ޔޫކްރެއިން އިން ނިކުންނަން މަސައްކަތްކުރި ޗައިނާގެ ރައްޔިތަކު ބަޑީގެ ހަމަލާއެއްގައި ޒަޚަމްވެއްޖެއެވެ.

ޗައިނާގެ ފޮރިން މިނިސްޓްރީން ވަނީ އެކަން ކަށަވަރުކޮށްދީފައެވެ. މިއީ މިހާތަނަށް މިހަނގުރާމައިގައި ޗައިނާގެ ރައްޔިތަކަށް އަނިޔާވެގެން ރިޕޯޓްކުރި ފުރަތަމަ ފަހަރެވެ. ޔޫކްރެއިންގައި ޗައިނާގެ 6000 އެއްހާ ރައްޔިތުން ދިރިއުޅެއެވެ. މިދިޔަ ހަފްތާގެ ބުރާސްފަތި ދުވަހު ރަޝިޔާއިން ޔޫކްރެއިން އަށް ހަމަލާދިނުމާ ހަމައަށްވެސް ޔޫކްރެއިންގައި ތިބި ޗައިނާ ރައްޔިތުން އެޤައުމު ދޫކޮށްދިޔުމަށް ޗައިނާއިން އަންގާފައެއްނުވެއެވެ. މިދިޔަ ހަފްތާގެ ބުރާސްފަތި ދުވަހު ޗައިނާއިން ބުނެފައިވަނީ ޔޫކްރެއިންގައި ތިބި ޗައިނާ ރައްޔިތުން އެޤައުމުން ނެރުމުގެ މަސައްކަތް ފަށާފައިވާކަމަށެވެ.

ޒަޚަމްވި ޗައިނާގެ ރައްޔިތަކީ އަމިއްލައަށް ޔޫކްރެއިން އިން ނިކުންނަން މަސައްކަތްކުރި މީހެއްކަމަށް ޗައިނާގެ ފޮރިން މިނިސްޓްރީން ބުނެއެވެ. އެމީހާ ނިކުންނަން މަސައްކަތްކުރީ ރޭގަނޑު ކަމަށާއި އެމީހާގެ ހާލު ގޯސްނޫންކަމަށް ފޮރިން މިނިސްޓްރީން ބުނެއެވެ. އެމީހާ ޒަޚަމްވެފައިވަނީ ރަޝިޔާއިން ދިން ހަމަލާއެއްގައި ކަމެއް ނޫނީ ޔޫކްރެއިން އިން ދިން ހަމަލާއެއްގައި ކަމެށް ޗައިނާއިން ނުބެއެވެ. ޗައިނާ ފޮރިން މިނިސްޓްރީން ބުނީ 2500 އަށް ވުރެ ގިނަ މީހުން ޔޫކްރެއިން އިން އެހެން ހިސާބުތަކަށް ބަދަލުކުރެވިފައިވާކަމަށެވެ.

ޗައިނާއިން ވަނީ ރަޝިޔާއިން ޔޫކްރެއިން އަށް ދެމުންދާ ހަމަލާތައް ކުށްވެރިކުރުމަށް ދެކޮޅު ހަދާފައެވެ. އަދި ވާހަކަދައްކައިގެން މައްސަލައަށް ހައްލު ގެނައުމަށް ތަކުރާރުކޮށް އަންނަނީ ގޮވާލަމުންނެވެ.

ޔޫކްރެއިންގައި ތިބި ޗައިނާގެ ރައްޔިތުން އަންނަނީ ސޯޝަލް މީޑިޔާ މެދުވެރިކޮށް އެމީހުންގެ އިހުސާސްތައް ކިޔައިދެމުންނެވެ. އެގޮތުން ބިރުވެރިކަމާއި ކަންބޮޑުވުންތަކުގެ ތެރޭގައި ތިބި ކަމަށާއި ސަލާމަތްތެރިކަމާއެކު ޔޫކްރެއިނުން ނިކުމެވޭނެތޯ ފަދަ ޝުއޫރުތައް އަންނަނީ ފާޅުކުރަމުންނެވެ.

ޗައިނާގެ ރައްޔިތަކު ޔޫކްރެއިން އިން ނިކުންނަން އުޅެނިކޮށް ޒަޚަމްވި ޚަބަރު ޗައިނާގެ މަޝްހޫރު ސޯޝަލް މީޑިޔާ ވެއިބޯ ގައި ވަނީ ވައިރަލްވެފައެވެ. ޗައިނާގެ ތެރޭގައި ގިނަ ބަޔަކު އަންނަނީ މިމައްސަލައިގައި ރަޝިޔާ ކޮޅަށް ތާއީދުކޮށް ވާހަކަދައްކަމުންނެވެ. އަދި ޔޫކްރެއިންގެ ރައީސް ވޮލޮޑްމިރް ޒެލެންސްކީ އާންމުންނަށް ހަތިޔާރު ދިނުމަށް ނިންމެވި ނިންމެވުމާއި ދެކޮޅަށް ވާހަކަ ދައްކަމުންނެވެ.

މައްސަލައަކީ ޒެލެންސްކީ ކަމަށާއި އާންމުންނަށް ހަތިޔާރު ދިނުންކަމަށް ބުނެ އާންމުންގެ މީހަކު ކުރި ޕޯސްޓަކަށް 14،000 ލައިކްސް ލިބިފައިވެއެވެ.