ވިންޑޯ ނެތި 'ވިންޑޯ ސީޓް' ވިއްކުމާ ގުޅިގެން ޑެލްޓާ އަދި ޔުނައިޓެޑްގެ މައްޗަށް ދަޢުވާ އުފުލައިފި

ކުޑަދޮރު ނެތި ކުޑަދޮރު ގޮނޑި ވިއްކި މައްސަލައިގައި އެމެރިކާގެ ޑެލްޓާ އެއަރ ލައިންސް އަދި ޔުނައިޓެޑް އެއަރލައިންސްގެ މައްޗަށް ދައުވާ ކޮށްފިއެވެ.

ޑެލްޓާ އެއަރ ލައިންސް އަދި ޔުނައިޓެޑް އެއަރލައިންސްގެ މައްޗަށް އުފުލި ދައުވާގައި ކުޑަދޮރު ގޮނޑިއަށް އިތުރު ފައިސާ ނެގުަމާއެކު ވެސް ބޯޓުގައި "ހުދު ފާރަކާ" ޖެހިގެން ހުންނަ ގޮނޑީގައި ތިބެން ޖެހޭ ކަމަށް ބުނެފައިވެއެވެ.

އެމެރިކާގެ މި ދެ އެއަރލައިންގެ މައްޗަށް ވަކިވަކިން ކުރެވިފައިވާ މި ދަޢުވާތަކުގައި ކޮންމެ އެއަރލައިނެއްގެ އެއް މިލިއަނަށްވުރެ ގިނަ ކަސްޓަމަރުންނަށް މިލިއަން ޑޮލަރުގެ ބަދަލު ހޯދުމަށް އެދިފައިވެއެވެ. ޓިކެޓް ގަތުމުގެ މަރުހަލާގައި މި ގޮނޑިތަކުގައި ކުޑަދޮރު ނުހުންނަކަން އަންގާފައި ނުވާކަމަށާއި، އަދި އިތުރު ފައިސާވެސް ނަގާފައިވާކަމަށް އެފަރާތްތަކުން ބުނާ ކަމަށް ބީބީސީ އިން ރިޕޯޓުކޮށްފައިވެއެވެ.

މިއީ ޝަރީޢަތުގައިވާ މައްސަލައަކަށްވާތީ ޔުނައިޓެޑް އިން އެއްވެސް ކޮމެންޓެއް ދޭން ބޭނުން ނުވާ ކަމަށާއި ބީބީސީއިން ޑެލްޓާ އަށް ކޮމެންޓަށް އެދިފައިވާ ކަމަށް ޚަބަރުގައި ވެއެވެ.

މި ދަޢުވާތަކުގައި، ކުޑަދޮރު ހުންނަ ގޮނޑިއަށް އިތުރު ފީ ދެއްކި ނަމަވެސް ކުޑަދޮރު ނެތް ގޮނޑި ލިބުނު ފަސިންޖަރުންނަށް ފައިސާ އަނބުރާ ހޯދުމަށް އެދިފައިވެއެވެ. ބީބީސީ އިން ބުނެފައި ވަނީ މި ދެ ދަޢުވާވެސް ހުށަހަޅާފައިވަނީ ގްރީންބާމް އޮލްބްރާންޓްޒް ޤާނޫނީ ފާމުންނެވެ. އެއަރ ކޮންޑިޝަނިންގ ޑަކްޓްތަކާއި، ވަޔަރިންގ އަދި އެހެނިހެން ތަކެތި ހުންނަ ގޮތުން ބޯއިންގ އަދި އެއަރބަސް މަތިންދާބޯޓުތަކުގެ ބައެއް ގޮނޑިތަކުގައި ކުޑަދޮރު ނުހުންނަ ކަމަށް މައްސަލައިގައި ބުނެފައިވެއެވެ.

ކޯޓު ލިޔެކިޔުންތަކުގައިވާ ގޮތުން، ޓިކެޓް ގަތުމުގެ މަރުހަލާގައި ޑެލްޓާ އަދި ޔުނައިޓެޑް އިން މި ގޮނޑިތަކުގައި ކުޑަދޮރު ނުހުންނަކަން ފާހަގަކޮށްފައި ނުވެއެވެ. ދަޢުވާތަކުގައި ބުނެފައިވާ ގޮތުން، މީހުން ކުޑަދޮރު ގޮނޑި ގަންނަނީ އެކި ސަބަބުތަކަށް ޓަކައެވެ. އޭގެ ތެރޭގައި ވައިގެ ދަތުރުކުރުމުގެ ބިރުވެރިކަމާއި މޯޝަން ސިކްނަސް އަށް ހައްލެއް ހޯދުމަށާއި، ކުޑަކުދިން މަސްއޫލުކުރުމަށް ނުވަތަ މަންޒަރު ބެލުމަށްޓަކައެވެ. ޝަކުވާތަކުގައިވާ ގޮތުން، ކުޑަދޮރު ނުހުންނަކަން އެނގުނުނަމަ، ބައެއް ފަސިންޖަރުން އެ ގޮނޑިތައް އިޚްތިޔާރު ނުކުރީސް ކަމަށާއި އަދި އެއަށް އިތުރު ފައިސާ ނުދެއްކީސް ކަމަށް ބުނެފައިވެއެވެ.

ލިޔެކިޔުންތަކުގައިވާ ގޮތުން، ދެ އެއަރލައިނުން ވެސް މަތިންދާބޯޓުގެ އަރިމަތީގައި ހުންނަ ހުރިހާ ގޮނޑިއެއް ސިފަކުރަނީ ކުޑަދޮރު ގޮނޑީގެ ގޮތުގައެވެ. އެއީ ބައެއް ގޮނޑިތަކުގައި ކުޑަދޮރު ނުހުންނަކަން އެނގިހުރެއެވެ. އާންމު ގޮނޑިއަކާ އަޅާބަލާއިރު ކުޑަދޮރު ގޮނޑި އިޚްތިޔާރު ކުރުމަށް އިތުރު ފައިސާ ނެގިދާނެއެވެ. ކޮންމެ މައްސަލައެއްގައިވެސް ވަކާލާތުކުރާ ޤާނޫނީ ވަކީލުން މިކަން ސިފަކޮށްފައި ވަނީ އޮޅުވާލުމާއި ޤާނޫނާ ޚިލާފު ކަމެއްގެ ގޮތުގައެވެ.

އެމެރިކަން އެއަރލައިންސް އަދި އެލާސްކާ އެއަރލައިންސް ފަދަ އެހެން އެއަރލައިންތަކުން އެފަދަ މަތިންދާބޯޓުތައް ބޭނުންކުރި ނަމަވެސް، ޓިކެޓް ގަތުމުގެ މަރުހަލާގައި ގޮނޑީގައި ކުޑަދޮރު ނުހުންނަކަން އަންގާ ކަމަށް އެފަރާތްތަކުން އިތުރަށް ބުނެފައިވެއެވެ.