އިޓާލިއަން ލީގު: އޭސީ މިލާން ބަލިކޮށް ޔުވަންޓަސް އަށް 11 ޕޮއިންޓްގެ ލީޑެއް
އޭސީ މިލާން އޮތީ ލިބުނު 50 ޕޮއިންޓާއެކު ޕޮއިންޓް ތާވަލުގެ ހަތްވަނައިގައި
ޔުވަންޓަސް އަދި އޭސީ މިލާން ބައްދަލުކުރި މެޗުގެ ތެރެއިން
އިޓާލިއަން ލީގުގައި އޭސީ މިލާން ބަލިކޮށް ޔުވަންޓަސް އަށް ޕޮއިންޓް ތާވަލުގައި 11 ޕޮއިންޓްގެ ލީޑެއް ލިބިއްޖެ އެވެ.
ހުކުރު ދުވަހުގެ ރޭ ކުޅުނު މެޗު އޭސީ މިލާންއާ ވާދަކޮށް ޔުވަންޓަސް އިން މެޗު ކާމިޔާބުކުރީ 1-2 ގެ ނަތީޖާއަކުންނެވެ.
ޔުވަން ޓަސް ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށްގެން ރަނގަޅަށް ކުޅުނީ އެޓީމުންނެވެ. އެގޮތުން އެޓީމުން ވަނީ 30 ވަނަ މިނެޓުގައި ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ބެނަޓިއާ އެވެ.
މި ލަނޑަށްފަހުވެސް ޔުވަންޓަސް އިން ވަނީ އޭސީ މިލާންގެ ގޯލަށް ނުރައްކާކޮށް ހަމަލާތަކެއް އުފައްދާފައެވެ. އެހެންނަމަވެސް ޔުވަންޓަސް އިން ރަނގަޅަށް ކުޅެމުން ދަނިކޮށް 43 ވަނަ މިނެޓުގައި އޭސީ މިލާނުގެ ކާލޮސް ބަކާ ވަނީ އެޓީމަށް މެޗުގެ ނަތީޖާ ހަމަހަމަކޮށްދީފައެވެ.
މި ނަތީޖާއާއެކު ފުރަތަމަ ހާފް ނިމުނީ 1-1 ގެ ނަތީޖާއިން ދެޓީމު އެއްވަރުވެގެންނެވެ.
ދެވަނަ ހާފް ފެށިގެންވެސް ޔުވަންޓަސް އަށް ވަނީ ލަނޑު ޖެހުމަށް ގިނަ ފުރުސަތުތަކެއް ލިބި ބޭކާރުވެފައެވެ. މީގެއިތުރުން އޭސީ މިލާނަށްވެސް މެޗުގެ ލީޑު ހޯދުމަށް ރަނގަޅު ފުރުސަތުތަކެއް ލިބުނެވެ.
މެޗުގައި ޔުވަންޓަސް މޮޅުވި ލަނޑު އިތުރުވަގުތުގެ ތެރޭގައި ކާމިޔާބުކޮށްދިނީ އެޓީމަށް ލިބުނު ޕެނަލްޓީ އަކުން ޕައުލޯ ބްރޫނޯ ޑިބަލާ އެވެ.
މި ނަތީޖާއާއެކު ޔުވަންޓަސް އޮތީ ކުޅުނު 28 މެޗުން ލިބުނު 70 ޕޮއިންޓާއެކު ޕޮއިންޓް ތާވަލުގެ އެއްވަނައިގަ އެވެ. މެޗުން ބަލިވި އޭސީ މިލާން އޮތީ ކުޅުނު 28 މެޗުން ލިބުނު 50 ޕޮއިންޓާއެކު ޕޮއިންޓް ތާވަލުގެ ހަތްވަނައިގަ އެވެ.
