ރަޝިޔާއާ ދެކޮޅަށް އަސްކަރީ ސަބްމެރިން ނެރުމަށް، އެމެރިކާގެ ރައީސް ޑޮނަލްޑް ޓްރަމްޕް އަމުރު ކުރައްވައިފި އެވެ.

ޓްރަމްޕް މިފަދައިން އަމުރު ކުރައްވާފައި ވަނީ ސޯޝަލް މީޑިއާގައި ޓްރަމްްޕް އާއި ރަޝިޔާގެ ކުރީގެ ރައީސް ޑިމިޓްރީ މެޑްވެޑޭވްއާ ދެމެދު ކުރެވުނު ހޫނު ބަހުސް އަކަށް ފަހު އެވެ. 

އެކަމާ ގުޅިގެން ޓްރަމްޕް ވިދާޅުވެފައި ވަނީ މެޑްވެޑޭވް "ނިއުކްލިއާ" ބަސް ބޭނުން ކޮށްފައިވާ ކަމަށާއި، އެކަމުގެ ސަބަބުން އެ ފިޔަވަޅު އަޅަން މަޖުބޫރުވީ ކަމަށެވެ. މިފަދަ ބަހުސް ތަކެއް ހިނގާފައި މި ވަނީ، ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމަ ނިންމުމަށް ރަޝިޔާ އަށް ޓްރަމްޕް ސުން ގަޑި ދީފައި ވަނިކޮށެވެ. 

މި ފަހަކަށް އައިސް ރަޝިޔާއާ ވަރަށް ބޮޑަށް ފާޑު ވިދާޅުވަމުން އަންނަ ޓްރަމްޕް އޭނާގެ ޓްރުތު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވެފައި ވަނީ، މެޑްވެޑޭވް ދައްކާފައި ވަނީ ހަރުކަށި އަދި މޮޔަ ވާހަކަތަކެއް ކަމަށެވެ. އަދި އެއީ ހަމައެކަނި ބުނެލާ ބަހަކަށް ވުރެ ބޮޑު ވާހަކައެއް ކަމަށް ވެސް ޓްރަމްޕް އިފަ ކުރެއްވި އެވެ. 

އެގޮތުން ޓްރަމްޕް ވިދާޅުވީ ބުނާ ބަހެއްގެ ބަރުދަން އިންތިހާ އަށް ބޮޑު ވާނެ ކަމަށާއި، ގިނަ ފަހަރު އެކަމުން ނިކުންނާނެ ނަތީޖާ ވެސް ބުނެދޭން ނޭނގޭނެ ކަމަށެވެ. އެހެން ނަމަވެެސް، މި ފަހަރު ދެކެވުނު ވާހަކަތަކީ އެހެން ނުވާނެ ވާހަކަތަކެއް ކަމަށް އުންމީދު ކުރައްވާ ކަމަށް ވެސް ޓްރަމްޕް ކުރެއްވި ޕޯސްޓުގައި ވަނީ ވިދާޅުވެފަ އެވެ. 

ހަނގުރާމަ ހުއްޓާލުމަށް ރަޝިޔާ އަށް ދެ ފަހަރެއްގެ މަތިން މުއްދަތެއް ޓްރަމްޕް ދީފައިވާއިރު، ރަޝިޔާގެ ކުރީގެ ރައީސް އަދި ރަޝިޔަން ފެޑަރޭޝަންގެ ސެކިއުރިޓީ ކައުންސިލްގެ ޑެޕިއުޓީ ޗެއާމަންކަން ވެސް ކުރައްވަމުން އަންނަ މެޑްވެޑޭވް ވިދާޅުވެފައި ވަނީ، ވަކި މުއްދަތެއް ދިނުމަށް ފަހު، ދެން ދެވޭ ކޮންމެ އިންޒާރަކީ ހަނގުރާމައާ ކައިރިވާނެ ކަމެއް ކަމަށެވެ. އަދި އޭނާ ވަނީ އެމެރިކާ އަށް އިންޒާރު ދެއްވައިފަ އެވެ.

އެކަމާ ގުޅިގެން ޓްރަމްޕް ވިދާޅުވެފައި ވަނީ، މެޑްވެޑޭވް އެފަދައިން ވާހަކަ ދައްކާފައި ވުމުގެ ސަބަބުން އެކަށީގެންވާ ސަރަަހައްދު ތަކުގައި ނިއުކްލިއާ ދެ ސަބްމެރިން ބޭއްވުމަށް އަންގަވާފައިވާ ކަމަށެވެ. އެމެރިކާގެ އަސްކަރީ އަދި ސަލާމަތީ ކަންކަން ރޭވިފައި އޮންނަ ގޮތުން ނިއުކްލިއާ ސަބްމެެރިންގެ ޙަރަކާތްތައް ހާމަ ނުކުރާތީ، އެ ދެ ސަބްމެރީން ބޭއްވީ ކޮން ސަރަހައްދެއްގައި ކަމެއް ޓްރަމްޕް ވެސް ވިދާޅުނުވެ އެވެ.

އެމެރިކާ އަށް ނިސްބަތްކޮށް މެޑްވެޑޭވް ދެއްކެވި ވާހަކަތަކާ ގުޅިގެން ޓްރަމްޕް މި ނިންމެވުން ނިންމަވާފައިވާއިރު، މިއީ ދެ ޤައުމުގެ ދެ މެދުގައި އޮތް ގުޅުމަށް އަސަރު ކޮށްފާނެ ކަމެއް ކަމަށް ގިނަ ފަރާތްތަކަކުން އަންނަނީ ފާހަގަ ކުރަމުންނެވެ.