އެހެން ހުރިހާ ސީޒަންތަކަށްވުރެ ޔުވަންޓަސް މިފަހަރު ތަފާތުވާނެ: އެލެގްރި

އެހެން ހުރިހާ ސީޒަންތަކަށްވުރެ ޔުވަންޓަސް މިފަހަރު ތަފާތުވާނެކަމަށް އެޓީމުގެ ކޯޗު މަސްމިލިއާނޯ އެލެގްރީ ބުނެފި އެވެ.

މެޗުގެ ކުރިން ނޫސްވެރިންނަށް މައުލޫމާތު ދެމުން އެލެގްރީ ބުނީ ޔުވަންޓަސް ފައިނަލުން ޖާގައެއް ހޯދީ ހަމަހުރެފަކާ ނޫން ކަމަށާއި، އެއީ ވަރަށް ބުރަ މަސައްކަތުން ހާސިލްވި ކަމެއް ކަމަށެވެ.

އެލެގްރީ ބުނީ 2015 ވަނަ އަހަރުވެސް ޔުވަންޓަސް ފައިނަލުން ޖާގަ ހޯދި ކަމަށާއި، އެފަހަރު ފައިނަލުން ބަލިވި ނަމަވެސް މިފަހަރު ޓީމު ކުރިއާ އަޅާބަލާއިރު އެތައްގޮތަކުން ކުރިއަރާފައިވާ ކަމަށެވެ. އެހެންނަމަވެސް ޔުވަންޓަސް އަށް ޗެމްޕިއަންސް ލީގުގައި ފާއިތުވެދިޔަ އަހަރުތަކުގައި ހިތި ތަޖުރިބާތައް ކުރިމަތިވުމުން އެއީ ގޮންޖެހުމަކަށް ކުރިމަތިވާނެ ކަމެއް ކަމަށެވެ.

މިދިޔަ އަހަރުވެސް ޗެމްޕިއަންސް ލީގުގައި ޔުވަންޓަސް ތަފާތުވާނެކަން ފާހަގަކުރަމުން އެލެގްރީ ބުނީ އެފަހަރު މުބާރާތުން ކެޓީ ގަދަ 16 ގައި ބަޔާން މިއުނިކް އަތުން ބަލިވެގެން ކަމަށާއި، އެހެންނަމަވެސް އެ މެޗުން ބަލިވީ އެންމެ ފަހުވަގުތު ކަމަށެވެ.

އެލެގްރީ ބުނީ ރެއާލް މެޑްރިޑާ ދެކޮޅަށް ކުޅޭ ފައިނަލް މެޗަކީ އެންމެ މެޗެއް ކަމަށާއި، އެ މެޗު ޔުވަންޓަސްއަށް ކާމިޔާބުކުރެވެން ޖެހޭނެ ކަމަށެވެ. އެގޮތުން ޔުވަންޓަސް އިން ޔުވަންޓަސްގެ ގޭމް ދައްކާ މެޗު ކާމިޔާބުކުރާނެ ކަމަށް އުންމީދުކުރާ ކަމަށް އޭނާ ވަނީ ބުނެފައެވެ.

ޗެމްޕިއަންސް ލީގުގެ ފައިނަލަށް ޔުވަންޓަސް ދަތުރުކުރި ގޮތަށް ބަލާއިރު، އެޓީމު ވަނީ ހިމެނުނު ގްރޫޕްގެ އެއްވަނަ ހޯދާ ގަދަ 16 އަށް ދަތުރުކޮށް ޕޯޓޯ ބަލިކޮށްފައެވެ. ކުއާޓާގައި ޔުވަންޓަސް އާއި ބާސާ ބައްދަލުކުރަން ޖެހުނުއިރު، 0-3 ގެ އެގްރިގޭޓް ނަތީޖާއަކުން ބާސާ ބަލިކޮށް އެޓީމު ވަނީ ސެމީ އަށް ދަތުރުކޮށްފައެވެ. ފައިނަލުން ޔުވަންޓަސް ޖާގަ ހޯދި މޮނާކޯއާ ވާދަކޮށް 1-4 ގެ އެގްރިގޭޓް ނަތީޖާއަކުންނެވެ.