ޔޫކްރެއިންއަށް ހިތްވަރުދޭ ޕްރިމިއަރ ލީގުގެ މެޗުތައް ޗައިނާއިން ބްރޯޑްކާސްޓް ނުކުރުމަށް ނިންމައިފި

އިނގިރޭސި ޕްރިމިއަރ ލީގުގައި ކުޅޭ މެޗުތަކުގެ ތެރެއިން، ޔޫކްރެއިންއަށް ތާއީދުކުރާކަން ދައްކުވައިދޭ މެޗުތައް ބްރޯޑްކާސްޓް ނުކުރުމަށް ޗައިނާއިން ނިންމައިފިއެވެ.

ޕްރިމިއަރ ލީގު ބްރޯޑްކާސްޓް ކުރުމަށް ޗައިނާއިން ރައިޓްސް ލިބިފައިވާ ފަރާތްތަކުން މިގޮތަށް ނިންމާފައިމިވަނީ ރަޝިޔާއިން ޔޫކްރެއިންއަށް ދެމުންދާ ހަމަލާތައް ކުށްވެރިކޮށް، ޔޫކްރެއިންއަށް ތާއީދުކުރާކަން ދެއްކުމަށް ޕްރިމިއަރ ލީގުން ނިންމުމާއި ގުޅިގެންނެވެ.

ޕްރިމިއަރ ލީގުން ވަނީ މިމަހުގެ ފަސްވަނަ ދުވަހުން ހަތްވަނަ ދުވަހަށް ކުޅޭ ލީގު މެޗުތަކުގައި ޔޫކްރެއިންއަށް ތާއީދުކުރާކަން ދައްކައިދިނުމަށް ނިންމާފައެވެ. އެގޮތުން މި މުއްދަތުގައި ކުޅޭ 10 މެޗުގައި 20 ކެޕްޓަނުންވެސް ނޫކުލައާއި ރީންދޫ ކުލައިގެ ކެޕްޓަން ބޭންޑު އެޅުމަށް ޕްރިމިއަރ ލީގުން ވަނީ ނިންމާފައެވެ. އަދި ކޮންމެ މެޗެއްވެސް ފެށުމުގެ ކުރިން ކުޅުންތެރިންނާއި، މެޗް އޮފިޝަލުންނާއި، ކްލަބް ސްޓާފުން ހިމެނޭ ގޮތަށް ހަމަހިމޭން ކަމުގެ ސުކޫތެއް ގެނައުމަށްވެސް ނިންމާފައިވެއެވެ. ހަމައެހެންމެ ޔޫކްރެއިންގެ ދިދައިގެ ކުލަތައް ހިމެނޭ ބެކްޑްރޮޕަކާއެކު 'ފުޓްބޯލް ސްޓޭންޑްސް ޓުގެދަރ' ޖަހާފައިވާ ޕޯސްޓަރެއް ސްޓޭޑިއަމްތަކުގެ ސްކްރީންތަކުން ދެއްކުމަށްވެސް ވަނީ ނިންމާފައެވެ.

ޕްރިމިއަރ ލީގުން ކަނޑައަޅާފައިވާ މި މުއްދަތުގެ ތެރޭގައި ޖުމްލަ 10 މެޗެއް ކުޅުމަށް ވަނީ ތާވަލުކުރެވިފައެވެ. އޭގެ ތެރޭގައި މެންޗެސްޓަރ ޔުނައިޓެޑާއި މެންޗެސްޓަރ ސިޓީ ބައްދަލުކުރާ މެޗު ފަދަ ގިނަ ބަޔަކު ޝައުގުވެރިވާނެ މެޗުތަކެއްވެސް ހިމެނެއެވެ.

ޗައިނާއިން މި މެޗުތައް ބްރޯޑްކާސްޓް ނުކުރުމަށް ނިންމާފައި ވާއިރު ޗައިނާއަކި ރަޝިޔާއާއި ގާތް ގުޅުމެއް އޮންނަ ގައުމެކެވެ.