އިންޑިއާގެ ޖައްމު ކަޝްމީރު ސަރަހައްދުގެ ސްކޫލް ދަރިވަރުންނަށް ކޮވިޑާއެކު އައި ބަދަލުތަކުން އަރައިގަތުމަށް ހިތްހަމަޖައްސައިދޭ ސަރަހައްދުތަކެއް ސްކޫލުތަކުގައި ހަދަން ނިންމައިފިއެވެ.
ޖައްމު ކަޝްމީރުގެ ޑިރެކްޓަރ އޮފް ސްކޫލް އެޑިއުކޭޝަން، ރަވީ ޝަންކަރު ޝަރުމާ ވިދާޅުވީ ޖައްމު ކަޝްމީރުގެ 1،000 ސްކޫލުގައި ދަރިވަރުން ހިތްހަމަޖައްސައިދޭ މާހައުލު ނުވަތަ ސަރަހައްދުތައް ހަދަން ނިންމާފައިވާ ކަމަށާއި، އެ ސަރަހައްދުތައް ވެގެންދާނީ ދަރިވަރުންނަށް ކައުންސެލިންގ ލިބިގެންދާނެ ސަރަހައްދުތައް ގޮތުގައި ކަމަށެވެ.
ރަވީ ޝަންކަރު އިތުރަށް ވިދާޅުވީ ޖައްމު ކަޝްމީރުގެ ސްކޫލުތައް ދެ އަހަރެއްހާ ދުވަހު ގެންގޮސްފައިވަނީ އޮންލައިންކޮށް ކަމަށާއި، އެހެންކަމުން މިހާ ދުވަހަށްފަހު އަލުން އެނބުރި ދަރިވަރުން ސްކޫލަށް ކިޔަވަން ދާން ފެށުމުން ކުދިންނަށް ކޮންމެސް ވަރެއްގެ އުނދަގޫތަކަކާއި ކުރިމަތިވާނެކަމަށެވެ.
ރަވީ ވިދާޅުވީ، ކަޝްމީރު ސަރުކާރުން މަސައްކަތް ކުރަމުންދަނީ ދަރިވަރުންނަށް މިފަދަ ހިތްހަމަ ޖައްސައިދޭ މާހައުލުތަކުން ކުދިންނަށް ބޭނުންވާ ކަންކަން ފުރިހަމަކޮށްދިނުމަށް ކަމަށާއި، އަދި މި ދަނޑިވަޅު ކައުންސެލިންގ ފަދަ ކަމެއް ފެށުން އެއީ ކޮންމެހެންވެސް ބޭނުންވެފައިވާ ކަމެއް ކަމަށެވެ.
މީގެ އިތުރުން ދަރިވަރުންނަށް ކުރިޔަށް މިއޮތް ތިން މަސް ދުވަހު ކިޔެވުމުގެ ކަންކަމުގައި ފަސޭހަތަކެއް ފޯރުކޮށްދޭން ނިންމާފައިވާ ކަމަށް ރަވީ ޝަންކަރު ވިދާޅުވިއެވެ. އަދި މި ދުވަސްތަކުގައި ދަރިވަރުންނަށް ތައުލީމުގެ ބޭރުން އަމިއްލަ ދިރިއުޅުމުގެ ގިނަ ކަންކަން އުނގަންނައިދޭން ނިންމާފައިވާ ކަމަށްވެސް ރަވީ ޝަންކަރު ވިދާޅުވިއެވެ.
