އިންޑިއާގެ 'ޑިސްކޯ ކިންގް' މަރުވެއްޖެ
17 ފެބުރުއަރީ 2022 | ބުރާސްފަތި 00:23ލަހިރީ މަރުވެފައިވަނީ އުމުރުން 69 އަހަރުގައި
އިންޑިއާގެ ލަވަކިޔުންތެރިޔާ އަދި ކޮމްޕޯސަރު ބައްޕީ ލަހިރީ
'ޑިސްކޯ ކިންގް'ގެ ނަމުން މަޝްހޫރުވެފައިވާ އިންޑިއާގެ ލަވަކިޔުންތެރިޔާ އަދި ކޮމްޕޯސަރު ބައްޕީ ލަހިރީ މަރުވެއްޖެއެވެ.
ލަހިރީ މަރުވެފައިވަނީ އުމުރުން 69 އަހަރުގައެވެ. އޭނާ މަރުވީ ގިނަ ބަލިތަކަކަށް ފަރުވާ ކުރަމުން ދަނިކޮށްކަމަށް އާއިލާއިން ވަނީ ބުނެފައެވެ.
ވެސްޓް ބެންގާލްގެ މިއުޒިކް އާއިލާއަކަށް އުފަން ލަހިރީގެ ކަރުގައި އޮންނަ ރަން ފަށާއި އަވި އައިނަކީ ގިނަ ބައެއްގެ މެދުގައި އޭނާ މަޝްހޫރުވެގެން ދިޔަ އެއް ސަބަބެވެ. އޭނާގެ ޓްރޭޑްމާކަކަށްވެސް ވެފައިވަނީ އެފަށާއި އައިނެވެ. ލަހިރީއަކީ އިންޑިއާގެ ޑިސްކޯ މިއުޒިކްގައި ފާހަގަކޮށްލެވޭ ފަންނާނެކެވެ.
އޭނާ ވަނީ ދުނިޔޭގެ ފެންވަރުގައި ފާހަގަކުރެވޭ އެތައް ފަންނާނުންކާއެކު މަސައްކަތް ކޮށްފައެވެ. އެގޮތުން އޭނާ އެކުގައި މަސައްކަތްކުރި މީހުންގެ ތެރޭގައި އިނގިރޭސި މޮޑެލް އަދި ލަވަކިއުންތެރިޔާ ސަމަންތާ ފޮކްސްއާއި ސްނޫޕް ޑޯގް ހިމެނެއެވެ.
ލަހިރީ މަރުވިއިރު އޭނާގެ އަންބަކާއި ދެދަރިން ތިބެއެވެ. އޭނާ މަރުވެފައިވަނީ މިދިޔަ އަންގާރަ ދުވަހުގެ ރޭ ދަންވަރުގެ ވަގުތެއްގައެވެ.
