ރަޝިޔާއިން ޔޫކްރެއިން އަށް ހަމަލާދީ ޔޫކްރެއިންއަށް އަރައިފިނަމަ އެމެރިކާ އާއި އެމެރިކާގެ ބައިވެރިން ގުޅިގެން ރަޝިޔާ އާ ދެކޮޅަށް އިގްތިޞާދީ ގޮތުން ވަރުގަދަ ދަތިކުރުމުގެ ފިޔަވަޅުތަކެއް އަޅާނެކަމަށް އެމެރިކާގެ ނައިބު ރައީސް ކަމަލާ ހެރިސް ވިދާޅުވެއްޖެއެވެ.

ޖަރމަނުގެ މިޔުނިކްގައި ކުރިޔަށްދާ ސެކިޔުރިޓީ ކޮންފެރެންސްގައި ވާހަކަދައްކަވަމުން ކަމަލާ ވިދާޅުވީ ބޯޑަރުތަކަކީ ގަދަ ބާރުން ބަދަލުކުރެވިގެންވާނެ އެއްޗެއް ނޫންކަމަށެވެ. ރަޝިޔާއިން ޔޫކްރެއިންއަށް އަރައިފިނަމަ އެމެރިކާ އާއި އެމެރިކާގެ ބައިވެރިން ގުޅިގެން ވަރުގަދަ ދަތިކުރުމުގެ ފިޔަވަޅުތަކެއް އަޅުއްވާނެކަމުގެ ޔަގީންކަން ދެއްވާކަމަށް ކަމަލާ ވިދާޅުވިއެވެ.

އެމެރިކާ އާއި އެމެރިކާގެ ބައިވެރިން ގުޅިގެން ރަޝިޔާ އާ ދެކޮޅަށް އަޅާނެ އިގްތިޞާދީ ފިޔަވަޅުތައް މިހާރު ވަނީ ކަނޑައަޅާފައިކަމަށް ކަމަލާ ވިދާޅުވިއެވެ. ޓަރގެޓް ކުރާނީ ރަޝިޔާގެ އެންމެ މައި އިންޑަސްޓްރީ ތަކާއި ފައިނޭންޝަލް އިދާރާތަކަށްކަމަށް ކަމަލާ ވިދާޅުވިއެވެ.

އެމެރިކާ އާއި އެމެރިކާގެ ބައިވެރިން ގުޅިގެން ރަޝިޔާ އާ ދެކޮޅަށް ދަތިކުރުމުގެ ފިޔަވަޅުތައް އަޅާނެކަމަށާއި އަޅާނެ ފިޔަވަޅުތައް ވަނީ ކަނޑައެޅިފައި ކަމަށް ކަމަލާ ވިދާޅުވެފައި މިވަނީ ފާއިތުވި ދުވަސްތަކުގައި އެމެރިކާގެ ރައީސް ޖޯ ބައިޑަން ތަކުރާރުކޮށް ރަޝިޔާ އާ ދެކޮޅަށް ދަތިކުރުމުގެ ފިޔަވަޅުތައް އަޅުއްވާނެކަމަށް ވިދާޅުވުމަށްފަހުއެވެ. އަޅާނެ ފިޔަވަޅުތައް މިހާތަނަށް އައިއިރު މިމިންވަރަށް އެމެރިކާ އާއި އެމެރިކާގެ ބައިވެރިން ތިލަކޮށްފައެއްނުވެއެވެ.

މިކޮންފެރެންސްގެ ތެރެއިން ކަމަލާ ވަނީ ޔޫކްރެއިންގެ ރައީސް ވޮލޮޑިމިރް ޒެލެންސްކީ ބައްދަލުކުރައްވާ މަސްރަހާއި ގުޅޭގޮތުން މަޝްވަރާކުރައްވާފައެވެ. އެގޮތުން ރަޝިޔާގެ އަސްކަރީ ފައުޖުތައް ޔޫކްރެއިން ވަށާލާފައިވާތީ އެކަމާއި ގުޅޭގޮތުން މަޝްވަރާކުރައްވާފައިވެއެވެ.

މިބައްދަލުކުރެއްވުމުގައި ކަމަލާ ވަނީ ޔޫކްރެއިންގެ ސަލާމަތާއި ރައްކާތެރިކަން ދިފާއުކޮށްދިނުމަށް އެމެރިކާއިން މަސައްކަތްކުރާނެ ކަމަށް މީގެކުރިން ހާމަކޮށްފައިވާ ހާމަކުރުން ތަކުރާރުކުރައްވާފައެވެ. އަދި ރަޝިޔާއިން ޔޫކްރެއިން އަށް ހަމަލާދީފިނަމަ ނުވަތަ އަރައިފިނަމަ ކަންކުރާނެ ގޮތްތަކާއި ގުޅޭގޮތުން މަޝްވަރާކުރައްވާފައިވެއެވެ. މީގެއިތުރުން މަސްރަހުގެ ސަލާމަތާއި ރައްކާތެރިކަމަށްޓަކައި މިމައްސަލައަށް ޑިޕްލޮމެޓިކް ހައްލެއް ގެނައުމުގެ މުހިންމުކަމާއި މަސްރަހު ފިނިކުރެވޭނެ ގޮތްތަކާއި ގުޅޭގޮތުން ދެ ބޭފުޅުން މަޝްވަރާކުރައްވާފައިވެއެވެ.

މިބައްދަކުރެއްވުން 45 މިނެޓަށް ދިގު ދެމިގެންދިޔަކަމަށް ވައިޓް ހައުސްއިން ބުނެއެވެ.

މީގެއިތުރުން މިކޮންފަރެންސްގެ ހަވާސާ ތެރެއިން ކަމަލާ ވަނީ ޔޫރަޕިއަން ކޮމިޝަންގެ ރައީސް އުރުސަލާ އާއި ގްރީކްގެ ބޮޑުވަޒީރު އަދި ޖަރމަނުގެ ޗާންސެލަރ އާވެސް ބައްދަލުކުރައްވާ ޔޫކްރެއިންގެ މަސްރަހާއި ގުޅޭގޮތުން މަޝްވަރާކުރައްވާފައިވެއެވެ. އަދި ރަޝިޔާއާ ދެކޮޅަށް އިގްތިޞާދީ ގޮތުން އަޅާނެ ދަތިކުރުމުގެ ފިޔަވަޅުތަކާއި ގުޅޭގޮތުން މަޝްވަރާކުރައްވާފައިވެއެވެ.