ރަޝިޔާގެ ބައިނަލްއަގުވާމީ އެއާލައިންގެ ދަތުރުތައް ހުއްޓުމަކަށް، ފަތުރުވެރިކަމަށް ނޭދެވޭ އަސަރުކުރާނެ

ރާއްޖެއަށް އެންމެ ގިނައިން ފަތުރުވެރިން އަންނަ ރަޝިޔާގެ ބައިނަލްއަގުވާމީ އެއާލައިން، އެއިރޯފްލޮޓްގެ ދަތުރުތައް ހުއްޓާލައިފިއެވެ.

ރާއްޖެޓީވީގެ ފަށާއިރު ޕްރޮގްރާމްގައި މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ޓަރމިނަލް އޮޕަރޭޝަންސްގެ ޖެނަރަލް މެނޭޖަރު އިބްރާހިމް ހުސެއިން ވިދާޅުވީ ޔޫކްރެއިނާއި ރަޝިޔާ ދެމެދު ހިނގަމުންދާ ހަނގުރާމަ އާއި ގުޅިގެން އޭވިއޭޝަންގެ ދައިރާގައި ރަޝިޔާއަށް ވަރަށް ގިނަ ދަތިކުރުމުގެ ފިޔަވަޅު އަޅަމުންދާ ކަމަށާއި، އެކަމާއި ގުޅިގެން އަންގާރަ ދުވަހުން ފެށިގެން އެއިރޯފްލޮޓްގެ ދަތުރުތައް މެދުކަނޑާލާފައިވާ ކަމަށެވެ.

ރަޝިޔާއާ ދެކޮޅަށް ބައިނަލްއަގުވާމީ ގޮތުން އަޅަމުންދާ ފިޔަވަޅުތަކުގެ ސަބަބުން ދަތުރުފަތުރުކުރުމާއި ފައިސާގެ މުއާމަލާތްތައް ހިންގުމަށް ވަނީ ދަތިތަކާއި ކުރިމަތިލާން ޖެހިފައެވެ. އަދި ރަޝިޔާގެ ޗެކިންގ ސިސްޓަމްވެސް ވަނީ ފްރީޒްކޮށްފައެވެ.

އިބްރާހިމް ވިދާޅުވީ މިދިޔަ އަހަރު ދުވަހުގެ ތެރޭގައި ރާއްޖެއަށް އެންމެ ގިނައިން ޒިޔާރަތްކޮށްފައިވަނީ ރަޝިޔާގެ ފަތުރުވެރިން ކަމަށެވެ. އެގޮތުން ދުވާލެއްގެ މައްޗަށް ގާތްގަނޑަކަށް ދެފްލައިޓްގައި ޖުމްލަ 800 ރަޝިޔާގެ ފަސިންޖަރުން ރާއްޖެ އަންނަމުން ދިޔަކަމަށް އޭނާ ވިދާޅުވިއެވެ. ނަމަވެސް ދަތުރުކުރުން ހުއްޓާލުމާއެކު މިއަދަދުތައް ދަށްވާނެ ކަމަށާއި، މިއީ ވަރަށް ބޮޑު ކަންބޮޑުވުމެއް ކަމަށް އިބްރާހިމް ވިދާޅުވިއެވެ.

މީގެ އިތުރުން އިބްރާހިމް ވިދާޅުވީ ހޯމަ ދުވަހު 5918 ފަސިންޖަރުން ރާއްޖެއަށް ދަތުރުކޮށްފައިވާ ކަމަށާއި، 7349 ފަސިންޖަރުން ރާއްޖެއިން ފުރާފައިވާ ކަމަށެވެ. މީގެ ތެރޭގައި ގިނައީ ރަޝިޔާގެ ފަތުރުވެރިން ކަމަށް އޭނާ ވިދާޅުވިއެވެ. އިބްރާހިމް ވިދާޅުވީ ހޯމަ ދުވަހު ރަޝިޔާގެ ފަސިންޖަރުން ބަލައި ހުސްކޮށް ދަތުރުކުރި ދެ ފްލައިޓެއް ރާއްޖެއަށް އައިސްފައިވާ ކަމަށާއި، އެ ދެ ފްލައިޓުން ވެސް ގާތްގަނޑަކަށް 400 ފަސިންޖަރުން ފުރާފައިވާ ކަމަށެވެ.

ޖެޓްގެ ދަތުރުތަކަށް އިޝާރަތްކުރައްވައި އިބްރާހިމް ވިދާޅުވީ ރަޝިޔާއިން ގިނަ އަދަދެއްގެ ޖެޓް ރާއްޖެއަށް ދަތުރުކުރާ ކަމަށެވެ. އެގޮތުން ހޯމަ ދުވަހު އެކަނި ވެސް ރަޝިޔާއަށް ތިން ޖެޓް ފުރާފައިވާކަން އިބްރާހިމް ފާހަގަކުރެއްވިއެވެ. އަދި މިހާރު ހިނގަމުންދާ ހަނގުރާމަ އާއި ގުޅިގެން ރަޝިޔާއިން ރާއްޖެއަށް ކުރަމުންދާ ޖެޓުގެ ދަތުރުތައް ވެސް ހުއްޓުމަކަށް އައިސް، އިންކަމް ގެއްލި ބޮޑު ގެއްލުމެއް ލިބޭނެ ކަމަށް އޭނާ ވިދާޅުވިއެވެ.

މީގެ އިތުރުން އިބްރާހިމް ވިދާޅުވީ ޔޫކްރެއިންއަކީ ވެސް ރާއްޖޭގެ ފަތުރުވެރިކަމަށް މުހިންމު މާކެޓެއް ކަމަށެވެ. ނަމަވެސް ހަނގުރާމަ އާއި ގުޅިގެން އެ މާކެޓް ވެސް ގެއްލިފައިވާ ކަމަށާއި، މިކަމުގެ ނޭދެވޭ އަސަރު ފެންނަ ކަމަށެވެ.

ރަޝިޔާ އަކީ މި އަހަރުގެ މިހާތަނަށް އެންމެ ގިނަ ފަތުރުވެރިން ރާއްޖެ އައިސްފައިވާ ގައުމުކަމަށް ތަފާސްހިސާބުތަކުން ދައްކައެވެ. އެގޮތުން މިހާތަނަށް 33،000 އަށް ވުރެ ގިނަ ރަޝިޔާގެ ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ.

އެއިރޯފްލޮޓުން އެވްރެޖްކޮށް ހަފުތާއަކު 14 ފްލައިޓް ބާއްވާއިރު، އެވްރެޖްކޮށް ހަފުތާއަކު 5000 ފަތުރުވެރިން އެފްލައިޓްތަކުން އުފުލައެވެ. އަދި ރަޝިޔާ އިން ރާއްޖެއަށް ޗާރޓާ ފްލައިޓް ބާއްވާ އަޒޫރް އެއަރއިން ހަފްތާއަކު ދެ ފްލައިޓް ބާއްވާއިރު، ގާތްގަނޑަކަށް 500 ފަތުރުވެރިން ރާއްޖެއަށް ޒިޔާރަތް ކުރެއެވެ. މީގެ އިތުރުން ނޯޑްވިންޑް އެއަރލައިންސުން ހަފުތާއަކު އެއް ފްލައިޓް ބާއްވާއިރު، ގާތްގަނޑަކަށް 200 ފަތުރުވެރިން ރާއްޖެއަށް ޒިޔާރަތް ކުރާ ކަމަށް އެމްއޭސީއެލުން މައުލޫމާތުދީފައިވެއެވެ.