ރަޝިޔާގެ އަސްކަރިއްޔާއާ ގުޅޭގޮތުން "ފޭކް ނިއުސް" ފަތުރާނަމަ 15 އަހަރުގެ ޖަލު ހުކުމެއް

ރަޝިޔާގެ އަސްކަރިއްޔާއާ ގުޅޭގޮތުން "ފޭކް ނިއުސް" ފަތުރާނަމަ އެފަރާތަކަށް 15 އަހަރުގެ ޖަލު ހުކުމެއް އަންނަ ގޮތަށް ރަޝިޔާގެ ގާނޫނު ހަދާ މަޖިލީހުން ގާނޫނެއް ފާސްކޮށްފިއެވެ.

ރަޝިޔާއިން ޔޫކްރެއިނަށް ދެމުންދާ ހަމަލާތަކާއެކު, މައުލޫމާތު ފޯރުކޮށްދިނުމުގެ ހަނގުރާމައެއްވެސް ވަނީ ފެށިފައެވެ. ރަޝިޔާގެ ޚަބަރުތައް, ވަކިން ޚާއްސަކޮށް ރަޝިޔާގެ އަސްކަރީ އޮޕަރޭޝަންތަކާ ގުޅޭގޮތުން ގެނެސްދޭ ޚަބަރުތައް ހަމައެކަނި ރަޝިޔާގެ ޑިފެންސް މިނިސްޓްރީ މެދުވެރިކޮށް ރިޕޯޓްކުރުމަށް ރަޝިޔާގެ ނިއުސް އެޖެންސީތަކަށް ވަނީ ފުރަތަމަ ދުވަހުން ފެށިގެން އަންގާފައެވެ. މީގެއިތުރުން ހަނގުރާމައާ ގުޅޭގޮތުން ހުޅަނގުގެ ޚަބަރު ފަތުރާ ވަސީލަތްތަކުން ފަތުރަމުންދާ ޚަބަރުތަކާ ގުޅިގެން އެކަމަށް ރަޝިޔާއިން ގެންދިޔައީ ފާއިތުވި ދުވަސްތަކުގައި ފާޑުކިޔުންތައް އަމާޒުކުރަމުންނެވެ.

މީގެއިތުރުން ރަޝިޔާގެ ތެރޭގައި ހަނގުރާމައާ ދެކޮޅަށް އުފުލަމުންދާ އަޑުތައް ކަނޑުވާލުމަށްވެސް ރަޝިޔާގެ ސަރުކާރުން ގެންދަނީ މަސައްކަތްކުރަމުންނެވެ.

ރަޝިޔާ ސަރުކާރުން ބުނަމުންދަނީ, ރަޝިޔާގެ ދުޝްމަނުން ކަމުގައިވާ އެމެރިކާއާއި ހުޅަނގުގެ ގައުމުތަކުން އަންނަނީ ރަޝިޔާ ބަދުނާމުވާގޮތަށް ޚަބަރުތައް ގެނެސްދެމުންކަމަށެވެ.

މިހުރިހާ ކަންތައްތަކަށް ހައްލު ގެނައުމަށްޓަކައި ހުކުރު ދުވަހު, ރަޝިޔާގެ ގާނޫނު ހަދާ މަޖިލިސް ކަމުގައިވާ ޑޫމާއިން ވަނީ ޖިނާއީ އިޖުރާއަތާ ބެހޭ ގާނޫނަށް އިސްލާހު ގެނެސްފައެވެ. އެގޮތުން "ފޭކް ނިއުސް" ގެނެސްދޭނަމަ, ޖޫރިމަނާކުރުމުން ފެށިގެން ޖަލު ހުކުމާ ހަމައަށް ވަނީ ހިމަނާފައެވެ. މީގެއިތުރުން އާންމުތަންތަނުގައި, ރަޝިޔާއާ ދެކޮޅަށް ފިޔަވަޅު އަޅަން ގޮވާނަމަ ޖޫރިމަނާކުރާ ގޮތަށް ގާނޫނަށް ވަނީ އިސްލާހު ގެނެސްފައެވެ.

ގަސްތުގައި "ފޭކް ނިއުސް" ފެތުރުމާއި ދަތިކުރުމުގެ ފިޔަވަޅު އެޅުމަށް ގޮވުމަކީ ބޮޑެތި ކުށްތަކުގެ ތެރޭގައި ވަނީ ހިމަނާފައެވެ. މި ގާނޫނާއެކު ރަޝިޔާގެ ކަމާބެހޭ އިދާރާތަކަށް ބޮޑެތި ބާރުތަކެއް ލިބިގެންދާނެއެވެ.

ޑޫމާގެ ޗެއަރމަން ވިދާޅުވީ, ހޮނިހިރު ދުވަހުން ފެށިގެން މިގާނޫނަށް އަމަލުކުރަން ފަށާނެކަމަށެވެ. ރަޝިޔާގެ އަސްކަރީ ފައުޖުތަކާ ގުޅޭގޮތުން ދޮގު ޚަބަރު ފަތުރައި, އަސްކަރިއްޔާއަށް އިހުތިރާމްކުޑަވާ ގޮތަށް ވާހަކަދައްކައި ބަޔާންތައް ނެރޭނަމަ ބޮޑެތި އަދަބުތައް ލިބޭނެކަމަށް ޑޫމާގެ ޗެއަރމަން ވިދާޅުވިއެވެ.

ރަޝިޔާގެ ރައީސް ވްލަޑްމިއަރ ޕުޓިން ވިދާޅުވަމުން ގެންދަވަނީ ޔޫކްރެއިންގައި ކުރިޔަށްގެންދާ ޚާއްސަ އޮޕަރޭޝަނަކީ ރަޝިޔާގެ ސަލާމަތަށްޓަކައި ކޮންމެހެންވެސް ކުރިޔަށްގެންދަންޖެހޭ އޮޕަރޭޝަނެއް ކަމަށެވެ. ރަޝިޔާގެ އޮފިޝަލުން ޔޫކްރެއިނަށް އަރައިގަތުމުގެ ބަސް ބޭނުންނުކުރައްވައި, ވިދާޅުވަމުން ގެންދަވަނީ ހުޅަނގުގެ މީޑިޔާތަކުން ޔޫކްރެއިންގައި ދިރިއުޅޭ ރަޝިޔާ ބަހުން ވާހަކަދައްކާ މީހުންނާ ދެކޮޅަށް ޔޫކްރެއިން ސަރުކާރުން ހިންގަމުންދާ އިންސާނިއްޔަތާއި ޚިލާފު ކަންކަން ރިޕޯޓްކުރުމުގައި ފެއިލްވެފައިވާކަމަށެވެ.

ޑޫމާއިން މިފަދަ ގާނޫނެއް ފާސްކޮށްފައިވާއިރު, މިހާރުވެސް ރަޝިޔާގެ ކޮމިޔުނިކޭޝަން ވޮޗްޑޯގުން ވަނީ އިނގިރޭސިވިލާތުގެ ބީބީސީގެ ވެބްސައިޓަށް, ރަޝިޔާގެ ތެރޭގައި ނުވަދެވޭގޮތް ހަދާފައެވެ.