އައިޖީއެމްއެޗްގައި މަސައްކަތް ކުރަމުން ދިޔަ ފިލިޕީންސްގެ އަންހެން ނަރުހެއް ކަމަށްވާ މޭރީ ގްރޭސްގެ މަރުގެ މައްސަލައިގައި ދައުވާ އުފުލާފައިވާ ޅ. ހިންނަވަރު، މާފިނި، ހަލީމަތު ލަމްހާ އަބްދުއްރަހްމާނުގެ ދައުވާގެ އަޑުއެހުމެއް ހޯމަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

ލަމްހާގެ މައްޗަށް މި މައްސަލައާ ގުޅިގެން އުފުލާފައިވަނީ މޭރީ މަރާލުމުގައި ބައިވެރިވުމުގެ ކުށުގެ ދައުވާއާއި އިތުރު ދައުވާތަކެކެވެ. މި މައްސަލައިގައި ބުރާސްފަތި ދުވަހު ކުރިއަށް ދިޔަ އަޑުއެހުމުގައި ދިފާއީ ވަކީލު ވަނީ ދައުލަތުން ހުށައަޅާފައިވާ ފޯމާއި ގުޅިގެން އިތުރު ވަގުތު ބޭނުންވާކަމަށް ވިދާޅުވެފައެވެ. ދައުލަތުންވެސް ވަނީ ދިފާއަށް އެ ފުރުސަތު ދެއްވުމުގައި އިއުތިރާޒެއް ނެތްކަން ފާހަގަ ކުރައްވާފައެވެ.

ވުމާއެކު، 21 ފެބްރުއަރީގައި އޮންނަ އަޑުއެހުމުގައި ބަންދާމެދު ތަފްސީލީ ގޮތެއްގައި ވާހަކަދެއްކުމަށް ނިންމަވައި ގާޒީ އެ ދުވަހު ވަނީ ލަމްހާ 4 ދުވަހަށް ބަންދު ކުރުމަށް އަމުރު ކުރައްވާފައެވެ. އެ އަޑުއެހުމުގައި ދިފާއީ ވަކީލު ވަނީ, ބަންދާއި ގުޅޭ އަޑުއެހުން ނޫސްވެރިން ނުވައްދައި ކުރިއަށް ގެންދިއުމަށް އެދިވަޑައިގެންފައެވެ. ސަބަބެއްގެ ގޮތުގައި ފާހަގަ ކުރެއްވީ އެ އަޑުއެހުމުގައި ލަމްހާގެ ޒާތީ މައުލޫމާތުތަކެއް ހުރުމެވެ.

ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ހުސައިން ފާއިޒު ރަޝާދެވެ. 

ލަމްހާގެ ގެ ބަލާ ފާސްކުރިއިރު ފެނިފައިވާ 3 އިންޖެކްޝަންގެ ތެރޭގައި ސަކްސިނައިލްކޮލިން ހިމެނޭ އިންޖެކްޝަނެއް:

މި މައްސަލައިގައި 21 ފެބްރުއަރީވީ ހޯމަ ދުވަހު ކުރިއަށް ދިޔަ އަޑުއެހުމުގައި ދިފާއީ ވަކީލު ވަނީ ލަމްހާ ޙާދިސާ ހިނގި ގޭގައި ލަމްހާ 20 މިނެޓް ހޭދަކޮށްފައިވާކަމަށް ދައުލަތުން ދައުވާގައި ބަޔާންކޮށްފައިވީ ނަމަވެސް، އެކަމާ ގުޅިގެން ހުށައަޅާފައިވާ ސީސީޓީވީ ފުޓޭޖް ލިބިފައިނުވާ ކަމަށް ވިދާޅުވެފައެވެ. ނަމަވެސް ދައުލަތުން ކޯޓަށް ހުށައަޅާފައިވާ ލިއެކިއުންތައް ލިބިފައިވާކަމަށް ދިފާއީ ވަކީލު ވިދާޅުވިއެވެ.

އެކަމާ ގުޅިގެން ދައުލަތުން ބުނީ، ވީޑިއޯ އެންޑް އިމޭޖް އެނާލިސިސް ރިޕޯޓު ނިމުމުން އެ ރިޕޯޓާއި، މޯބައިލް ފޮރެންސިކް ރިޕޯޓުވެސް ހުށައަޅުއްވާނެ ކަމަށެވެ. އޮޓޮޕްސީއާއެކު ތައްޔާރުކުރި ޓޮކްސިކޮލިޖީ ރިޕޯޓާއި، މޭރީގެ ލޭގެ ޓޮކްސިކޮލިޖީ ރިޕޯޓުވެސް ކޯޓަށް ހުށައަޅުއްވާނެކަމަށް ވިދާޅުވިއެވެ.

މޭރީގެ ލޭގެ ޓޮކްސިކޮލިޖީ ރިޕޯޓަށް ބަލާއިރު، އެ ރިޕޯޓު ތައްޔާރު ކުރަނީ ރާއްޖެއިން ބޭރުން ކަމަށާއި، މޭރީގެ ލޭގައި ކެމިކަލްއެއްގެ ބާވަތެއް (Succinylcholine) ހުރިކަމަށް ރިޕޯޓު ތައްޔާރުކުރި ފަރާތުން އަނގަބަހުން އަންގާފައިވާކަމަށް ވިދާޅުވިއެވެ. އެ ރިޕޯޓުވެސް ލިބުމާއެކު ހުށައަޅުއްވާނެކަން ފާހަގަ ކުރެއްވިއެވެ.

ސަކްސިނައިލްކޮލިން އަކީ ހޭނައްތާ ޕްރޮސިޖަރ ތަކަށް ބޭނުންކުރާ އަދި ވަކި މިންވަރަކަށް މީހާގެ ވާގި ނައްތާލުމުގެ ބާރުވެސް ލިބިފައިވާ ކެމިކަލްއެކެވެ.

ލަމްހާގެ ގެ ބަލާ ފާސްކުރިއިރު ފެނިފައިވާ 3 އިންޖެކްޝަންގެ ތެރޭގައި ސަކްސިނައިލްކޮލިން ހިމެނޭ އިންޖެކްޝަނެއް ހިމެނޭއިރު، އެ އިންޖެކްޝަންތަކަކީ މީހުން ހޭނައްތަން ބޭނުންކުރާ އަދި މީހަކު މަރާލެވިދާނެ ފަދަ އިންޖެކްޝަނެއްކަން ދައުލަތުން ފާހަގަކުރިއެވެ. މޭރީގެ ހަށިގަނޑުންވެސް އިންޖެކްޝަން ޖަހާފައިވާ ކަމުގެ ނިޝާން ފެންނަން އޮތްކަމަށް ދައުލަތުގެ ވަކީލާ ވިދާޅުވިއެވެ.

ދިފާއީ ވަކީލު ވަނީ އެ ރިޕޯޓުތައް ނުލިބޭއިރު، އިބްތިދާއީ މަރުޙަލާ ކުރިއަށް ގެންދާނީ ކިހިނެއްތޯ ސުވާލު ކުރައްވާފައެވެ. ނަމަވެސް ދައުލަތުން ވަނީ ފުލުހުންގެ ފޮރެންސިކް ގެ ވަސީލަތްތައް ހުރިގޮތުންނާއި، މަރުގެ މައްސަލަތަކެއް އެކުއެކީގައި ތަހުގީގު ކުރަން ޖެހުމުން ލަސްތަކެއް އައިސްފައިވާ ކަމަށް ވިދާޅުވެފައެވެ. ޤާނޫނުގައި ބަޔާންކޮށްފައިވާ މުއްދަތުގެ ތެރޭގައި ދައުވާކުރަން ބަލާއިރު، ހުރިހާ ހެކިތަކެއް އެއްފަހަރާ ހުށައެޅުމުގައި ދަތިތަކެއް ހުރިކަމަށް ވިދާޅުވިއެވެ.

ދައުލަތުން ވަނީ އެ ރިޕޯޓުތައް ލިބުމުން އިބްތިދާއީ މަރުޙަލާ ކުރިއަށް ގެންދިއުމާމެދު އިއުތިރާޒެއް ނުކުރާކަން ފާހަގަކޮށްފައެވެ. މި ހަފްތާ ތެރޭގައި އެ ލިއުންތައް ކޯޓަށް ހުށައެޅޭނެކަމަށް ބެލެވޭކަމަށް ވިދާޅުވިއެވެ. ވުމާއެކު ގާޒީވެސް ވަނީ ލިއެކިއުންތައް ލިބުމުން، އިބްތިދާއީ އަޑުއެހުން ކުރިއަށް ގެންދަވާނެކަމަށް ވިދާޅުވެފައެވެ.

މި މައްސަލައިގެ ދެން އަޑުއެހުމެއް އޮންނާނީ މާރޗު މަހުގެ 15 ވަނަ ދުވަހުއެވެ.