ޝިދާތާގެ ޕާސްޕޯޓް ހިފަހައްޓާފައިވާ މުއްދަތު އަނެއްކާ ވެސް އިތުރުކޮށްފި
ޕާސްޕޯޓް ހިފަހައްޓާފައިވާ މުއްދަތު މިފަހަރު އިތުރުކުރީ ތިން މަސްދުވަހަށް
ޕާސްޕޯޓް ހިފަހައްޓާފައިވާ މުއްދަތު މިފަހަރު އިތުރުކުރީ ތިން މަސްދުވަހަށް
އަދާލަތުޕާޓީގެ ފޮރިން ރިލޭޝަންސް ކޮމިޓީގެ މުގައްރިރު ޝިދާތާ ޝަރީފްގެ ޕާސްޓް އިތުރު ތިން މަސްދުވަހަށް ހިފަހައްޓައިފިއެވެ.
ޝިދާތާގެ ޕާސްޕޯޓް ފުރަތަ ހިފަހައްޓާފައިވަނީ ޖެނުއަރީމަހުއެވެ.
ޝިދާތާ ވިދާޅުވީ ޕާސްޕޯޓް ހިފަހައްޓާފަކަން އެނގެނީ އިމިގްރޭޝަނަށް ވަޑައިގެންނެވުމުން ކަމަށެވެ.
"އަނެއްކާ ސަބަބު އެނގި ކަމެއް ސާފު ވަނީ އެތައް ފަހަރަކު ސިޓީލައިގެން އެތައް ދުވަހަކުން" ފޯނުން މައުލޫމާތުދެއްވަމުން ވިދާޅުވިއެވެ.
ޝިދާތާ ވިދާޅުވީ، ރާއްޖެއިން ބޭރަށްކުރެއްވި ދަތުރުފުޅަކަށް ފަހު އެނބުރި ވަޑައިގަތުމުން އެންމެ ފުރަތަމަ ޕާސްޕޯޓް އަތުލީ އިމިގްރޭޝަން ސިސްޓަމަށް ބޭނުންވާ ކަމެއް ކުރުމަށް ކަމަށް އިމިގްރޭޝަނުން ބުނި ކަމަށެވެ. އަދި އޭގެ ފަހުން، ޕާސްޕޯޓް އަތުލާފައި ވަނީ ކޯޓު އަމުރެއްގެ ދަށުން ކަމަށް އިމިގްރޭޝަނުން ބުނި ކަމަށް ޝިދާތާ ވިދާޅުވެފައި ވެއެވެ.
ޝިދާތާގެ ޕާސްޕޯޓް ހިފަހައްޓާފައިވާ އިރު ޖެންޑާ މިނިސްޓްރީގައި ޝިދާތާ ހުންނެވި ދުވަސްވަރު މަންމައަކު އަނިޔާކޮށްގެން މަރުވި އިބްތިހާލްގެ މައްސަލައާ ގުޅިގެން އޭރު މިނިސްޓްރީގައި އެކަމުގެ ޒިންމާ ނަގަންޖެހޭ ފަރާތްތަކާ ދެކޮޅަށް ދައުވާކުރަން ވަނީ ފޮނުވާފައެވެ.
ޝިދާތާގެ ޕާސްޕޯޓް ހިފެހެއްޓުމާ އެ މައްސަލައާ ގުޅުން ހުރި ކަމަށް ބުނެފައިވާއިރު މިހާތަނަށް އޭނާއާ އެއްވެސް އިދާރާއަކުން އެ މައްސަލައިގައި ސުވާލެއް ވެސް ކޮށްފައި ނުވާ ކަމަށް ޝިދާތާ ވިދާޅުވެއެވެ.
ޕާސްޕޯޓް ހިފަހައްޓާފައިވާއިރު ޝިދާތާ ގެންދަވަނީ އިދިކޮޅު ފަރާތްތަކުން ހިންގާ ހަރަކާތްތަކުގައި ބައިވެރިވެވަޑައިގެން ސަރުކާރަށް ފާޑުވިދާޅުވަމުންނެވެ.
ޝިދާތާގެ ޕާސްޕޯޓް ހިފެހެއްޓުމާ ގުޅިގެން މޯލްޑިވިއަން ޑެމޮކްރެޓިކް ޕާޓީންވަނީ ވަކި ސަބަބެއް ހާމަކުރުމެއް ނެތި ރައީސް އަބްދުﷲ ޔާމިންގެ ސަރުކާރުން ޝިދާތާގެ ޕާސްޕޯޓް ހިފަހައްޓާފައި ވަނީ އިދިކޮޅު ސިޔާސީ ފަރާތްތަކުގެ މައްޗަށް ސަރުކާރުން މައްސަލަތައް އުފައްދައިގެން ޖަލަށްލަމުން ގެންދާ ސިލްސިލާގެ ދަށުން ފްރޭމްކޮށް، ނާއިންސާފު ދައުވާއެއްކޮށް، ޖަލަށްލުމުގެ ބޭނުމުގައި ކަމަށް ދެކޭ ކަމަށް ބުނެ ޖެނުއަރީ މަހުގެ 28 ވަނަ ދުވަހު ބަޔާނެއް ނެރެފައެވެ.
