ކޭންގެ ސޮއި ހޯދަން ސިޓީން މަސައްކަތް ކުރި: ގާޑިއޯލާ

މި ސީޒަނުގައި ޓޮޓެންހަމްގެ ކެޕްޓަން ހެރީ ކޭންގެ ސޮއި ހޯދުމަށް މެންޗެސްޓާ ސިޓީން ވަރަށް ބޮޑަށް މަސައްކަތް ކުރި ކަމަށާއި، އެކަމަކު ޓޮޓެންހަމުން އޭނާ ވިއްކާލަން ބޭނުންނުވީ ކަމަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ބުނެފިއެވެ.

ކޭންއަކީ މި ސީޒަން ފެށުމުގެ ކުރިން ސިޓީން ގަންނަން އެންމެ ބޮޑަށް ބޭނުންވި ކުޅުންތެރިޔާއެވެ. ކޭން ގަތުމަށް ސިޓީން ތިން ފަހަރެއްގެ މަތިން ބިޑް ކުރިނަމަވެސް ޓޮޓެންހަމުން ވަނީ އެ ހުށަހެޅުންތަކަށް ނޫނެކޭ ބުނެފައެވެ. ސިޓީގެ ވާދަވެރި ކުލަބް މެންޗެސްޓާ ޔުނައިޓެޑުން ވެސް ކޭންގެ ސޮއި ހޯދުމަށް މަސައްކަތް ކުރިއެވެ.

ގާޑިއޯލާ ބުނީ ކޭން ގަތުމަށް ސިޓީން އެތަށް ފަހަރެއްގެ މަތިން މަސައްކަތްކުރި ކަމަށެވެ. އެކަމަކު ސިޓީން ދެން ކޭން ހޯދުަމަށް މަސައްކަތް ކުރުމަކީ ވުން ގާތް ކަމެއް ނޫން ކަމަށް ގާޑިއޯލާ ބުންޏެވެ.

ގާޑިއޯލާ ބުނީ ކޭން ވިއްކާލަން ބޭނުންނުވީ ޓޮޓެންހަމުން ކަމަށާއި، ސިޓީން ކޭން ގަތުމަށް ކުރެވެން ހުރި ހުރިހާ ކަމެއް ކޮށްފައިވާ ކަމަށެވެ. ކޭން ނެތް ކަމުގައި ވިޔަސް ސިޓީން މިވަގުތު ލީގުގައި އޮތީ އޭނާ ހިތްހަމަ ޖެހޭ ހިސާބެއްގައި ކަމަށްވެސް ގާޑިއޯލާ ވަނީ ބުނެފައެވެ.

ކޭންގެ ސޮއި ސިޓީއަށް ނުހޯދެވުމުން ގާޑިއޯލާ އާއި ސިޓީގެ މެނޭޖުމަންޓާއި ދެމެދު ހިތްހަމަ ނުޖެހުންތަކެއް އޮތްކަމަށް ރިޕޯޓްތައް ބުންޏެވެ. އެކަމާ ގުޅޭ ގޮތުން ގާޑިއޯލާ ބުނީ ކުލަބުގެ ބާރު ހުންނަ ކަންކަން އަބަދުވެސް ކުލަބުން ކުރަމުން އަންނަ ކަމަށެވެ. އަދި ޓްރާންސްފާ މާކެޓުގައި ހިނގާ ކަންކަމަކީ ކުލަބުގެ ބާރު ފޯރުވޭ ވަރަށްވުރެ އެހެން ބަޔެއްގެ އަތްމަތީގައި އޮންނަ ކަމެއް ކަމަށް ގާޑިއޯލާ ބުންޏެވެ.

މެންޗެސްޓާ ސިޓީން ނިމިދިޔަ ޖެނުއަރީ ޓްރާންސްފާގައި އެކުލަބަށް ގެނައި ކުޅުންތެރިއަކީ ރިވަ ޕްލޭޓްގެ ޒުވާން ފޯވާޑް ޖޫލިއަން އަލްވަރޭޒްއެވެ. މި ސީޒަންގެ ނިޔަލަށް ލޯން އެއްބަސްވުމެއްގެ ދަށުން އަލްވަރޭޒް ހުންނާނީ ރިވާ ޕްލޭޓްގައެވެ. އޭނާ އަކީ އާޖެންޓީނާ މީޑިއާ އިން ސިފަކުރާގޮތުގައި މުސްތަގުބަލުގައި އާޖެންޓީނާގެ އެއް ވަނަ ފޯވާޑެވެ.