ޔޫކްރެއިން އަށް ރަޝިޔާ އިން ދެމުންދާ ހަމަލާތައް ހުއްޓާލާ ޔޫކްރެއިން އަށް އަރާތިބި ރަޝިޔާގެ އަސްކަރީ ފައުޖުތައް އެގައުމުން ފޭބުމަށް އދ ގެ އާންމު މަޖިލީހުން ފާސްކުރި ގަރާރާ އެއްކޮޅަށް ރާއްޖެއިން ވޯޓުދީފިއެވެ.

193 ގައުމުގެ ތެރެއިން މި ގަރާރު ފާސްކުރުމަށް ވޯޓު ދީފައިވަނީ 141 ގައުމަކުންނެވެ. ޗައިނާ އާއި އިންޑިޔާ ހިމެނޭ ގޮތުން 35 ގައުމަކުން ވަކި ކޮޅަކަށް ވޯޓު ދީފައެއްނުވެއެވެ. ރާއްޖެ ހިމެނޭ ދެކުނު އޭޝިޔާ ސަރަހައްދުން ސްރީލަންކާ، ޕާކިސްތާން އަދި ބަންގްލަދޭޝްވެސް ވަކި ކޮޅަކަށް ވޯޓު ދީފައެއްނުވެއެވެ. ގަރާރާ އެއްކޮޅަށް މިސަރަހައްދުން ދެން ވޯޓުދީފައިވަނީ އަފްޣާނިސްތާން، ނޭޕާލް އަދި ބޫޓާން އެވެ.

ވަކިކޮޅަކަށް ވޯޓުނުދޭ ގައުމުތަކުގެ ތެރޭގައި އިރާން، އިރާގު އަދި ދެކުނު އެފްރިކާ ހިމެނެއެވެ. ގަރާރާ ދެކޮޅަށް ވޯޓުދީފައިވަނީ 5 ގައުމަކުންނެވެ. އެއީ ރަޝިޔާ، ސީރިޔާ، ބެލަރޫސް، އުތުރު ކޮރެއާ އަދި އެރިޓްރިއާ އެވެ.

އާންމު މަޖިލީހުން ފާސްކުރި ގަރާރަށް ރަޝިޔާއިން އަމަލުކުރާކަށް މަޖުބޫރެއް ނުވާނެއެވެ. ނަމަވެސް މިގަރާރުގެ ސަބަބުން ރަޝިޔާއަށް ފިއްތުންތައް އިތުރުވާނެއެވެ.

1982 ވަނަ އަހަރުގެ ފަހުން އދ.ގެ ސެކިއުރިޓީ ކައުންސިލުން އދ.ގެ އާންމު މަޖިލީހުގެ ކުއްލި ޚާއްސަ ބައްދަލުވުމެއް ބާއްވާފައިވަނީ ޔޫކްރެއިން އަށް ރަޝިޔާއިން ހަމަލާދޭން ފެށުމާއެކުއެވެ. ހޯމަ ދުވަހާއި އަންގާރަ ދުވަހުވެސް ޚާއްސަ ބައްދަލުވުން ކުރިޔަށް ގެންގޮސްފައިވާއިރު ބައްދަލުވުމުގައި ވާހަކަދައްކަވަމުން އދ.ގެ އާންމު މަޖިލީހުގެ ރައީސް އަދި ރާއްޖޭގެ ފޮރިން މިނިސްޓަރ އަބްދުﷲ ޝާހިދު ވަނީ ރަޝިޔާއާ ޔޫކްރެއިނާ ދެމެދު މިހާރުން މިހާރަށް ހަމަލާތައް ބަދަލުކުރުން ހުއްޓާލުމަށް ކުރިން ގޮވާލައްވާފައިވާ ގޮވާލެއްވުމާއި، ހުރިހާ ފަރާތްތަކަކުންވެސް ވީހާވެސް ބޮޑަކަށް ހަނގުރާމައާއި ދިމާލަށް ނުދިޔުމަށް ގޮވާލައްވާފައިވާ ގޮވާލެއްވުން އާކުރައްވައި، ޑިޕްލޮމަސީއާއި މަޝްވަރާގެ މޭޒުދޮށަށް ފުރިހަމައަށް ރުޖޫއަވުމަށް ގޮވާލައްވާފައެވެ. ޝާހިދު ވިދާޅުވީ އދ.ގެ ޗާޓަރުގައި ހިމެނޭ "ސުލްހައަށް އެއްބައިވަންތަކަން" މި ނަމުގައިވާ ގަރާރުގައި ލާޒިމުކޮށްފައިވާ، އާންމު މަޖިލީހުގެ 11 ވަނަ ކުއްލި ޚާއްސަ ޖަލްސާ ބޭއްވުމަކީ، އ.ދ.ގެ ލީޑަރޝިޕަކީ ސުލްހައާއި ސަލާމަތާ ގުޅުންހުރި ކަންކަމުގައި ޚިދުމަތްކުރާ, ރައްޔިތުންގެ އުއްމީދުތަކާ އެއްގޮތަށް މަސައްކަތްކުރާ ތަނެއްކަން ކަށަވަރުކުރުމަށް އދ.ގެ ލީޑަރޝިޕަށް ލިބޭ އާ ފުރުސަތެއްކަމަށެވެ.

އދން ފާސްކުރި ގަރާރުގައި ރަޝިޔާގެ ނިއުކްލިއަރ ފައުޖު ތައްޔާރީ ހާލަތަށް ގެނައުން ކުށްވެރިކުރާކަމަށްވެސް ހިމަނާފައިވެއެވެ. މިގަރާރަށް ވާހަކަ ދެއްކުމަށް ހުޅުވާލުމުން ގިނަ ގައުމުތަކަކުން ވަނީ ރަޝިޔާ ކުށްވެރިކޮށް ވާހަކަދައްކާފައެވެ.

ރަޝިޔާއިން ޔޫކްރެއިން އަށް އަމާޒުކޮށް ހަމަލާތައް ދެމުންދާއިރު އެމެރިކާ އާއި ހުޅަނގުން ވަނީ ރަޝިޔާއާ ދެކޮޅަށް ދަތިކުރުމުގެ ފިޔަވަޅުތައް އަޅާފައެވެ. ހުޅަނގުން ތުހުމަތުކުރަނީ ރަޝިޔާއިން ޔޫކްރެއިންގެ އާންމު ރައްޔިތުންނަށް އަމާޒުކޮށް ހަމަލާދޭކަމުގައެވެ. ނަމަވެސް ރަޝިޔާއިން އދ އަށް ކަނޑައަޅުއްވާފައި ހުންނަވާ އެމްބަސެޑަރ ވަނީ އެކަން ދޮގުކުރައްވާފައެވެ. އަދި މިގަރާރުގެ ސަބަބުން އިތުރަށް ހާލަތު ގޯސްވެދާނެކަމުގެ އިންޒާރު އޭނާވަނީ ދެއްވާފައެވެ.