އިހަވަންދިއްޕޮޅުގެ ޕްރޮޖެކްޓް ހުއްޓުވީ އޭރުގެ މިނިސްޓަރު ޔާމީން: ގާސިމް
އެ ޕްރޮޖެކްޓް ހުއްޓުވާނުލެއްވި ނަމަ ލަންކާގެ ޓްރާންސްޝިޕްމެންޓް ބަނދަރަށްވުރެ ކުރިން ރާއްޖެއަށް އެކަން ވާނެ
އިހަވަންދިއްޕޮޅުގެ ޕްރޮޖެކްޓް ހުއްޓުވާލީ ސަރުކާރުގައި އޭރު ތިއްބެވި ބޭފުޅުން
ރައީސް މައުމޫންގެ ވެރިކަމުގައި ފިނޭންސް މިނިސްޓަރު ކަމުގައި ހުންނެވި އިރު، އިހަވަންދިއްޕޮޅުގެ ޕްރޮޖެކްޓް ގެންނެވި ކަމަށާއި، ނަމަވެސް އެކަން ވިޔަނުދީ ހުއްޓުވާލީ އޭރުގެ މިނިސްޓަރު އަބްދުﷲ ޔާމީން ކަމަށް، ޖުމްހޫރީ ޕާޓީގެ ލީޑަރު ގާސިމް އިބްރާހިމް ވިދާޅުވެއްޖެއެވެ.
ރާއްޖެޓީވީގެ "ފަށާއިރު" ޕްރޮގްރާމުގައި ވާހަކަފުޅު ދައްކަވަމުން، އޭރު ފިނޭންސް މިނިސްޓަރުކަން ކުރެއްވި ގާސިމް އިބްރާހިމް ވިދާޅުވީ، އެ ޕްރޮޖެކްޓް ހުއްޓުވާނުލެއްވި ނަމަ ލަންކާގެ ޓްރާންސްޝިޕްމެންޓް ބަނދަރަށްވުރެ ކުރިން ރާއްޖެއަށް އެކަން ވާނެ ކަމަށެވެ. އަދި އެކަން ކުރާނެ މީހުން އެމަނިކުފާނު ހޯއްދެވި ކަމަށެވެ.
ގާސިމް ވިދާޅުވީ، ހޯރަފުއްޓާ ޖެހިގެން އޮތް ރަށް ގުޅުވާލުމަށްފަހު، އިންޓަރނޭޝަނަލް އެއަރޕޯޓެއް ހެދުމާއި، ބަނދަރު ހެދުމާއި، ތެޔޮ ސަޕްލައި ކޮށްދިނުމާއި އެތަނުންދާ ބޯޓު ފަހަރަށް ބަންކަރީ ކޮށްދިނުން ފަދަ ކަންކަން ކުރުމުގެ ފުރުސަތު އެ ޕްރޮޖެކްޓްގެ ތެރެއިން ފަހިވެގެން ދިޔަ ކަމަށެވެ.
ނަމަވެސް ސަރުކާރުގައި އޭރު ތިއްބެވި ބޭފުޅުން އެކަން ހުއްޓުވާލެއްވި ކަމަށް ގާސިމް ތަކުރާރުކޮށް ވިދާޅުވިއެވެ. ގާސިމް ވިދާޅުވީ، ފިނޭންސް މިނިސްޓްރީގައި ހުންނަވައިގެން އެ ޕްރޮޖެކްޓް ހޯއްދެވީ އެމަނިކުފާނު ކަމަށާއި، ނަމަވެސް ސަރުކާރުގެ ކަންތައްތައް ބެހިފައި އޮންނަ ގޮތުން އެކަން ދާންޖެހެނީ އިކޮނޮމިކް މިނިސްޓަރީ އަށް ކަމަށް ބުނެ އެ މިނިސްޓްރީއަށް އެކަން ހަވާލުކުރެއްވީ ކަމަށެވެ.
މީގެއިތުރުން ގާސިމް ވިދާޅުވީ ދެކުނަށް ވެސް އިންވެސްޓްމަންޓް ގެންނެވި ކަމަށެވެ. އެގޮތުން 300 ބިލިއަންގެ އެސެޓް ހުރި ކުންފުނިތަކުން އައި ކަމަށާއި، އުތުރާއި ދެކުނުގެ ތަރައްޤީއަށް ގެނައި ޕްރޮޖެކްޓްތައް އެޖެންޑާ ކުރެވި އޭގެ މަސައްކަތް އިކޮނޮމިކް މިނިސްޓްރީގައި ކުރެވިފައި ހުންނާނެ ކަމަށެވެ.
ގާސިމް ވިދާޅުވީ އެމަނިކުފާނު މިނިސްޓަރު ކަމުގައި ހުންނެވިނަމަ އެކަން އޮންނާނީ ކުރައްވާފައި ކަމަށެވެ. އަދި އޭރު ގެނައި ޕްރޮޖެކްޓާ އެކު ޓްރާންސްޝިޕްމަންޓް ބަނދަރު ހެދުނު ނަމަ ފަތުރުވެރިކަމަށްވުރެ ބޮޑު ނަފާއެއް ނެރެވިދާނެ ކަމަށެވެ.
ރާއްޖޭގެ އެންމެ އުތުރުން އިހަވަންދިއްޕޮޅުގައި ބައިނަލްއަގުވާމީ ޓްރާންސްޝިޕްމަންޓް ބަނދަރެއް ތަރައްޤީކުރުމަށް ސަރުކާރުން މިހާރު ދަނީ މަސައްކަތް ކުރަމުންނެވެ. އެގޮތުން މި މަޝްރޫއުގެ ފުރަތަމަ ފިޔަވަހީގައި 900 މީޓަރުގެ މަގަތު ފާލަމެއް އެޅުމަށް ވަނީ ރާވާފައެވެ. އަދި މުޅި މަޝްރޫޢަށް 4 ބިލިއަން ޑޮލަރު ހޭދަވާނެ ކަމަށް އިކޮނޮމިކް މިނިސްޓްރީން ލަފާ ކުރެއެވެ.
