ރަޝިޔާގެ މީޑިޔާތަކަށް ފޭސްބުކަށް ނުވަދެވޭގޮތް ހަދާފައިވުމުން ރަޝިޔާއިން ފޭސްބުކް ބްލޮކްކޮށްފިއެވެ.
އެކަމާގުޅިގެން ރަޝިޔާގެ ކޮމިޔުނިކޭޝަން ރެގިޔުލޭޓަރުން ބުނީ, 2020 ވަނަ އަހަރުގެ އޮކްޓޯބަރ މަހުން ފެށިގެން މިހާތަނަށް ރަޝިޔާގެ 26 މީޑިޔާއަކަށް ފޭސްބުކުން ތަފާތުކުރުންތައް ގެންގުޅެފައިވާކަމަށެވެ. އޭގެތެރޭގައި ފާއިތުވި ދުވަސްތަކުގައި ރަޝިޔާގެ ސަރުކާރުން ކޮންޓްރޯލްކޮށްގެން ހިންގަމުން އަންނަ އާރްޓީއާއި އާރް.އައި.އޭ ނިއުސް އެޖެންސީއަށް, ފޭސްބުކަށް ނުވަދެވޭގޮތަށް ހެދުންވެސް ހިމެނޭކަމަށް ވަނީ ބުނެފައެވެ.
މިއީ މިހާރު ރަޝިޔާއާ ބޮޑެތި ޓެކް ކުންފުނިތަކާ ދެމެދު ހިނގަމުންދާ އަރައިރުންތަކަށް އިތުރުވި ބޮޑު ބޮޅެކެވެ. މީގެއިތުރުން ރަޝިޔާއިން ވަނީ ޓްވިޓަރަށް ވަނުމުގައިވެސް ފިޔަވަޅުތަކެއް އަޅާފައެވެ. ޓްވިޓަރުން އެކަމާ ގުޅޭގޮތުން އަދި އެއްޗެއް ބުނެފައެއްނުވެއެވެ.
ފޭސްބުކް ހިންގަމުން އަންނަ މެޓާއިން ބުނެފައިވަނީ, ޚިދުމަތް ދިނުމަށް އެކުންފުނިން މަސައްކަތްކުރަމުން އަންނަކަމަށެވެ. މެޓާއިން ބުނެފައިވަނީ ކޮންމެ ދުވަހަކު އެމީހުންގެ އާއިލާއާއި ރަހުމަތްތެރިންނާ ބައްދަލުވެ މައުލޫމާތު ހޯދާ މީޑިޔާއަކުން އެތައް މިލިއަން ރަޝިޔާގެ ރައްޔިތުން ބާކީކޮށްފައިވާކަމަށެވެ.
ހަނގުރާމަ ފެށިތަނާ ރަޝިޔާއިން ވަނީ ފޭސްބުކް ބޭނުންކުރުމުގައި ރަޝިޔާގެ ތެރޭގައި ފިޔަވަޅުތަކެއް އަޅާފައެވެ. ފޭސްބުކް، ޔޫޓިޔުބް، ޓިކްޓޮކުން ވެސް ވަނީ އާރްޓީއާއި ސްޕަޓްނިކް ބްލޮކްކޮށްފައެވެ.
ބޮޑެތި ޓެކް ކުންފުނިތަކަކުން އަންނަނީ ރަޝިޔާގެ ސަރުކާރުން ހިންގަމުން އަންނަ މީޑިޔާތަކުގެ އިޝްތިހާރު ޖެހުމާއި މައުލޫމާތު ފެތުރުން ފަދަ ކަންކަން ނުކުރެވޭ ގޮތް ހަދަމުންނެވެ.
