2008 ވަނަ އަހަރަށްފަހު އުފުލިފައި ނުވާ މިންވަރަށް ތެލުގެ އަގު އުފުލިއްޖެ

ފާއިތުވި 13 އަހަރުގެ ތެރޭގައިވެސް އުފުލިފައި ނުވާ މިންވަރަށް ތެލުގެ އަގު އުފުލުއްޖިއެވެ.

ރަޝިއާ އާއި ޔޫކްރެއިނާ ދެމެދު ހިނގަމުނދާ ހަނގުރަމައިގެ ސަބަބުން ރަޝިއާ އާއި ދެކޮޅަށް އަޅަމުންދާ ދަތިކުރުމުގެ ފިޔަވަޅުތަކާއެކު ތެލުގެ އަގު މިވަނީ 2008 ވަނަ އަހަރަށްފަހު އުފުލިފައި ނުވާ މިންވަރަކަށް އުފުލިފައެވެ. ތެލުގެ އަގު މިގޮތަށް އެހާ މައްޗަށް އުފުލިފައި މިވަނީ ރަޝިއާ އިން އެކްސްޕޯޓްކުރާ ތެލަށް އެމްބާގޯއެއް އިއުލާނުކުރުމުގެ މަޝްވަރާތައް އެމެރިކާއިން ކުރަން ފަށާފައި ވަނިކޮށެވެ.

އާދިއްތަ ދުވަހު އެމެރިކާގެ ސެކެޓްރީ އޮފް ސްޓޭޓް އެންޓަނީ ބްލިންކެން ވަނީ އެގައުމުން އެހެން ގައުމުތަކާއެކު ރަޝިއާގެ ތެލަށް އެމްބާގޯއެއް އިއުލާނުކުރަން މަޝްވަރާކުރަން ފަށާފައިވާ ކަމަށް ވިދާޅުވެފައެވެ. އެމެރިކާގެ ހައުސް އޮފް ރިޕްރެޒެންޓޭޓިވްގެ ރައީސް ނޭންސީ ޕެލޯސީ ވަނީ އެމެރިކާއަށް ރަޝިއާގެ ތެޔޮ އިމްޕޯޓް މަނާކުރުމަށް ގާނޫނެއް ނެރެން މަޝްވަރާތައް ފަށާފައިވާ ކަމަށްވެސް ވިދާޅުވެފައެވެ.

ރަޝީއާއިން ޔޫކްރެއިނަށް ދެމުންދާ ހަމަލާތަކާއި ގުޅިގެން ތެލުގެ އަގަށް އަންނަމުންދާ ބަދަލާއެކު ހަކަތައިގެ މާކެޓަށް ދަނީ ބޮޑެތި އަސަރުތަކެއް ކުރަމުންނެވެ. ބްރެންޓް ކްރޫޑް ތެލުގެ އަގު ވަނީ 139 ޑޮލަރަށް ފީފާއެއްގެ އަގު އުފުލިގެން ގޮސްފައެވެ. އަދި މި އުފުލުމަށްފަހު މިހާރު ތެޔޮ ފީފާއެއްގެ އަގު ހުރީ 130 ޑޮލަރުގައެވެ. ބްރެންޓް ކްރޫޑް ތެލުގެ އަގު ވަނީ ފާއިތުވި ހަފުތާގެ ތެރޭގައި 20 އިންސައްތަ މައްޗަށް ޖެހިފައެވެ.

ތެލުގެ ސަޕްލަޔަށް ކުރާ އަސަރުތަކާއެކު އޭގެ އަސަރު މިހާރު އާންމު ފަރުދުންނާ ކުންފުނިތަކަށް ވަނީ ކުރަން ފަށާފައެވެ.

އާދިއްތަ ދުވަހު އެމެރިކާގައި ޕެޓްރޯލްގެ އަގު 11 އިންސައްތަ އަނގުބޮޑު ވެފައިވާ ކަމަށް އެގައުމުގެ އޮޓޯމޯބައިލް އެސޯސިއޭޝަނުން ވަނީ ހާމަކޮށްފައެވެ. މިއީ 2008 ވަނަ އަހަރަށް ފަހު އެމެރިކާގައި ޕެޓްރޯލްގެ އަގު މިހާ މައްޗަށް ޖެހިގެންދިޔަ ފުރަތަމަ ފަހަރެވެ.

އިނގިރޭސިވިލާތުގައި ޕެޓްރޯލް ލީޓަރެއްގެ އެވްރެޖް އަގު 1.50 ޔޫރޯއަށް އިތުރުވެފައިވާއިރު، އެގައުމުގައި ގޭހުގެ އަގު އުފުލި އެގައުމުގެ އާންމު ގެތަކުގެ ކަރަންޓް ބިލުތައް މަހަކު 3،000 ޔޫރޯ އާއި ހަމައަށް ބޮޑުވެގެން ދިއުން އެކަށީގެންވާ ކަމަށް މާހިރުން ދަނީ ބުނަމުންނެވެ.

ހޯމަ ދުވަހު އޭޝިޔާގެ ސްޓޮކްމާކެޓްގެ އަގުތަށް ވެސް ވަނީ ވެއްޓެއް ފަށާފައެވެ. ޖަޕާނުގެ ނިއްކެއިގެ ސްޓޮކްގެ އަގު 2.7 އިންސައްތަ ދަށަށް ދޮޔައިރު ހޮންގްކޮންގްގެ ހަންގ ސެންގ ކުންފުނީގެ ސްޓޮކްގެ އަގު ވަނީ ތިން އިންސައްތަ ދަށަށް ގޮސްފައެވެ.

ގައުމުތަކުން ރަޝިއާގެ ތެލަށް އެމްބާގޯ އިއުލާނުކުރުން ވެގެންދާނީ އެގައުމުން ޔޫކްރެއިނަށް ދެމުންދާ ހަމަލާތަކާއި ގުޅިގެން ރަޝިއާ އާއި ދެކޮޅެއް އެޅޭ އެންމެ ބޮޑު އެއް ދަތިކުރުމުގެ ފިޔަވަޅަށެވެ. މީގެ އަސަރު ރަޝިއާގެ އިގުތިސާދުގެ އިތުރުން މުޅި ދުނިޔޭގެ އިގުތިސާދަށް ކުރާނެއެވެ.

ތެޔޮ ބާޒާރުގެ އެނަލިސްޓެއް ކަމަށްވާ ވެންޑާނާ ހެރީ ވަނީ ރަޝިއާގެ ތެލަށް އެމްބާގޯއެއް އިއުލާނުކުރުމުގެ ގާބިލުކަން އެމެރިކާއަށް އޮތް ނަމަވެސް އެގޮތަށް އަމަލު ކުރުމަކީ ޔޫރަޕުގެ ގައުމުތަކަށް ގެއްލުން ބޮޑުވާނެކަމެއް ކަމަށް ވިދާޅުވެފައެވެ. އެގޮތުން ޔޫރަޕް ގައުމުތަކުން ރަޝިއާގެ ތެޔޮ އިމްޕޯޓުކުރުން މަނާކޮށްފި ނަމަ އެކަމުގެ ރައްދެއްގެ ގޮތުން ރަޝިއާއިން ގައުމުތަކަށް ފޯރުކޮށްދެމުން އަންނަ ގޭސް ފޯރުކޮށްދިނުން ހުއްޓާލުމަކީ އެކަށީގެންވާ ކަމެއް ކަމަށް އޭނާ ވިދާޅުވިއެވެ.

ޔޫރަޕުގެ ގައުމުތަކުގައި މިހާރުވެސް ގޭހުގެ އަގު ވަނީ ރިކޯޑު އަދަދުތަކަށް މަތިވެފައެވެ.

ތެޔޮ ބާޒާރުގައި މަޝްހޫރު ކުންފުންޏެއް ކަމަށްވާ ޝެލް އިން ރަޝިއާގެ ކްރޫޑް ތެޔޮ ގަތުން ހުއްޓާލާފައި ނުވާތީ އެކުންފުންޏަށް ޔޫކްރެއިންގެ ފޮރިން މިނިސްޓަރު ވަނީ ފާޑު ވިދާޅުވެފައެވެ. އެގޮތުން އޭނާ ކުރެއްވި ޓްވީޓެއްގައި ރަޝިއާގެ ތެލުގައި ޔޫކްރެއިން ރައްޔިތުންގެ ލޭގެ ރަހަ ނުލާތޯ ވަނީ ސުވާލުކުރައްވާފައެވެ.

އާދިއްތަ ދުވަހު ޝެލް އިން ވަނީ އެކުންފުނިން ރަޝިއާގެ ތެޔޮ ގަނެފައިވާކަން ކަށަވަރުކޮށްދީފައެވެ. އެގޮތުން ހުކުރު ދުވަހު އެކުންފުނިން ރަޝިއާގެ ތެޔޮ ޑިސްކައުންޓް އަގެއްގައި ގަނެފައިވާ ކަމަށް ޝެލް އިން ބުނެއެވެ. އަދި މިއީ ފަސޭހަ ނިންމުމެއް ނޫން ކަމަށާއި މިގޮތަށް އަމަލުކުރީ އިތުރު ގޮތެއް ނެތިގެން ކަމަށް އެކުންފުނިން ވަނީ ބުނެފައެވެ.

ރަޝިއާ ޔޫކްރެއިން ހަނގުރާމަ އާއި ގުޅިގެން ގިނަ ގައުމުތަކާއި ދުނިޔޭގެ ބޮޑެތި ކުންފުނިތަކާއި މާލީ މުއާމަލާތްތައް ހިންގާ މުއްސަސާތަކާއި ބޭންކުތަކުން ދަނީ ރަޝިއާ އާއި ދެކޮޅަށް ފިޔަވަޅުތައް އަޅަމުންނެވެ.