އިހަވަންދިއްޕޮޅުން ބަންކަރިންނާއި ކްރޫ ޗޭންޖުގެ ހިދުމަތް ދިނުމަށް ގަވާއިދުތައް އިސްލާހު ކުރަނީ
27 މާރިޗު 2023 | ހޯމަ 07:20އެސްޓީއޯއިން ބަންކަަރިންގެ ހިދުމަތްތައް ފެށުމަށްޓަކައި ބައިނަލްއަގުވާމީ ތެޔޮ ކުންފުނިތަކާ ދަނީ މަޝްވަރާ ކުރަމުން
އިހަވަންދިއްޕޮޅު ސަރަޙައްދުން ކޮންމެ ދުވަހަކުވެސް ގިނަ އަދަދެއްގެ އާގު ބޯޓު ފަހަރު ދަތުރު ކުރޭ
އިހަވަންދިއްޕޮޅުގައި ފުރަތަމަ ހިދުމަތް ފަށައިގަންނަން ހުރި މަސައްކަތްތައް ކުރެވޭނެ ގޮތަށް ބައެއް ގަވާއިދުތައް އިސްލާހުކުރައްވަމުން ގެންދަވާ ކަމަށް އިކޮނަމިކް މިނިސްޓަރު ފައްޔާޒް އިސްމާއީލް ވިދާޅުވެއްޖެއެވެ.
އިކޮނަމިކް މިނިސްޓަރު ފައްޔާޒް އިސްމާއީލް މިހެން ވިދާޅުވީ ހޯރަފުށީ ދާއިރާގެ މެންބަރު އަހުމަދު ސަލީމް ލިޔުމުން ޖަވާބު ހޯއްދެވުމަށް ފޮނުއްވި ސުވާލުގެ ޖަވާބުގައެވެ.
މެންބަރު ސަލީމްގެ ސުވާލުގެ ޖަވާބުގައި މިނިސްޓަރު ފައްޔާޒު ވިދާޅުވީ އިހަވަދިއްޕޮޅުގައި ޓްރާންސްޝިޕްމަންޓް ބަނދަރެއް ތަރައްގީކުރެވެންދެން އެ ސަރަހައްދުން ދަތުރުކުރާ އާގުބޯޓު ފަހަރަށް ހިދުމަތް ދިނުމަށްޓަކައި ކުރަންޖެހޭ ކަންކަމާ ގުޅޭގޮތުން މިިނިސްޓްރީން ގިނަ މަސައްކަތްތަކެއްކޮށްފައިވާ ކަމަށެވެ.
އެގޮތުންކަ ކަމާބެހޭ އިދާރާތަކާއެކު މަޝްވަރާތައް ކުރިއަށްގެންގޮސް، މި ސަރަހައްދުގައި އެންމެ ފުރަތަމަ ހިދުމަތްތައް ފަށައިގަންނައިރު ކްރޫ ޗޭންޖު، ޝިޕް ސަޕްލައިޒް އަދި ބަންކަރިންއަށް ފޯކަސް ކުރުމަށް މަޝްވަރާކުރެވި، މި ހިދުމަތްތައް ފަށައިގަތުމަށް މިހާރު އަމަލުކުރަމުންދާ ގަވާއިދުތަކަށް ގެންނަންޖެހޭ ބަދަލުތައް ދިރާސާކުރެވި އެ ގަވާއިދުތައް އިސްލާހު ކުރުމުގެ މަސައްކަތްތަކުގެ ބޮޑުބައެއް ނިމިފައިވާ ކަމަށެވެ.
އަދި އެސްޓީއޯއިން ބަންކަަރިންގެ ހިދުމަތްތައް ފެށުމަށްޓަކައި ބައިނަލްއަގުވާމީ ތެޔޮ ކުންފުނިތަކާ މަޝްވަރާކޮށް، މިކަމަށް ބޭނުންވާ އިންވެސްޓްމަންތްތައް ހޯދުމަށް މަޝްވަރާކުރަމުންދާ ކަމަށް މިނިސްޓަރުގެ ޖަވާބުގައި ވިދާޅުވެފައިވެއެވެ.
މިނިސްޓަރު ވިދާޅުވީ އިހަވަންދިއްޕޮޅުގައި ޕޯޓް ސިޓީގެ މަޝްރޫއެއް ސަރުކާރުން ރާވާފައިވާ ކަމަށެވެ. އަދި ޕޯޓް ސިޓީގެ ކަންކަން އިންތިޒާމުވެ، ތަރުތީބުވެގެން އަންނަ އިރު މި ހިދުމަތްތަކަކީ ޕޯޓް ސިޓީގެ މަޝްރޫއުގެ ތެރެއިން ފޯރުކޮށްދެވޭނެ ހިދުމަތްތައްކަމުގައި ވެގެންދާނެ ކަަމަށެވެ.
އަދި ޕޯޓް ސިޓީގެ މަޝްރޫއުގެ ފުރަތަަމަ ފޭސްއަށް ބޭނުންވާ ބިން އަވަސް މުއްދަތެއްގެ ތެރޭގައި ހިއްކާ، ބިން ހިއްކުމަށްފަހު އެތަނުން އެންމެ އަވަހަށް ފޯރުކޮށްދޭން ފަށާނެ ހިދުމަތްތަކުގެ ތެރޭގައި ކްރޫޒް ޗޭންޖް، ޝިޕް ސަޕްލައި ފަދަ ހިދުމަތްތައް ވެގެންދާނެ ކަމަށެވެ.
މިނިސްޓަރު ވިދާޅުވީ މި މަސައްކަތް މިގޮތަށް ކުރިއަށްގެންދާއިރު، ގަވާއިދުތަކަށް ގެންނަންޖެހޭ އިސްލާހުތައް ގެނައުމާއި، ހިދުމަތްތަކުގެ ޕްރޮސެސް އަވަސް ކުރުމަށް ކުރަންޖެހޭ މަސައްކަތްތައް ކަމާގުޅޭ އިދާރާތަކާއި ގުޅިގެން މިނިސްޓްރީން މިހާރުވެސް ކުރިއަށް ގެންދާ ކަމަށެވެ.
