އިމިގްރޭޝަނުން ޝިދާތާގެ ޕާސްޕޯޓް ހިފަހައްޓައިފި
26 ޖެނުއަރީ 2017 | ބުރާސްފަތި 12:26ޝިދާތާގެ ޕާސްޕޯޓް ހިފެހެއްޓި ސަބަބު ސާފެެއް ނުވޭ
ޝިދާތާ ޝަރީފު
އިދިކޮޅު އިއްތިހާދުގެ ހިޔަނި ކެބިނެޓްގެ ޖެންޑަރ މިނިސްޓަރު ޝިދާތާ ޝަރީދު ޕާސްޕޯޓް ހިފަހައްޓައިފި އެވެ.
މިކަމާ ގުޅޭ ގޮތުން ފުލުހުންގެ މީޑިޔާ އޮފިޝަލް ވިދާޅުވީ، އެއަރޕޯޓްގެ އިމިގްރޭޝަނުން ޝިދާތާގެ ޕާސްޕޯޓް ހިފަހައްޓައި، އޭނާ ފުލުހުންގެ ބެލުމުގެ ދަށަށް ގެންގޮސްސްފައި ވަނީ އިމިގްރޭޝަނުން ފާހަގަކުރި ކަމަކާ ގުޅިގެން ކަމަށެވެ. އެހެން ނަމަވެސް އެކަމުގެ އިތުރު އެއްވެސް ތަފްސީލެއް ފުލުހުން ހާމަކޮށްފައެއް ނުވެ އެވެ.
އިމިގްރޭޝަނުން ޕާސްޕޯޓް ހިފަހައްޓައި، ފުލުހުންގެ އިދާރާގައި ބެހެއްޓުމަށް ފަހު ދޫކޮށްލާފައިވާ ކަމަށް ބުނެ ބުރާސްފަތި ދުވަހުގެ ހެނދުނު 10:30 ހާއިރު ޝިދާތާ ވެސް އެކަން ޓްވިޓާގައި ހާމަކުރައްވާފަ އެވެ.
މިކަމާ ގުޅޭ ގޮތުން ޝިދާތާ ވިދާޅުވީ، އެންމެ ފުރަތަމަ ޕާސްޕޯޓް އަތުލީ ސިސްޓަމަށް ބޭނުންވާ ކަމެއް ކުރުމަށް ކަމަށާއި އަދި ފަހުން އިމިގްރޭޝަނުން ބުނެފައިވަނީ ޕާސްޕޯޓް އަތުލާފައިވަނީ ކޯޓު އަމުރެއްގެ ދަށުން ކަަމަށެވެ. ޝިދާތާ ވިދާޅުވީ ކޯޓު އަމުރު ދެއްކުމަށް އޭނާ އެދުމުން އިމިގްރޭޝަނުން ބުނެފައިވަނީ އެ އަމުރަކީ އެމީހުންގެ ސިސްޓަމަށް އައިސްފައިވާ އަމުރެއް ކަމަށެވެ. އަދި ޕާސްޕޯޓް ހިފެހެއްޓި ކަމަށް އިމިގްރޭޝަނުން ދިން ލިޔުމުގާ ކްރިމިނަލް ކޯޓުން ޕާސްޕޯޓް ހިފެހެއްޓުމަށް އެދިފައިވާކަން އެނގޭ ކަމަށް ޝިދާތާ ވިދާޅުވި އެވެ.
އޭނާ ވިދާޅުވީ، ފުލުހުންގެ ބެލުމުގެ ދަށަށް އޭނާ ގެންދިޔަ ނަމަވެސް އެވަގުތު ފުލުހުންގެ އަމަލުތައް ހުރިގޮތުން ވަނީ ކީއްކަން ފުލުހުންނަށް ވެސް މާބޮޑަށް އެނގޭ ކަމަށް ނުބެލެވޭ ކަމަށެވެ.
ގާތްގަނޑަކަށް ގަޑިއެއްހާއިރު ވަންދެން ޝިދާތާ ފުލުހުންގެ ބެލުމުގެ ދަށުގައި ބަހައްޓާފައި ވެއެވެ. ނަމަވެސް ދޫކޮށްލި އިރު ވެސް ޕާސްޕޯޓް ހިފަހައްޓައި ފުލުހުންގެ ބެލުމުގެ ދަށަށް ގެންދިޔައީ ކީއްވެގެން ކަމެއް ހާމަކޮށްފައެއް ނުވެއެވެ.
ޝިދާތާގެ ޕާސްޕޯޓް ހިފަހައްޓާފައިވާ އިރު ޖެންޑާ މިނިސްޓްރީގައި ޝިދާތާ ހުންނެވި ދުވަސްވަރު މަންމައަކު އަނިޔާކޮށްގެން މަރުވި އިބްތިހާލްގެ މައްސަލައާ ގުޅިގެން އޭރު މިނިސްޓްރީގައި އެކަމުގެ ޒިންމާ ނަގަންޖެހޭ ފަރާތްތަކާ ދެކޮޅަށް ދައުވާކުރަން ވަނީ ފޮނުވާފައެވެ.
