އައިޖީއެމްއެޗްގައި މަސައްކަތް ކުރަމުން ދިޔަ ފިލިޕީންސްގެ އަންހެން ނަރުހެއް ކަމަށްވާ މޭރީ ގްރޭސްގެ މަރުގެ މައްސަލައިގައި އޭނާގެ ފިރިމީހާގެ މައްޗަށް އުފުލާފައިވާ ދައުވާގެ އިބްތިދާއީ އަޑުއެހުމެއް ހޯމަ ދުވަހު ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި މައްސަލައިގައި ހޯމަ ދުވަހު ކުރިއަށްދިޔަ އަޑުއެހުމުގައި އޮތީ ދައުލަތުން މާވިންގެ މައްޗަށް އުފުލާފައިވާ ދައުވާ ހުށައެޅުމެވެ.

އެހެންނަމަވެސް، މި އަޑުއެހުން ފެށުމާއެކު ދިފާއީ ވަކީލު ވަނީ މާވިންއާ ބައްދަލު ކުރުމުގައި އަދިވެސް ދަތިތައް ހުރިކަމަށް ވިދާޅުވެފައެވެ. އަދި މިހާރުވެސް އޭނާ ހުރީ ކަސްޓޯޑިއަލް ޖަލެއްގައި ކަމަށް ވަކީލު ވިދާޅުވިއެވެ. އެކަމުގެ ސަބަބުން އެ ފަރާތްތަކުގެ ވަރަށް ގިނަ ޙައްޤުތައް ގެއްލިގެންދާކަން ވަކީލު ފާހަގަ ކުރެއްވިއެވެ. ޤާނޫނުގައި ބަޔާންކޮށްފައިވާ ގޮތަށް ޖަލަށް ބަދަލުނުކޮށް، ފުލުހުންގެ ކަސްޓޯޑިއަލްއެއްގައި ބަހައްޓާފައިވާތީ އެކަމުގެ ކަންބޮޑުވުންވެސް ވަކީލު ވަނީ ހިއްސާ ކުރައްވާފައެވެ.

ވަކީލު ވަނީ 3 ފަހަރެއްގެ މަތިން މާވިންއާ ބައްދަލުކުރުމަށް މަސައްކަތް ކުރި ނަމަވެސް އެ ފުރުސަތު ދައުލަތުގެ އިދާރާތަކުގެ ތެރެއިން ފަހިވެފައިނުވާކަމަށް ވިދާޅުވެފައެވެ. އަދި ދެފަހަރެއްގެ މަތިން ގާޒީ ނެރުއްވި ކޯޓު އަމުރާވެސް ޚިލާފަށް އަދިވެސް މާވިން ހުރީ ކަސްޓޯޑިއަލް ޖަލެއްގައިކަން ވަކީލު ފާހަގަކުރެއްވިއެވެ. އެގޮތުން މި މައްސަލައިގައި އެންމެ ފަހުން ބޭއްވި އަޑުއެހުމުގައިވެސް ގާޒީ ވަނީ 15 ދުވަސްތެރޭ އޭނާ ރިމާންޑު ޖަލަކަށް ބަދަލު ކުރުމަށް އަމުރު ކުރައްވާފައެވެ.

ވަކީލު ވަނީ މައްސަލައިގެ އަޑުއެހުމެއް ބޭއްވޭނީ ޤާނޫނާ ޚިލާފަށް ހުރި ކަންކަން ރަނގަޅު ކުރުމަށްފަހުކަމަށް ޤަބޫލު ކުރައްވާކަމަށް ވިދާޅުވެފައެވެ. އަދި މާވިންއަށް ވަކީލާއި ބައްދަލުކުރުމަށް ހުރަސްއަޅާ ފަރާތްތަކާމެދު ފިޔަވަޅު އެޅުއްވުމަށްވެސް ވަކީލު ވަނީ އެދިލައްވާފައެވެ.

އެކަމާއި ގުޅޭގޮތުން ދައުލަތުގެ ވަކީލު ވިދާޅުވީ، ފުލުހުންގެ އިދާރާގައި ހަމަޖެހިފައިވާ އިޖުރާއަތުތަކާއި އެއްގޮތަށް ފޯމު ހުށައެޅުއްވުމުން މާވިންއާއި ބައްދަލު ކުރެވޭނެކަމަށް ފުލުހުން އަންގާފައިވާ ކަމަށެވެ.

މި މައްސަލައިގައި ދެފަރާތުން ފާހަގަކުރި ކަންކަމަށް ރިއާޔަތް ކުރައްވައި މައްސަލަ ބައްލަވާ ގާޒީ ވަނީ ދައުވާލިބޭ ފަރާތާއި ވަކީލާ ބައްދަލުވެ، މައްސަލައިގެ ޖަވާބުދާރީވުމުގެ ކުރިން އެކަށީގެންވާ މުއްދަތެއް ލިބެންޖެހޭނެކަމަށް ޤަބޫލު ކުރައްވާކަމަށް ވިދާޅުވެފައެވެ. އެގޮތުން ކަސްޓޯޑިއަލް ޖަލެއްގައި ބަހައްޓާފައިވަނީ ރިމާންޑް ޖަލުގައި ޖާގަ ނެތުމުންކަމަށް ދައުލަތުންވެސް ފާހަގަކޮށްފައިވާކަމަށް ގާޒީ ވިދާޅުވިއެވެ. ގާޒީ ވަނީ ވަކީލާއި މުވައްކިލު ބައްދަލުކުރެއްވުމުގައި ދަތިތަކެއް ހުރިނަމަ އެކަން ޙައްލު ކުރުމަށް ދައުލަތުންވެސް މަސައްކަތް ކޮށްދެއްވުމަށް އެދިލައްވާފައެވެ.

ދެން މި މައްސަލައިގެ އަޑުއެހުމެއް އޮންނާނީ މާރޗު 15 ގައެވެ.