ސްކޫލް އޮފް މެޑިސިންގގައި ހިނގާކަމަށް ބުނެވޭ ގަނާކުރުމުގެ މައްސަލަ ތަހުގީގު ކުރަނީ
20 ފެބުރުއަރީ 2022 | އާދީއްތަ 13:11މި މައްސަލަ ހުށަހަޅާފައިވަނީ 17 ފެބްރުއަރީ 2022ގައި
ދިވެހިރާއްޖޭގެ ގައުމީ ޔުނިވަރސިޓީ
ސްކޫލް އޮފް މެޑިސިންގގައި ހިނގާކަމަށް ބުނެވޭ ގަނާކުރުމުގެ މައްސަލަ ތަހުގީގު ކުރަމުންދާ ކަމަށް ދިވެހިރާއްޖޭގެ ގައުމީ ޔުނިވަރސިޓީ (އެމްއެންޔޫ)އިން ބުނެފިއެވެ
ސްކޫލް އޮފް މެޑިސިންގ ހިންގަމުން ދަނީ އެމްއެންޔޫގެ ދަށުންނެވެ.
މެޑިސިންގ ސްކޫލުގެ ދަރިވަރުންތަކަކަށް ގަނާ ކުރާ މައްސަލައެއް ފެންމަތިވުމާ ގުޅިގެން އެންއެންޔޫއިން ބުނީ, 17 ފެބްރުއަރީ 2022ގައި އެފަދަ މައްސަލައެއް ޔުނިވަރސިޓީއަށް ހުށަހަޅާފައިވާ ކަމަށެވެ. ގަނާ ކުރުމަކީ ދަރިވަރުންގެ ކޯޑް އޮފް ކޮންޑަކްޓްގައި މަނާ ކަމެއް ކަމަށާއި، އެ މައްސަލަ ޔުނިވަރސިޓީގެ މައްސަލަ ބަލާ ކޮމެޓީން ތަހުގީގު ކުރަމުންދާ ކަމަށެވެ. އަދި މައްސަލަ ނިމުނުހާ އަވަހަކަށް މިކަން ހިނގާފައިވާގޮތް ދަރިވަރުންނާ ހިއްސާކޮށް, އަޅަންޖެހޭ ފިޔަވަޅުތައް އަޅާނެ ކަމަށް ޔުނިވަރސިޓީން ބުނެއެވެ.
މި މައްސަލާގެ ތަހުގީގީ މަރުހަލާ ނިމެންދެން, މިކަމާ ގުޅޭގޮތުން, މައްސަލަ އޮޅޭގޮތަށް ވާހަކަތައް ނުފެތުރުމަށް ވެސް އެމްއެންޔޫއިން ވަނީ އިލްތިމާސްކޮށްފައެވެ.
ގަނާކުރުމުގެ މައްސަލައެއް ތަހުގީގު ކުރަމުންދާ ކަމަށް އެމްއެންޔޫއިން ބުނެފައިވާއިރު، މިކަމާ ކުރިމަތިލާން ޖެހުނު ދަރިވަރަކު ބުނެފައިވަނީ, ގަނާ ކުރަމުންދާތާ ދެއަހަރު ވެފައިވާ ކަމަށާއި، މި މައްސަލަ ބަލާފައިނުވާ ކަމަށެވެ. އަދި ގަނާކުރާ މީހުންނަށް ތާއީދުކޮށް އެމީހުން ހިމާޔަތްދޭ ތަނެއްގެ ގޮތުގައި އެމްއެންޔޫ ސިފަކޮށްފައިވެއެވެ.
