ލަމްހާގެ ބަންދު މުރާޖައާ ސިއްރު ކުރުމާމެދު ބޮޑު ބަހުސަކަށްފަހު އޭނާ ޝަރީއަތް ނިމެންދެން ބަންދު
21 ފެބުރުއަރީ 2022 | ހޯމަ 06:13ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ހުސައިން ފާއިޒު ރަޝާދު
މޭރީގެ މަރުގެ މައްސަލައިގައި ދައުލަތުން ދައުވާކުރަނީ މޭރީގެ ފިރިމީހާ ފިލިޕީންސްގެ ރައްޔިތެއްކަމަށްވާ މާރވިން އެސް.ވައި ވާރގަސްއާއި ޅ.ހިންނަވަރު، މާފިނި، ހަލީމަތު ލަމްޙާ އަބްދުއްރަހްމާނުގެ މައްޗަށް
އައިޖީއެމްއެޗްގައި މަސައްކަތް ކުރަމުން ދިޔަ ފިލިޕީންސްގެ އަންހެން ނަރުހެއް ކަމަށްވާ މޭރީ ގްރޭސްގެ މަރުގެ މައްސަލައިގައި ދައުވާ އުފުލާފައިވާ ޅ. ހިންނަވަރު، މާފިނި، ހަލީމަތު ލަމްހާ އަބްދުއްރަހްމާނު ޝަރީއަތް ނިމެންދެން ބަންދުކުރުމަށް ކްރިމިނަލް ކޯޓުން އަމުރުކޮށްފިއެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ހުސައިން ފާއިޒު ރަޝާދެވެ.
މި މައްސަލައިގައި ހޯމަ ދުވަހު ފުރަތަމަ ކުރިއަށްދިޔައީ އިބްތިދާއީ އަޑުއެހުމެކެވެ.
އިބްތިދާއީ އަޑުއެހުމަށްފަހު ދެން އޮތީ ބަންދު މުރާޖައާ ބައެވެ. އެގޮތުން މި އަޑުއެހުން ސިއްރުކޮށްގެން ކުރިއަށް ގެންދިއުމަށް ދިފާއުން އެދިފައިވާއިރު، އެއީ ޖިނާއީ އިޖުރާއަތުގެ ޤާނޫނުގެ 143 ވަނަ މާއްދާގެ ކޮން ޙާލަތަކަށް ރިއާޔަތްކޮށް އެދިލައްވާ އެދުމެއްކަން ގާޒީ ވަނީ ސުވާލު ކުރައްވާފައެވެ. އެ މާއްދާއަކީ ޝަރީއަތްތައް ސިއްރު ކުރެވޭނެ ޙާލަތްތައް ބަޔާންކޮށްފައިވާ މާއްދާއެވެ.
މީހަކު ލަދުގަނެދާނެތީ ނުވަތަ މުޖުތަމައުގެ ތެރޭގައި އަގުވެއްޓިދާނެތީ އެ އަޑުއެހުމެއް ސިއްރު ކުރުމެއް ނޯވޭ:
ދިފާއުން ވަނީ 143 ވަނަ މާއްދާގެ (ށ) ގެ 5 ވަނަ ނަންބަރުގެ ދަށުން އަދުލު އިންސާފަށް ހުރަސް އެޅޭނެކަމަށް ބަލައި ސިއްރުކޮށްދިނުން އެދިފައެވެ. ނަމަވެސް ދައުލަތުން ވަނީ މި މައްސަލައަށް ނޫސްވެރިން ވަނުމުން އަދުލު އިންސާފަށް ހުރަސް އެޅެނީ ކިހިނެއްތޯ ދައުލަތަށް ސާފު ނުވާކަމަށް ވިދާޅުވެފައެވެ. މިއީ އެ މާއްދާގެ ދަށުން ޝަރީއަތް ސިއްރު ކުރަން ޖެހޭ ޙާލަތެއް ކަމަށް ޤަބޫލު ނުކުރެވޭކަމަށްވެސް ވަކީލު ވިދާޅުވިއެވެ. އެގޮތުން މީޑިއާގައި ވަކި ގޮތަކަށް ޚަބަރެއް އޮތުމަކީ ގާޒީއަކު އެ ޚަބަރަކަށް ބަލައިގެން އަޑުއެހުން ސިއްރު ކުރަންޖެހޭ ސަބަބެއް ނޫންކަމަށް ވަކީލު ވިދާޅުވިއެވެ.
މީގެއިތުރުން، ލަމްހާގެ ސިއްޙީ މައްސަލައެއް ހުރިކަމާއި ގުޅޭ ޝަކުވާއެއް އޮތްކަމަށް ކަރެކްޝަންސްއިން ސާފުކުރި މައުލޫމާތުތަކުންވެސް އެނގެން ނެތްކަމަށް ވަކީލު ވިދާޅުވިއެވެ. ހަމައެއާއެކު، ޖިނާއީ އިޖުރާއަތުގެ ޤާނޫނުގެ 143 ވަނަ މާއްދާއަށް ބަލާއިރު، މީހަކު ލަދުގަނެދާނެތީ ނުވަތަ މުޖުތަމައުގެ ތެރޭގައި އަގުވެއްޓިދާނެތީ އެ އަޑުއެހުމެއް ސިއްރު ކުރުން ނުހިމެނޭކަމަށް ވިދާޅުވިއެވެ.
ބަންދު މުރާޖައާގާއި ދައުލަތުން ވަނީ ލަމްހާ ޝަރީއަތް ނިމެންދެން ބަންދު ކުރުމަށް އެދިވަޑައިގެންފައެވެ.
ނަމަވެސް ދިފާއުން ވަނީ ދައުލަތުން ހުށައަޅާފައިވާ ހެކިތަކާއި ގުޅިގެން ކަންބޮޑުވުން ފާޅު ކުރައްވާފައެވެ. އެގޮތުން މިހާރު ހުށައެޅިފައިވާ ލިއެކިއުންތަކުގެ މައްޗަށް އެކަށީގެންވާ ހެކި ހުށައެޅިފައި ނެތްކަމަަށް ދިފާއީ ވަކީލު ވިދާޅުވިއެވެ. އަދި ސިއްޙީ ޙާލަތާއި ގުޅޭގޮތުން ނޫސްވެރިންގެ ހާޒިރުގައި ވާހަކަ ދެއްކުމަށް އުޒުރުވެރިވެލައްވާކަމަށްވެސް ވަކީލު ވިދާޅުވިއެވެ.
ލަމްހާގެ ގެ ބަލާ ފާސްކުރިއިރު ފެނިފައިވާ 3 އިންޖެކްޝަންގެ ތެރޭގައި ސަކްސިނައިލްކޮލިން ހިމެނޭ އިންޖެކްޝަނެއް ހިމެނޭއިރު، އެއީ މީހުން ހޭނައްތަން ބޭނުންކުރާ އަދި މީހަކު މަރާލެވިދާނެ ފަދަ އިންޖެކްޝަނެއްކަން ދައުލަތުން ފާހަގަކުރިއެވެ. މޭރީގެ ހަށިގަނޑުން އިންޖެކްޝަން ޖަހާފައިވާ ކަމުގެ ނިޝާން ފެންނަން އޮތްކަމަށް ދައުލަތުގެ ވަކީލާ ވިދާޅުވިއެވެ. އެ ސަބަބުތަކަށް ރިއާޔަތްކޮށް ދައުލަތުން އެދެނީ އޭނާ ޝަރީއަތް ނިމެންދެން ބަންދު ކުރުމަށެވެ.
ލަމްހާގެ މައްޗަށް, އެނގިހުރެ މީހަކު މެރުމުގައި ބައިވެރިވުމުގެ ކުށުގެ ދައުވާ އުފުލާފައިވާއިރު، އޭނާގެ މައްޗަށް ވަނީ, އެހެން މީހެއްގެ މުދަލެއްގެ މައްޗަށް ހުއްދަ ނޫންގޮތެއްގައި ބާރުހިންގުމުގެ ކުށުގެ ދަައުވާވެސް އުފުލާފައެވެ. އަދި ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގައި ކުރުމުގެ ދަައުވާވެސް އުފުލާފައިވާއިރު، ލަމްހާ ދިރިއުޅޭ ގެ ކްރިމިނަލް ކޯޓުގެ އަމުރެއްގެ ދަށުން ބަލައި ފާސްކުރިއިރު، ލަމްހާ ދިރިއުޅޭ ކޮޓަރި ތެރެއިން، ހޮސްޕިޓަލްތަކާއި ފަރުވާ ދޭ މަރުކަޒުތަކުގެ ބޭނުމަށް އެކަނި, ދޫކުރެވޭ ބާވަތުގެ ބޭސްތަކެއް ފެނިފައިވެއެވެ.
މި މައްސަލައިގައި ދެފަރާތުން ފާހަގަކުރި ކަންކަމަށް ރިއާޔަތް ކުރައްވައި މައްސަލަ ބައްލަވާ ގާޒީ ވަނީ ބަންދުގައި ބަހައްޓަންޖެހޭ ސަބަބުތައް ހުރިކަމަށް ޤަބޫލު ކުރެވޭ ކަމަށެވެ. ގާޒީ ވަނީ އޭނާ ޝަރީއަތް ނިމެންދެން ބަންދު ކުރުމަށް އަމުރު ކުރައްވާފައެވެ. އަދި ލަމްހާގެ ޒާތީ ކަންކަން ލިއުމުން ހުށައެޅުމުން އެކަމަށް ޝަރީއަތުން ބައްލަވާނެކަމަށް ގާޒީ ވިދާޅުވިއެވެ.
މި މައްސަލައިގައި މީގެ ކުރިން ބޭއްވި އަޑުއެހުމެއްގައި ދައުވާ ލިބޭ މާވިންވެސް ވަނީ ޝަރީއަތް ނިމެންދެން ބަންދުކޮށްފައެވެ. އެއީ 17 ފެބްރުއަރީގައި ބޭއްވި އަޑުއެހުމެވެ.
