތްތަކެއްކަން ކަށަވަރު ކުރުމަށް މޮނިޓަރިންގ ނިޒާމެއް ޤާއިމު ކުރުމަށް ސަރުކާރުގެ ކަމާބެހޭ އިދާރާތަކަށް އިލްތިމާސް ކުރުމެވެ.
މެމްބަރު އިސްމާއިލް އަހުމަދުގެ މި ހުށައެޅުއްވުމަށް ފުވައްމުލަކު އުތުރު ދާއިރާގެ މެމްބަރު މުޙައްމަދު ރަޝީދު ވަނީ ތާއީދު ކުރައްވާފައެވެ. ވުމާއެކު، މި ރިޕޯޓު އޮތްގޮތަށް ތަޅުމަށް ފޮނުވުމަށް ފާސްކުރީ ކޮމިޓީގައި ބައިވެރިވެވަޑައިގެން މެމްބަރުންގެ އިއްތިފާޤުންނެވެ.
އިހަވަންދިއްޕޮޅު ބަނދަރުގައި އާގު ބޯޓު ފަހަރަށް ޚިދުމަތް ދެވޭނެ މަގު ތަނަވަސްކޮށްދިނުމަށް އެދި ހޯރަފުށީ ދައިރާގެ މެމްބަރު އަހުމަދު ސަލީމް ހުށަހަޅުއްވާފައިވާ ގަރާރު ދިރާސާ ކުރުމަށް ބޭއްވި ކޮމިޓީ ބައްދަލުވުމުގައި ނިންމާފައިވަނީ އިތުރު ދިރާސާއެއް ކުރުމަކާ ނުލައި، ބޭރު ބަޔަކަށް މަސައްކަތް ދިނުމުގެ ބަދަލުގައި ދިވެހި ކުންފުންޏަކާއި ހަވާލުކޮށްގެން ބަނދަރުގެ މަސައްކަތް ކުރިއަށް ގެންދިޔުމަށެވެ.
އިހަވަންދިއްޕޮޅުގައި އާގުބޯޓުފަހަރަށް ޚިދުމަތް ދެވޭނެ މަގު ތަނަވަސް ކުރުމަކީ އެތައް އަހަރެއްގެ އިޤްތިސާދީ ހިފެހެއްޓުމަކުން މިންޖުވާނެ ކަމެއްކަމަށް ރައްޔިތުންގެ މަޖިލީހުގެ އިޤްތިސާދީ ކޮމިޓީގެ މެމްބަރުން ވިދާޅުވެއެވެ.
މެމްބަރުން ވަނީ މިއީ މިހާރުން މިހާރަށްވެސް ފަށައިގެން ކުރިއަށް ގެންދެވިދާނެ އަދި، ދައުލަތަށްވެސް ބޮޑެތި މަންފާތަކެއް ލިބިގެންދާނެ މަސައްކަތެއްކަން ފާހަގަކޮށްފައެވެ. އެގޮތުން ޓްރާންސްޝިޕްމަންޓް ބަނދަރެއް ޤާއިމު ކުރެވެންދެންވެސް ފަސޭހައިން ބައެއް ކަންކަން ހަމަޖަައްސައިގެން މިހާރުން މިހާރަށްވެސް މި މަސައްކަތް ފެށިދާނެކަން މެމްބަރުން ފާހަގަކުރެއްވިއެވެ. އެކަމަށްޓަކައި އެ ސަރަޙައްދުން ދަތުރުކުރާ އާގުބޯޓުފަހަރުތަކަށް ޚިދުމަތް ދިނުމަށްޓަކައި ކުރަންޖެހޭ ކަންކަން ކޮމިޓީން ކުރަންޖެހޭކަމަށް މެމްބަރުން ވިދާޅުވިއެވެ.
ދިވެހިރާއްޖެއިން ޝިޕިންގްގެ ދާއިރާއިން އިތުރު މަންފާ ހޯދައި ދާއިރާ ފުޅާކުރުމަށްޓަކައި އުތުރުގެ އެ ސަރަޙައްދުން ދަތުރުކުރާ ބޯޓުފަހަރަށް ކުރޫއިން ބަދަލުކުރެވޭނެ އިންތިޒާމް ހަމަޖައްސައިދިނުން ވަރަށް މުހިންމުކަމަށް ގިނަ ބަޔަކު ދެކެއެވެ.
އެ ސަރަޙައްދު ހުރަސްކޮށް ދުވާލެއްގެ މައްޗައް އެވްރެޖްކޮށް 45 - 55 އާއި ދެމެދުގެ އަދަދެއްގެ އާގު ބޯޓް ފަހަރު ދަތުރުކުރަމުންދާއިރު، ޓްރާންސްޝިޕްމަންޓް ބަނދަރެއް ޤާއިމު ކުރެވެންދެން އެ ސަރަޙައްދުގައި ފެށިދާނެ ޙަރަކާތްތަކެއް ބަޔާންކުރައްވައި، ހއ.ހޯރަފުއްޓާއި، ތުރާކުނާއި، އުލިގަމުގެ ކައުންސިލު މެމްބަރުން ސޮއި ކުރައްވައި ނެރުއްވާފައިވާޤަރާރެއްވަނީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙަށް ހުށަހަޅުއްވާފައެވެ.
އެ ޤަރާރާއި ގުޅިގެން ކުރަންޖެހޭ މަސައްކަތްތައް ކުރިއަށް ގެންދިއުމަށް ރައީސްވެސް މިހާރު ވަނީ ކަމާ ގުޅުންހުރި އިދާރާތަކަށް އަންގަވާފައެވެ.
